【教壞細路系列】地地曳,打地地

Posted on February 7, 2014 By       1,439

【蕭栽見聞】蕭栽認為,本世紀最令人哭笑不得的其中一句說話,非「地地曳,打地地」莫屬。每一次見啲小朋友跑跑下跌低,放聲大哭,然後啲爸爸媽媽或公婆爺嫲邊講「地地曳,打地地」,邊教小朋友拍打地下時,多事的我都好有衝動問:「究竟地地有幾曳?點曳法?我好有興趣,願聞其詳。」不過,我同時係一個和平追求者,為免撩交嗌或畀人打,我從未敢將心中疑惑問出口。

 

咁我都知道,香港啲地係衰啲嘅,又凹凸不平,有時啲磚頭又突起,中女如我行咗廿幾年路偶爾都仲會「戟」親,不過我大人大姐,今次「戟」親咪唯有下次行得再小心啲囉,唔通我即刻踎低打地地話佢好「戟」我咩?

 

既然我哋大個咗都唔會再咁做,咁點解要教個小朋友去賴笪地先?其實唔只地架,都聽過唔少話張檯曳呀、梳化曳呀,總之小朋友撞咗落邊樣野度,就係嗰樣野曳,係唔關小朋友事的,所有死物都係曳的,只有我個小朋友最無辜。唔係啲野衰,我個小朋友點會整親喎,係咪先?所有嘅錯都係人錯,我個小朋友係唔會錯架!

 

我知我知,我寫得誇張咗,不過順住「地地曳,打地地」嘅邏輯寫落去,寫下寫下不自覺就寫成咁。其實,小朋友撞咗落樣死物度,唔係佢唔小心,唔通真係樣死物曳曳走嚟撞佢咩?唔想小朋友第時變成個「『便便』唔出賴地硬」嘅人,下次佢跌親時,唔好再教佢打地地喇。

蕭栽
熱血編輯部成員! 永遠十八歲之八十後人妻!