【嘉湖海逸酒店之旅】體驗聖誕溫馨家庭樂

Posted on December 13, 2017 By       2,028

暑假我地都已經去左北海道暢玩,所以嚟緊聖誕都應該留港了,其實香港都有好多好玩嘅地方,所以依家就努力搵下有咩好玩地方,等小小豬一放聖誕假期就去玩(其實….我地兩母子都係好貪玩呀)!

雖然我地嘅聖誕節目仍然係計劃中,不過今日就先嚟一個兩日一夜嘅小渡假,因為我地三口子應邀嚟體驗嘉湖海逸酒店嘅「聖誕溫馨家庭樂住宿計劃」,開開心心享受一個週末啦~

小小豬玩樂短片 ~>

有得住酒店小小豬就真係最開心(因為又可以跳床嘛),另外知道可以整杯子蛋糕製作班同埋聖誕特備戶外活動時,佢就更加興奮,一早起身就要趕住出門口,好想快啲入天水圍嘉湖海逸酒店呢!

CHECK-IN後我地就上房間放好行李,一打開房小小豬就即刻尖叫起嚟,因為房間超大呀(註:我地今次入住係標準套房,需另加$400)~

由於三人入住,仲有一張好大嘅梳化床添~

房間內仲設有飯檯、書檯同小型廚房,小家具仲好齊存添~

房內仲設Handy Phone,除左為遊客介紹旅遊熱點之外,我最欣賞就係可以做埋WiFi,咁係酒店範圍內都可以上網啦~

每一位入住嘅小朋友仲可以收到一隻可愛聖誕熊仔呀~

休息過後就當然係去玩時間,先嚟比較文靜啲啲嘅「聖誕小廚神」,跟住師傅學佈置靚靚聖誕杯子蛋糕啦~

今次分別係整聖誕老人、聖誕樹同埋雪人,其實同類嘅活動小小豬都試過,不過今次又嚟一個大個仔表現,大部分步驟都係佢自己做,只係得晒難嗰一部分要DADDY幫手~

今次又真係估小小豬唔到,每個步驟都叫跟到(當然唔係整得完美啦),仲好專心又努力去整,所以我覺得佢嘅製成品係整得非常靚呀~

心急豬掛住去玩,所以就請師傅包好蛋糕留待晚上回房間慢慢食啦~

靜態完就當然要去大放電,嚟到戶外大玩三項聖誕特備活動~

先嚟我是小車手,依個絕對係車控豬最鐘意一環節,佢一坐上車就左穿右插,仲學埋DADDY平日渣車嘅動靜,見到都真係幾好笑~

渣完一款又一款,佢真係好鐘意渣車呀…哈哈哈~

之後就轉戰兩大充氣設施(充氣滑梯及彈跳糖果城堡),繼續大放電~

玩到攰我地就回房間休息一陣,之後就去食晚餐。晚上我地就去食酒店自助餐,今次主題係「極尚和牛海鮮盛宴自助晚餐」,有好多肥嘟嘟又勁鮮甜嘅生蠔、超多膏嘅麵包蟹、即燒嘅和牛串,真係超級美味,不如去片睇下啦 ~>

 

食飽飽有個小朋友唔願瞓,所以就去KID’S CLUB玩多陣先啦~

 

雖然地方就唔算好大,不過一個波波池都足夠小小豬玩唔停啦~

終於玩到冇晒電,攬住聖誕小熊覺覺豬啦~

舒舒服服瞓醒覺,我地就去嘆個豐富嘅自助早餐。早餐嘅款式都算多,一般嘅中式點心、炒麵、蜜糖星星、薯餅同埋芝士都係小小豬最愛嚟呀~

早餐過後,我地又去到兒童室外遊樂場,等小小豬作最後的放電,然後就CHECK-IN離開了~

話咁快就過左兩日一夜渡假之旅,有得玩小小豬就緊係開心仲玩到唔想走添。不過間唔中去個小渡假都唔錯,大小朋友都可以叉叉電,人都輕鬆啲呀!

KinseyMaMa
一切以小小豬為中心,讓小小豬擁有一個快樂的童年為目標。同隻百厭豬一齊整嘢食又周圍去玩, 記錄我們這一家嘅生活傻事,讓大家可以陪同小小豬一起成長。