C ALLStar:真的愛你!@MOM’s DaY別注

Posted on May 8, 2013 By       5,391

【香港消息】樂壇組合C ALLStar工作一浪接一浪,接拍音樂舞台劇,出席大大小小活動,近期又擔任城大「相中畫」創作比賽大使。工作忙,會否忘記母親節?C ALLStar四位男孩不為母親節禮物而苦惱,因他們明白母親最希望與兒子共享天倫,身外物相比親子情確是微不足道。或許「真的愛你」真的很難說出口,C ALLStar訪問當日便以歌聲,表達對母親的感謝與關懷。「請准我 / 說聲真的愛你!」

 

記:踏入五月母親節將至,除了忙工作,有否計畫如何與媽咪慶祝?

KING

 

KING:同媽咪做番細個先僧會做既野,拖住手行街,(咁大個仲拖住手行街?)係母親節先會拖住手,大家好開懷去講出心底說話,了解媽咪既想法,同時表達自己既諗法。溝通好重要,因為媽咪眼中仔都係好細個,透過溝通可以俾媽咪知道自己「大個仔」,思想成熟左。

 

 

 

JASE

 

JASE:呢個問題係難答.…..其實講真一齊食餐飯都好開心,入左行佢地就好似成變左我「屋企人」(望向C ALLStar三子),反而真正既「屋企人」就好少見,所以首要係陪媽咪飲茶、食飯。反而買禮物真係好頭痛,因為我阿媽都幾「揀擇」,之前買左個「散子包」俾佢,但係佢話唔係幾岩,想要個大一點,可能買餸所以多「散子」袋,佢對禮物都好有要求。

 

 

安仔

 

安仔:  母親節會搞大食會,邀請親朋戚友到家中歡聚,曾經上過我屋企既朋友都會奇怪,點解可以連續3個鐘都咁嘈(邊個負責洗?)我係會負責幫媽咪洗哂所有碗,同埋最重要係食晒佢煮既全部餸。最鐘意食媽咪煮既滷水菜式同飲佢煲既湯,煮飯好好味。入左行少左時間同媽咪食飯,所以其實媽咪要既野好簡單,就係一齊食餐飯都已經好開心。

 

 

釗峰

 

釗峰:我會同媽咪食餐飯先,因為佢成日埋怨我平時工作忙,都無時間傾偈,而食飯偽一個最好既傾偈時刻。都會買D野俾佢地,主要都係針對健康,始終父母都有病痛隱憂。

 

 

 

記: 分享一下與媽咪共同度過的感動時刻。

 

KING:  大家之間曾經有誤會,可能係價值觀唔一致,令到事件處理方式有唔同。如果大家唔開心見誠,只會令到彼此距離愈來愈大。有一日我鼓起勇氣去表達自己,打破誤會、矛盾,被媽咪知道自己諗法,而佢又表達番自己,一家人最重要坦白,有咩唔開心一齊傾,可以作為媽咪既依靠。

 

JASE:  我同家姐都好鐘意唱歌,同化左媽咪都變得鍾意唱歌。最感動既一刻就係全家人一齊去唱K,其實我媽咪真係好鍾意唱歌,甚至比我更熱愛,佢會唱現代流行曲,最感動係大家有共同交流,有共同興趣。對於我唱歌,媽咪會俾意見,佢之前話過我唱歌唔好插袋,要拎番隻手出泥。

 

安仔: 首先自己心態要變一變。有次同媽咪飲茶便嘗試改變心態,發覺平時睇好多歷史書,但對於媽咪既過去就唔係好知道,果次就試下同媽咪開呢個話題,了解媽咪第一份工係點,爸爸係咪你第一個男朋友。開左呢個話題之後,從來未知道媽咪如此多經歷,覺得佢(媽咪)真係一個LEGEND。因為自己係孻仔,有好多野都唔知,要靠媽咪話我知。

 

釗峰: 我媽咪係會「孰」起個款,輩份觀念好重。突然有一次覺得自己大個左,係茶餐廳好似朋友咁傾偈,講下工作辛苦、生活壓力,我係反過來安慰佢(媽咪),果刻覺得原來只要唔當佢係媽咪,當佢係一個好親密既朋友,就會有好多化學作用,原來媽咪有軟弱時候,有些時候會當我係朋友去問意見。

 

記: 有甚麼心底話想同媽咪講?

 

安仔:  媽咪唔使擔心我啦,我大個仔啦,識做好多野。想去旅行就去旅行,想打麻雀就打麻雀,至緊要開心。I LOVE YOU!

 

KING: 呀~~平面電腦UDATE左呀,快點去買啦~

 

JASE: 活左廿幾年唔知講咩好,最想都只係媽咪開開心心。

 

釗峰: 阿媽知道你而家好少擔心我,因為你知道我大個左。我會努力工作,家用一定唔小得,我會緊記。同埋,會多點打電話俾阿爸。

 

後記:長不大的孩子

訪問中C ALLStar四子談及母親爆出不少笑料。安仔笑言母親總為他帶來一大袋紙巾,形容媽媽「成日以為自己身處荒島」。JASE的母親愛唱K,亦常給他意見,他鬼馬模仿母親:「我個仔唱歌有種氣場」。釗峰與KING透過言語及行動積極打破母子間的隔閡,以好友角式重新了解媽媽內心世界。不得不認同釗鋒一句「所有母親眼中孩子都長不大」,不是她們瞎操心,卻正是「愛操心」,因為世間上再沒有人值得她們這般操心。


 

REPORTER: K-jai
VIDEO-RECORDING: 薰衣
MAKE-UP: MAGGIE
HAIR-STYLIST:[email protected] Corner
PHOTOGRAPHER & LOCATION: LOVE ACTUALLY STUDIO @ MEGABOX

K仔
熱血編輯部成員!