【購物日誌】牛棚新居之淘寶飯枱 + 吊燈 *開箱文*

Posted on February 13, 2018 By       1,187

taobao_table

網購我最常去嘅絕對係淘寶,成日都有一句說話掛喺口邊「一切盡在淘寶」,淘寶嘅世界乜都有。當然啦~淘寶貨唔係一定全部係劣質嘅,所以每次購物前,除咗我會睇價錢之外,都會睇下賣家係咪皇冠級、想買嘅貨物有冇買家留好評/ 點解負評先再決定買定唔買嘅。

今次因為搬新屋,我係大屋搬細屋嘅~所以我都有唔少嘢喺淘寶買落嚟,由細小嘅收納用品至到傢私(飯枱)、燈我都有買返嚟,伏同埋唔伏嘅都有。

而呢一篇我就重點分享返我淘返嚟嘅吊燈、飯枱啦。

分享咗好物先,就係和牛B間房嘅燈,充滿童趣嘅房燈。佢同我一樣,好鍾意動物,所以我為佢揀咗一盞簡單得嚟,又好有趣嘅動物燈。

簡潔嘅燈可以好襟興,而且容易清潔打理,方便換燈膽都好重要。我哋揀嘅呢個動物款,我見香港都有,不過香港貴差唔多10倍價錢,而我淘寶價RMB¥286 (未包運費)。價錢平一大截,所以我就大膽地冒個險淘咗返嚟啦。

呢個款有3頭、4頭、5頭,但和牛B間房唔係好大,所以我哋揀左3頭款嘅吊燈,已經好夠光。

評價: ★★★★★ (5星為滿分)
發貨速度 + 物流快、實物同相片一樣、無色差、無走樣、無臭味、價錢超值呀。

運費: 
由於我唔想經過集運又繁複、冒住被整爛、又耐嘅過程序。所以我就順豐到付運費直送香港,超級的快,我諗只係2日就送到我手,運費大概HKD68左右。

小貼士: 
淘寶買燈之前,最好問清楚賣家,香港係咪可以用得到。因為例如LED燈咁,有啲店出售嘅LED燈香港未必用得到o架,所以買之前記得同賣家溝通清楚先呀。
同埋,淘寶買燈當然安裝服務就包唔到俾你,要自己/ 裝修師傅幫手安裝埋啦。

淘寶天貓店

淘寶飯枱

點解我會決定喺淘寶淘張飯枱返嚟呢? 原因係我想搵一張小巧得嚟又可以收納餐椅、又可以變大嘅飯枱。
可以話呢啲枱好普通啫香港都有啦,但我嫌香港有得買嘅款式當收納餐椅之後,外型好唔靚,所以我就上淘寶睇。於是就俾我見到佢啦,仲有我鍾意嘅粉紅色,可以襯返開放式廚房嘅粉紅色嘅雲石台。

一套一張摺疊餐枱配四張餐椅RMB¥328 (大概HKD400)未計運費。
重點四張櫈用完之後,可以放返入飯枱底到,而唔會影響外觀。淘寶店分享嘅實物圖,如果櫈唔收納返入枱底,仲可以多個儲物空間添。
所以我終極冒咗個險淘咗佢返嚟,同樣我都係選擇直接送落香港,原因一樣。運費HKD457,所以成張台都係HKD857,都仲平過香港買嘅款。

唔打開兩邊摺疊嘅板,收埋晒尺寸只有60cm x 40cm,超級慳位!!

評價: ★★★☆☆ (5星為滿分) 其實我想俾3.5分
- 整體顏色無色差,我鍾意嘅顏色,外型同電腦睇嘅一樣
- 無臭味
- 配備足夠嘅螺絲及螺絲批
- 每一層層板都有保護膠包住

- 附有一張彩色印刷嘅組件圖

- 配件有用透明袋入住,不過可能運送過程太多碰撞,所以撞到散晒,要慢慢執返齊

- 唔滿意嘅地方係,我買之前已經同賣家講明要包裝得好啲,因為送香港好遠,驚件貨會爛。結果嚟到,包裝非常之求其,好彩配件冇缺少到。

- 台面一角爛咗一小角

- 台、櫈嘅角位真係好尖,所以我之前需要額外買3M保護膠再包邊
- 六角螺絲竟然有一粒係密窿,好彩都有配備Spare零件,否則我要去五金舖到配。

- 配件與配件之間嘅裝崁嘅對點,唔一致…所以要兩個人一齊合力先可以砌好張台。

砌好咗4張櫈,櫈面剛好俾一個體型中等嘅成年人坐。

摺疊台打開晒之後,120cm長,都足夠8-10個大人圍埋打邊爐食飯呀。

淘寶飯台購買連結

今次介紹嘅產品,大家覺得點呢? 張飯台係伏定係唔伏,就睇你點睇。雖然上面我有彈,但係我係鍾意張枱嘅,因為佢外型靚,所以其他唔好嘅嘢,我會忘記咗佢

————————————————–

歡迎聯絡我&和牛B: [email protected]

Facebook專頁: 和牛B嘅成長專頁

Instagramwagyubmami

Momo
一直不喜歡小孩的我,突然有一天我很想和老公擁有屬於自己的寶寶。半年內,我便有了屬於自己跟老公的小寶貝。從懷孕到寶寶誕生,這段時間改變了我很多!從不喜歡,去到很喜歡,每天都用心去愛孩子及家人。藉此分享懷孕、育兒心得。