【BKOL試玩報告】 日本人氣Namco室內遊樂場登陸將軍澳! 屋內砂浜海之子浪花一朵朵

Posted on October 13, 2017 By       3,802

NAMCO V3

得知日本人氣室內遊樂場《Asobi Park Plus》將於將軍澳開幕,已經好想去玩~ 多謝BK Milk既邀請讓貓町媽媽、小火子同火子爸於開幕日可以去試玩,發達啦,即刻睇下好唔好玩先!

室內遊樂場五大親子園區連其他遊戲設施如:擲彩虹,夾公仔機等的位置共佔地6000尺。室內遊樂場唔算大,但遊樂設施好有新意,爸媽同小朋友都應該會覺得有新鮮感,而且場內大都採用無毒物料,爸媽就最放心啦。

IMG_8938

IMG_8941

1) 玩沙區域 – 屋內砂浜海之子 & 堆砌沙池
小朋友最鐘意玩沙,呢兩個園區就可滿足小朋友玩沙既願望,遲d冬天無得去海灘都可以玩沙啦!”屋內砂浜海之子”入去之前要除襪,入到去可以踩住軟綿綿既沙,聽到海浪既聲音,仲有魚仔既投影,小朋友可以拎住個網捉魚,係幾過隱架!每30分鐘仲會有大魚出現,音樂就會變得激昂,當時小火子有少少被巨大既聲浪嚇到,但當大魚走左,浪聲變返細時,佢又再返入去玩啦~原來小火子對呢個遊戲既印象都幾深,因為夜晚沖涼時佢大力濺起水花,話係大魚經過,所以好大聲 ^-^ 所以貓町媽媽覺得玩永遠唔止係玩,小朋友從中一定有得著,可能是不同的體驗,或者是與爸爸媽媽開心既回憶,玩真係好重要!

IMG_8955

IMG_8937

IMG_8951

至於”堆砌沙池”區則有不同型狀既沙池組成,有大大少少不同既彩色模具,小火子今次鍾情於雪榚筒模具,仲整雪糕比爸爸媽媽食~可能因為觸感特別,小朋友都好鍾意玩沙,而呢隻沙叫white sand plus, 無須加水也可塑造出不同形狀,而且不黏手,之前小火子在澳門童夢天地玩過已經好鍾意!

IMG_8976

IMG_8977

IMG_8940

IMG_8939

IMG_8953

2) 想像之丘 – 轉轉樂 & 風之丘
“轉轉樂”好似玩兜兜轉咁,不過小火子無好認真咁坐而係跑跑跳跳,又去轉個轉轉樂 ,但就玩得好興奮!而”風之丘”呢個園區貓町媽媽係好欣賞既,好有日本遊樂場既感覺~首先,”風之丘”既外貌好吸引,好似眼睛又好似山峰,夜晚問小火子覺得果度似咩,佢就話富士山。旁邊亦放滿了紅色既軟綿綿長方體,至於點玩就由小朋友決定,係一個好好激發創意既地帶。小火子一去到就爬左上山峰上,之後又可以好似玩滑梯咁滑落黎,貓町媽媽都滑左一次,真係幾好玩! 去另外一個園區前牆身有d 膠管,又有d波波,原來呢個係好得意架,入d波波入管度,首先可以估下波波會在那裡出返黎,有時候如果波波卡住左,就要親子合作拯救波波,有趣有趣!

IMG_8944

IMG_8956

IMG_8954

3) 創作村 嬰幼兒遊樂區
“創作村” 係一個充滿木製玩具同色彩繽紛既空間,亦都係謀殺最多菲林(記憶體)既空間。首先第一樣見到既係車車陣,全部都係木製既車,船同路軌,小火子在呢個位置玩左好耐~行前少少,會有一個木製既樓梯,上面既空間有一排木製既人仔,小朋友可以用佢地堆堆砌砌,發揮想像空間。下層有度門可以入去,入面有木製收銀機及不同的木製食物,於是小火子便開心地化身成收銀員,與我們玩賣野遊戲。

IMG_8961

IMG_8962

IMG_8960

再行入小小會有小梳化,小餐枱,木製廚房同滿枱木製食物: 有木製蛋榚,pizza, 壽司等等。好靚呀!貓町媽媽也忍不住少女心爆發,同小火子一齊玩下先,一齊唱 “happy birthday to you….”,然後許願,吹蠟燭,對啦,其實媽媽自己本身也玩得很開心啦~最入面是嬰幼兒遊樂區,是供18個月以下幼兒探索玩樂的地方。

IMG_8957

IMG_8964

最後唔好玩漏收銀機前既畫畫位置,其實貓町媽媽是趁小火子與火子爸在玩時,自己不停在畫,顏色很鮮豔及流暢,家中可以自製這樣的一面牆畫畫牆嗎~ 然後牆上還有乾坤,就是安裝了不同的物料如鐡鍊,毛刷,滑輪等去刺激小朋友既觸感,這在外國是很流行的,有心思!

IMG_8963

以上室內遊戲區,收費方面:
小童: 6個月-12歲 – $ 90 (首30分鐘),$60 (追加30分鐘)
成人: 18歲以上 - $ 50 (首30分鐘),免費(追加30分鐘)

比起一個價錢全日任玩的室內遊樂場是有點小貴,但好處是可以較好的控制人流,爸媽也可能較易控制玩樂時間。以今次試玩為例,我們在5個園區共逗留了大概1小時,相信下次再去玩應該都會預1-1.5小時。

IMG_8969

IMG_8959

與5個園區相連的還有其他玩樂設施,如擲彩虹,夾公仔機,籃球機等。只能說全部公仔都係高質素的,但可惜要中獎也一點都不容易,結果我們都是空手而回⋯⋯ 火子爸對於差一點點就可以夾到公仔始終不忿,好吧,我們一次再去挑戰啦~

總括而言,雖然收費有點小貴,但《Asobi Park Plus》相比其他室內遊樂場又可為小朋友及爸媽帶來些新鮮體驗,偶然與大小情人去玩下都無所謂啦~

如果你都想同 BK Milk 周圍去率先試玩,歡迎登記成為BKOL!親子王國現正舉辦BKOL選舉,勝出者更可獲豐富獎金,立即參加啦!

http://bit.ly/2xK6H1u

貓町媽媽
愛文字,愛貓,愛手作,希望趁小情人(阿仔)還願意黏在身邊的時候,可以拖著他的小手遊歷更多地方。 相信成為快樂媽媽才可以養育出快樂的孩子,所以深信要不斷學習,同時亦要繼續貪靚才可以成為自信快樂的媽媽。