【澳門短遊】功夫熊貓親子房間 澳門喜來登好玩渡假

Posted on October 13, 2017 By       1,096

1172694193_m

自從住過宜蘭啲親子民宿之後,一直對童趣滿分嘅親子房間念念不忘。今次過澳門都想搵番啲類似嘅房住下,重拾住宿樂趣。澳門喜來登酒店有款專為一家大細而設嘅房,上網睇到已經一見鍾情喇!等咗咁耐,終於可以親身體驗一下,心情實在係難以形容咁期待呀!


一入到房,晴朗見到滿地氣球已經十分興奮喇!*o*


都睇唔清佢哋點玩,淨係知啲波飛嚟飛去,一片混亂~ XD

咦!睇清楚啲,原來床上有條橫額串起咗晴朗英文名字,好窩心呀!~


跟住又響碌架床上面上上落落,好似穿梭巴士嘅上下兩層咁,認真忙透了…. ^^”’


淨係拋波都已經有排玩喇!情緒高漲玩到好嘈,希望唔會對隔離房構成滋擾啦!^^”’


酒店除咗為晴朗送上兩隻功夫熊貓公仔外,枱上嘅禮物都係屬於佢哋㗎!加上手寫嘅心意咭,呢份暖意簡直係超乎預料呀!太貼心了吧!


鏡子中可以見到晴朗仍然忙於「上落巴士」…,不過係咁啱影到啫!XD

我係想介紹房內有埋兒童枱櫈、衣櫃,仲有浴袍呀!


入去洗手間環顧一下,發現有好多得意嘢都係特別為小朋友而設~


有荒失失奇兵系列嘅牙膏、牙刷、洗頭水、沐浴露、潤膚露、肥皂,就連毛巾都摺成一隻狗仔咁,好可愛呀!


亦有防滑櫈仔可以畀小朋友企高嚟洗手,咁就唔駛大人幫手都可以輕易自己搞掂啦!


親子房其實係由兩間酒店房相連而成,小朋友想搵大人只要通過中間度門就可以過大人房喇!好方便!


房間好大,設計有啲classic味,同兒童房風格好唔同。簡潔舒適,好舒服~


洗手間同兒童房果果基本上係一樣,唔同嘅係冇咗啲兒童佈置,感覺上grand啲,好有渡假feel呀!


晴朗響自己間房玩完一輪,又要走過嚟跳下張大人床,冇時停,想拆咗間房咁囉!XD


玩到攰就攤響梳化度抖,真係識嘆喇!望住朗朗呢個模樣,有啲唔捨得佢添!事關三日兩夜嘅澳門之旅,朗朗就去到呢度,因為第二日要番學嘅關係,將會跟隨晴朗爸爸先行返港。我哋玩嘅時候會掛住你㗎喇!XD

送走咗難捨難離嘅朗朗之後,我同晴晴就向巴黎人嘅水世界出發,仲約埋好友會合添!晴晴有好友相伴,冇咗哥哥陪玩都冇問題啦!想睇埋我哋嘅玩水情況,可按以下連結~

【濕身暢玩】水世界@澳門巴黎人

會合好友後,就準備啟動我哋嘅豐富晚餐喇!唔講真係唔知原來喜來登酒店有間火鍋餐廳經常座無虛席,點解打邊爐會有咁強嘅吸引力?按以下連結就一清二楚!

【新鮮好味】鮮Xin亞洲火鍋 @澳門喜來登酒店


食飽番到房,又係大鬧房間嘅時候喇!好友見到成地都係波興奮不已,證明間房嘅威力有幾大呢!


波…全部都係波…通處都係波,我覺得間房越嚟越亂~^^”’

小朋友總會諗出唔同嘅玩法,睇怕今晚有排都唔駛瞓喇…


晴晴同朋友仔繼續keep住hyper,精力無界限~


原來一大堆氣球係可以咁好玩,小朋友嘅可愛之處就係易滿足啦!^^


將啲波排列得整整齊齊,又幾靚幾有創意喎!@[email protected]


佢哋仲走埋過去大人房喪跳,好喇好喇!要預備沖白白同休息㗎喇!^^”’


但好似仲未夠喉,要玩埋禮物大晒冷!攤晒酒店送嘅禮物出嚟!見到都開心呀!


夜晚亮起燈後先發現兒童房有盞小狗落地燈,好靚!晴晴會不時走過去同狗仔傾計,好搞笑!穿上小拖鞋同攞埋件「荒失失奇兵」浴袍去沖涼囉!~


估唔到浴袍同拖鞋又幾啱身喎!哈哈!

本來想同晴晴響大人房瞓,但經過兩個小朋友嘅商量後,決定換房~^^”’

晴晴較為鍾意兒童房,朋友仔又好禮讓咁唔介意調動~

結果朋友仔同媽媽瞓大人房,晴晴同我就瞓兒童房喇!

唔知係咪房間佈置得靚啲會好瞓啲嘅關係,晴晴同我都發咗個好夢呀!^^


天一光,又係豆叮們出動嘅時候喇!開窗廉欣賞一下酒店附近嘅風光好舒服~


跟住就當然繼續大鬧兒童房啦!唔知係咪拋波拋得耐咗,轉咗玩拋公仔喎!^^”’


由兩間房之間度門望入兒童房,何其凌亂呢?證明咗小朋友都盡情享用房間設備喇!Hohoo~


喜來登酒店外貌優雅得嚟帶一點古典味,真係冇諗過內裡會有咁特色嘅親子房,有機會都想再嚟過呀!

酒店在佈置上花咗唔少心思,而且仲送咁多小禮物,晴晴同朋友仔都開心到震呀!房內無論肥皂、牙膏、牙刷、沖涼套裝 防滑櫈、枱櫈、拖鞋、浴袍以至床都悉心為小朋友而設,係一間真正由小朋友做出發點嘅房間,終於可以搵番親子住宿果種滋味,我哋大人都覺得好開心呀!兒童房啱晒細路,相連嘅酒店房就啱大人,咁就大人同小朋友都冇投訴啦!兩間房相連起來,空間感好大!同小朋友都住過唔同嘅酒店,但有親子特色嘅都係第一間,見到佢哋比起平時玩得更癲,就知間房好啱佢哋喇!真係住多幾晚都願!據聞酒店遲啲會換房間主題,期待新主題推出後,可以帶埋朗朗,一家人再來住多次呀!

澳門喜來登酒店 Sheraton Grand Macao Hotel
地址:路氹城望德聖母灣大馬路金沙城中心喜来登酒店
電話:(853) 2880 2000


 

晴朗媽媽
晴晴、朗朗是我的一對寶貝,就讓我和晴、朗一起為大家發掘更多親子玩樂資訊,那便天天都是晴朗天啦!(≧∇≦)