同烏龜仔近距離接觸

Posted on January 15, 2014 By       1,280

話說之前小小豬幫過烏龜仔洗白白之後,之後幾日都成日入LULU妹間房想睇烏龜仔,見佢對烏龜仔咁上心,所以今日就等小小豬同烏龜仔嚟近距離接觸多少少啦!

 

小小豬都好留心睇缸入面嘅烏龜仔~

 

之後我哋打算放烏龜仔出嚟地下爬吓,可以等烏龜仔伸展之餘,亦等小小豬可以觀察烏龜仔爬嘅情況。點知當我地一放烏龜仔喺地下時,小小豬以為佢走失咗,即刻好緊張咁拎起烏龜仔放返缸入面呀~

 

隔左一陣,我哋又再一次將烏龜仔放回地下,係想測試小小豬係貪玩定真係知道要烏龜仔住喺個缸度。當小小豬一見到烏龜仔,又即刻好緊張要將烏龜仔帶回缸啦~

 

大家可以先放心,可能小小豬都知道烏龜仔係有生命,所以成個動作都好斯文,無整親烏龜仔呀!

 

今次依件事,發現小小豬都好留意身邊發生嘅事,可能成日都係望住個缸睇烏龜仔,所以知道烏龜仔係住係個缸入面,唔可以走出嚟 (咁即話佢唔會捉烏龜仔出嚟玩啦)!

 

另外,即使我哋無提醒佢,佢亦識得溫柔咁對待烏龜仔,都算佢有愛心同乖仔啦!

 

其實我哋都真係完全無諗過小小豬係識得將烏龜仔放回缸度,亦無諗過佢可以咁細細力放回烏龜仔(平時佢執玩具幾粗魯),最估唔到就係小小豬可以咁大膽捉住烏龜仔(其實我都不知幾驚,唔敢捉烏龜仔呀)。

 

小小豬真係開始大個仔啦!

KinseyMaMa
發掘新點子,製造優質親子時間。