【爸媽手記】小孩的自信不是從責罵中提升

Posted on October 20, 2017 By       3,269

2297_14918841295KbH

前幾日收工班個陣,正當我拖著疲倦既身軀慢慢步向巴士時,

係遠處望向巴士站已經看到一位媽媽與一位小妹妹既身影。

到站之後,看到媽媽當時正揹著小弟,

而小弟則正在熟睡之中,小妹妹就手牽著媽媽,但就頭耷耷咁樣既。

 

直到巴士到站,佢地們都坐低左。

係燈光之下終於見到了小妹妹既樣,

只見小妹妹一臉傷心、委屈既樣子,依然一直低著頭。

媽媽突然對住囡囡怒吼左幾句:

「點解你會咁無用架?你唔可以自信一啲嘛?

你就唔可以有自信啲,相信自己多一啲咩?

你無鬼用架,邊個會學似你咁。

你講你係咪無用呀,你都唔似我同爸爸咁既。

成個無用鬼咁!」

 

我當真係俾眼前媽媽既舉動嚇左一跳。

 

當時心諗:好唔好上前同媽媽講唔好咁同小朋友講野同請媽媽冷靜啲好呢?

但我又怕被媽媽怪我太多事,

所以我並沒出手相救小妹妹,

但我心裏不禁替小妹妹感到難過。

 

我個下都係度諗:

點解媽媽會咁樣同小妹妹講野架呢?

咁樣其實對小朋友既傷害好大。

 

縱然小朋友有錯、有不足之處作為家長亦應該花多一啲時間去教導,

而唔係以責罵去強行令小孩改變。

 

其實就媽媽既話語而言,

係聽得出媽媽係想小妹妹有自信啲,

能夠憑自信去做決定。

 

其實想小朋友提升自信係有好多方法,

爸爸媽媽可以從生活細節上慢慢入手都得,

而唔係以責罵來令小朋友變自信,

相反,責罵只會令小朋友慢慢信以為自己真係一無事處,係無用鬼添。

到時爸媽後悔就已經太遲架啦!

 

講到尾,最主要其實都要爸爸媽媽都要對小朋友有信心,

小朋友自然會感受到爸媽對自己既信任,

同時亦要多同小朋友作溝通同了解,

自然就會事半功倍架啦。

 

我唔敢講自己係個一百分媽媽,因為我亦都係「學習中」,

但我願意同小JM一齊學習,一齊嘗試及互相了解。

 

小JM其實算係一位慢熱既小朋友,

每每遇到新既事物或人事,都要用上一段小時間去適應及調節。

但小JM絕對係一個喜歡學習既小B,

因為每次見到我或者爸爸做某件事個陣,

小JM都會模仿。

雖然有聲音話怕小JM會打爛野、倒瀉野,

但俗語都有話「人唔錯過又點知道錯」呢?

咁錯左一次,教返好就可以啦嘛。

仲可以從錯唔中學習添,

久而久之,自信就會慢慢咁建立起來架啦!

 

其實想要幫小朋友去建立自信都唔太難,而我同小JM爸就有以下既小小心得:

 

1.) 要對小B有信心,咁樣亦有助提升小B既自信,令小B相信自己都做得到。

 

2.) 要俾多啲正面訊息小B,令小B可以有快樂喜悅既心,並從中教會小B要懂得感謝別人。

 

3.) 唔好經常否定小B們的意思,試著讓小B順著自己想去先去嘗試,成功後可以加以鼓勵;

如遇上問題或失敗時,爸爸媽媽則可以從旁作協助,幫助小B解決問題。

最重要既一點係爸爸媽媽要肯定小B們既努力及付出,與小B一起享受參與過程,

千萬不要將著眼點放於「結果」。

 

4.) 唔好將小B同其他既小朋友去作比較,畢竟每位小朋友都係獨有既,

長短處當然亦有不一,以免因此而令小B受到困擾或傷感。

應該好好發掘小B既獨有特質,從而啟發小B既潛在能力,為小B建立信心既基礎。

 

5.) 試著引導小B講出自己感受、喜好等,讓小B能夠坦誠面對自己既情緒或內心所想,

爸爸媽媽可以引導小B從「YES/NO」開始面對自己既情緒感受變化,仲可以從而增加對小B既了解添。

 

6.) 嘗試多加讚賞小B,令小B知道自己可以做得到,從而令小B更具自信。

 

7.) 切忌不要過於嚴厲責罵或責備小B,更加不要因為被怒火攻心而說出一啲傷害性既說話,

爸媽應當先冷靜,再行慢慢耐心教導小B。

 

8.) 試著教導小B接受自己既不足,爸媽不妨嘗試慢慢引導小朋友講出心中既感受,

再耐心地開解及加以說明,希望小B會明白「人無完美」,讓小B試著去接納自己既不足,

並坦誠與爸爸媽媽、朋友講出自己既想法。

小分享:

曾經我地買過一個玩具想教小JM疊高,

但係好多次都唔成功,

唔成功唔係小JM唔疊,

而係小JM度攪破壞,喜歡當你疊高之後就整跌晒啲玩具。

我地以為小JM唔喜歡呢件玩具,

誰知過左幾日之後,

小JM突然叫我地睇佢「表演」疊高高,

疊完仲係度拍手,

當然我同爸爸都有跟著拍手表示讚好。

之後仲一齊同小JM繼續玩疊高高啦。

 

其實好多時小B們都會有自己一套想法同感受,

未必係存心攪破壞或拒絕學習,

只係當下未想做相應既野而已。

 

我地做爸媽既最重要係唔好將自己既想法強加於小B們身上,

始終小B年紀仲細,好多野都未識未明,

先會需要我地去教導及指引。

有時小B們太曳難免爸媽真係會好激心,

但我地必需保持冷靜去處理,

以免因為理智線斷了而帶來對小B們影響一生既壞感受或影響。

小JM未必係最聰明乖巧既小寶貝,

我希望佢可以做到坦然承認自己感受,開心面對每件事就好啦。

一顆小小的自信心要慢慢咁長大,繼續愛笑愛跳既貪玩豬!

傑。斯與晴
80後情人節媽媽與元宵節寶寶。前Playgroup導師、現職Marketing Firm既新手在職媽媽,喜歡細數生活中與小JM既點滴動人時光,紀錄及分享育兒既小心得、幼兒食譜分享、親子旅行及購物分享。