八爪魚家長:學語文,學講嘢?

Posted on February 11, 2014 By       2,023

我作為一名普通過普通的家長,當然與普遍家長一樣,心底都讚自己的孩子「好搞笑、好可愛,好叻⋯⋯」,但一直為怕出現「笑住對別人講﹕我講個笑話給你聽,好好笑,結果沒有人覺得好笑」尷尬得丟臉的場面,所以極少公開分享孩子的生活趣事。不過,趁農曆年,大家都不怕尷尬與親戚寒喧「近排肥左、瘦左」,我也不妨應節分享孩子的搞笑對話。

 

孩子希哥(三歲多)的語言藝術之一﹕

希:爸爸,我以後都不會講Sorry。
我﹕點解呀﹖有錯就要講Sorry啦。
希﹕又係你講,你講Sorry無用,我唔講啦。
我﹕我係有咁講⋯⋯(衰仔,捉我字蚤,我的確係講過﹕你講左Sorry,又唔改,講Sorry都無用啦。)

 

之二﹕

希﹕今日又食意大利粉呀﹖
我﹕係呀
希﹕唔⋯⋯
太太﹕點可以咁架,唔鍾意食都唔可以「唔」,咁無禮貌。
希﹕唔⋯⋯
太太﹕你試下再「唔」多次。(憤怒中)
希慢慢講一句﹕唔⋯⋯即係好鍾意咁解。
太太與我﹕⋯⋯

 

之三﹕

希﹕媽媽識煮飯,好叻,我都識煮飯。
太太﹕爸爸識唔識煮飯。
希﹕梗係唔識啦﹗爸爸淨係識返工,同XX叔叔(我老闆)傾電話。

 

之四﹕

(太太與孩子睡前聊天)
希﹕我叫梁得意
太太﹕咁妹妹呢﹖
希﹕佢叫梁開心,妹妹成日都笑。
太太﹕咁媽媽呢﹖
希﹕你⋯⋯叫⋯⋯郭搞笑
太太﹕媽媽好搞笑﹖我都唔講笑話。
希﹕咁呀,你叫郭可愛啦。
太太﹕爸爸呢﹖
希﹕佢叫﹕梁⋯⋯無⋯⋯聊。(講完自己忍唔住笑)

 

或許讀者們會覺得很奇怪,為什麼以上對話都是廣東話寫出來。因為我實在感慶幸,兒子入讀的幼稚園,並非家長趨之若騖的「英普班」,若果孩子的校園生活只說英語及普通話,我不知這位小孩子會否如此「多嘴」,甚至不會出現以上的對話。

 

不少「英普班」家長,對於自己的孩子上學時只講英語或普通話,感到萬分驕傲,甚至對於孩子於校園講廣東話而感到羞於啟齒,雖然我亦經常聽到﹕「孩子們聽英文上課,完全無問題,玩得不知有多開心。」但始終覺得,K1(幼低班)這年紀還是廣東話學習比較開心、投入。

 

你會選擇:孩子K就全英語、普通話上課,而「零」廣東話學習,還是廣東話上課,而可出現以上的「無聊」對話?我一定會選擇後者。

 

祝各位,親子學習愉快,身體健康,家肥屋潤(希:係咪潤膚膏個潤?)。

 

八爪魚家長
「八爪魚家長」﹕趙公梃(Tom 爸)商界精英與梁永樂(樂爸)前教育傳媒人,兩位與絕大部分香港家長一樣,忙工作、忙應酬、忙得八爪都不夠用,自稱「八爪魚家長」,兩人於報章專欄分享育兒的喜與樂、講培育子女的心得,立此存照,給子女日後「秋後算帳」。