克服對鞦韆的恐懼

Posted on February 19, 2014 By       1,307

今日小小豬終於可以開開心心咁打鞦韆啦!其實打鞦韆對其他小朋友可以話係一件好容易嘅事,不過唔知點解由細細個開始,小小豬都抗拒打鞦韆,去到公園一見到個鞦韆就已經話要去另一邊玩。

 

我哋相信小小豬對空間感應該無問題,因為佢成日玩滑梯時都扶住個扶手搖動佢個身體,就即係好似下圖咁,但唔知點解佢咁抗拒鞦韆。

雖然都知唔鐘意玩鞦韆唔係咩大問題,不過我哋都好希望小小豬可以試多啲唔同類型嘅遊戲,所以去到有鞦韆玩嘅公園時,都一定會行過去睇吓其他小朋友,之後又慢慢開始同小小豬一齊玩。

 

當然,開初有一定難度,尤其係叫小小豬坐上鞦韆上面,因為小小豬一定喊得好利害,唔知嘅人仲以為我地係拐子佬呀。

 

經過大肥豬不斷努力,小小豬開始對鞦韆少咗啲戒心,由初時唔抗拒行埋去,到可以抱住佢坐喺我哋大脾上坐,之後坐住我地大脾上搖,再過多一陣就可以自己一個人坐喺鞦韆上面。睇住小小豬依個改變,我同大肥豬已經好開心。

 

不過,真係估唔到小小豬今日俾咗個大驚喜我地。事緣我哋今日上完主日學之後就趕入海洋公園玩,所以就無去附近個小公園玩鞦韆。

 

點知……小小豬竟然主動話要去玩鞦韆,既然係主動,我地當然好樂意去玩一轉啦!當佢一見到個鞦韆,佢就自己走上去,開頭都係叫大肥豬慢慢搖,玩咗一陣就話要大力啲、搖高啲,仲玩得好開心,仲唔洗大肥豬陪添呀~

仲玩到唔願走添呀~

 

睇見今日小小豬依個行為,我同大肥豬都真係勁興奮,嗰一種心情真係難以形容,因為小小豬終於都克服到佢個心理障礙,可以好Enjoy咁打鞦韆啦!

KinseyMaMa
發掘新點子,製造優質親子時間。