小烏龜要洗白白

Posted on January 29, 2014 By       1,507

話說大半年前,小豬爸買咗隻小烏龜俾小小豬,不過因為小小豬仲未好識得照顧,所以將依個重任交左俾LULU妹。唔經唔覺小烏龜都已經大隻咗好多,今日小小豬又一新作……就係幫手同小烏龜洗白白啦!

 

其實小小豬唔係第一次同小烏龜洗白白,不過之前幾次都只係如似今日初初咁,等LULU妹放左小烏龜係水盆上,小小豬只係輕輕咁同小烏龜擦身。

 

不過,今日同小烏龜擦到中段,小小豬突然好大膽咁拎起小烏龜,仲好細心咁望吓小烏龜有邊度污濁,之後就同小烏龜繼續擦背,最後睇到小烏龜完全乾淨就放返落缸呀。

 

真係完全無諗過小小豬係完全唔怕小烏龜,咁大膽拎住小烏龜咁耐(拎起上手都擦咗大約五分鐘呀),不過大家可以放心,小小豬擦嘅時候都好溫柔,所以小烏龜係唔會受傷呀!

 

某程度上我都覺得小小豬今次同小烏龜洗白白有好大得著,因為俾我感覺到小小豬對小動物可以好溫柔同好有愛心,當佢幫小烏龜擦背時,佢都只係擦個殼,仲都不停講:「要細細力,唔好整痛龜龜,唔可以攪佢個頭仔!」

 

希望小小豬可以KEEP住擁有依一份心,因為對小動物有愛心都係一個好寶寶應該有嘅態度嚟呀!

KinseyMaMa
發掘新點子,製造優質親子時間。