【做個小礦工】鞍山探索館 – 鞍山旮旯墟

Posted on November 17, 2017 By       1,816

話說大半年前小小豬睇THINK BIG節目時,其中有一集係介紹鞍山探索館,佢見到節目入面嘅小朋友學做一個小礦工,佢都不知幾有興趣,仲叫我帶佢去玩。難得小小豬有興趣,我當然好樂意帶佢去玩,不過原來參加活動係需要自行組團,每團最少都要10個人,所以就冇得去玩了。

見佢地將會舉行「鞍山旮旯墟」,有得報名參加礦工學堂同埋導賞團,正正係小小豬最想參加兩項活動,所以就即刻登記報名,帶小小豬嚟體驗做個小礦工半天啦~

第一次嚟都唔多識路,跟住指示牌就慢慢行去啦~

大約行左八分鐘(係我慢慢行啫),終於都到左鞍山探索館啦~

 

時間剛剛好,我地就即刻去報到,準備開展小小豬期待而久嘅小礦工之旅~

第一個活動就係礦工學堂~

首先就係觀察下礦石同普通石頭嘅分別,原來礦石係會有一層閃閃嘅石粒粒呀~

之後負責哥哥就借手機顯微鏡俾小朋友睇清楚閃閃嘅石粒嘅表面~

顯微鏡下嘅礦石真係好靚,小小豬話有點似月亮呀~

礦石除左靚之外,仲帶有磁性,可以吸住磁石粒添~

體驗左兩個小實驗之後,當然就到聽故事時間,聽負責哥哥姨姨講解採礦歷史~

之後小小豬就到左第一個好想參與活動,就係可以親歷體驗採鐵沙。雖然都只係少少嘅鐵沙,不過各位小朋友都好認真,小小豬就更加,因為佢話好擔心採唔到鐵礦,所以全程超認真咁去做…哈哈哈~

有DADDY幫手,咁就可以順利完成,不過…其實個磁石吸住啲鐵礦又幾靚,有啲似花花呀~

唔覺唔覺我地就體驗左一個鐘嘅礦工學堂,我地製作埋礦工工牌之後,就可以放工啦~

休息一陣之後,我地就出發參加另一個活動,就係主題導賞團~

初時我以為個導賞團係鞍山探索館附近,但原來唔係咁簡單,要行去另一個山頭入面先可以去到礦場。既然報左名就當然繼續,所以三口子齊齊跟住導賞團員帶我地行啦!

不過,一邊行一邊聽住姨姨講解昔日礦工生活,真係可以對昔日礦工嘅生活了解更多~

其實昔日開採礦時水源都係受到污染,但無奈整條村都係得一個水源,所以當年礦工都被迫照飲。飲用受污染嘅水,再加上辛苦嘅採礦工作,所以一般礦工生命都係好短暫,真係好婉惜呀~

礦工每日回家都會行過平安橋,比喻可以平平安安回家~

之後我地慢慢跟住導賞員,尋找礦洞遺址~

行左大約20分鐘,終於到左礦洞遺址啦~

我地依個礦洞係屬於240ML(即洞口位於海拔240米高),由於已經封左,所以係唔可以入去參觀,只可遠望入去睇下礦洞(記住千其唔好爬入去,因為真係好危險呀)~

嚟到依度,小小豬已經急不及待拎佢個磁石出嚟,因為到左佢最..最…最期待嘅環節,就係利用磁石搵出含有礦物嘅礦石~

小小豬好努力不停吸吸吸,搵礦石啦~

但為了保護天然環境,就算搵到礦石都記得唔可以帶走呀~

我地依個導賞團都大大話話行左差唔多兩個鐘,小小豬就極度享受,不過我就攰到冇朋友,所以一返到鞍山探索館,第一時間就入去礦工CAFE休息返夠本呀~

CAFE入面都有好多同礦工有關嘅擺設呀~

 

食物都係以體驗礦工生活為主,不過因為我地太晏了,好多食物都賣晒~

最後只可以食饅頭頂一頂肚(不過…..我都係想坐多啲….哈哈)~

其實今日都有好多攤位遊戲,不過因為間斷性落雨,所以好多活動都停左,大家都唯有迫入市集避雨,所以入面真係勁…勁….勁多人呀~

好唔容易先搵到依個兒時玩意俾小小豬玩一陣~

 

其實我地都未行夠,不過因為見好大舊黑雲嚟緊,為左可以安全渣車離開,所以我地就準備回程了~

 

今日小小豬都叫做體驗左佢最鐘意嘅兩個活動,所以佢都應該係好滿足,但就因為天雨關係,我地都未行晒整個探索館,有啲兒時玩意都未玩,有少少未盡慶啦!(亦都因為太滿足,所以不停叫我再帶佢嚟參觀)

我會密切留意鞍山探索館資訊,當佢一有活動舉行時就再帶小小豬嚟玩多次,難得佢鐘意,又係一個可以學到知識,又有意義嘅地方,我絕對唔介意報名嚟玩多次呀!

 

溫馨提示:

– 由於始終都係會行山路,那條路都唔係平坦,所以唔太建議太細嘅小朋友去參加,始終小朋友安全係最重要嘛!

 

KinseyMaMa
一切以小小豬為中心,讓小小豬擁有一個快樂的童年為目標。同隻百厭豬一齊整嘢食又周圍去玩, 記錄我們這一家嘅生活傻事,讓大家可以陪同小小豬一起成長。