【媽媽谷別認真】啱聽就聽,唔啱聽咪算囉!

Posted on December 7, 2017 By       2,350

雞蛋仔-157

相信各位媽媽,你地點都有入過媽媽谷吧?嶠媽陀芊嶠,第一胎,但竟然冇諗過要入媽媽谷,直到芊嶠半歲,先無意中入左大谷,之後再有同年同月同日媽媽搵我,我先搵到同日谷添!其實開頭入谷,咩都唔識,係直至參加左半歲Party,先開始同啲媽媽熟落。

而家芊嶠快三歲,都仍然有幾個媽媽keep住有出來玩。由開始加固,學反身,學企,學行,學跑,每個階段都總會有小朋友先學識,有小朋友學得慢,當每次有媽媽post野出來,大家就會好擔心,係咪自己個b有問題,點解仲未識?但其實每個小朋友學習環境唔同,有啲可能因為有哥哥/家姐,佢地可能又會學得快啲,所以何必太緊張?

到第二胎,嶠媽我大肚就已經搵同月嘅媽媽谷,為嘅其實係想生左之後搵同日谷嘅朋友。開頭細佬係5月預產期,所以就入左5月谷。但每次谷嘅活動我都冇參加,因為始終仲有芊嶠要帶住,唔係咁方便。咁我都算係谷入面嘅活躍分子,每每有媽媽提出問題,我都會用我嘅經驗去作分享,但當然我唔會強迫人跟我個套啦!但唔知大家有冇遇過一個,永遠都係得佢講冇人講嘅媽媽?佢分享嘅就係啱,總之佢一睇到唔啱嘅,佢就會出聲話你,然後講佢點點點。

其實我分享唔係一定要人認同我,我只係以我生左一胎嘅經驗來分享,當然我可能第一胎都錯,第二胎繼續錯,但我冇強迫大家一定要聽我信哂我。我只係一個普通媽媽,我唔係醫生,我唔係護士,唔係老師,唔係營養師,我講幾多都好,都唔代表我一定啱。建議大家就算在媽媽谷問左意見,都唔好信十足,擔心或緊急的話,都係去問返專業人士啦!

其實嶠爸都有叫過我,唔好係媽媽谷講咁多野,分享咁多。因為人地啱聽嘅就聽你,唔啱聽嘅就會話你,萬一我錯左又點呢?既然唔係有十足把握,何必比咁多意見?唉!我其實已經退左5月媽媽谷,一來細佬4月出左世,二來係5月谷有過兩次不愉快經歷,都唔敢再係個到分享啲咩!

希望有入媽媽谷嘅媽媽們,大家都千萬要記住,每個媽媽嘅分享都純粹係經驗分享,佢地嘅經驗之談唔代表一切,請別太上心。愈在意,只會增加吵架機會。所以奉勸大家一句,啱聽就聽,唔啱聽就算啦!

芊嶠與細佬·雞蛋仔
我育有一仔一女,芊嶠和劻霖,芊嶠出世後,就成為左全職媽媽,在陀劻霖時更在Facebook開了專頁,開始寫blog,其後都有在其他平台分享,目的是想和大家分享兩姊弟成長趣事,與大家分享親子好去處!