【沖繩親子自駕遊】海洋博公園 x 邊睇鯨鯊邊食晏 x 鯊魚館 Part III

Posted on October 13, 2017 By       2,358

unnamed

海洋博公園實在太好多玩、值得帶小朋友去參觀嘅地方。今次帶大家嚟到美麗海水族館裡嘅餐廳以及鯊魚館。

26217_1507606002FU2Z


美麗海水族館嘅餐廳「Ocean Blue」不得不介紹,如果喺香港海洋公園要睇著水族館入面大玻璃幕用膳嘅話,價錢相當和味。但如果喺美麗海水族館嘅話,要望住鯨鯊游嚟游去邊嘆美食嘅話,呢到真係超級平民價!!!


平民價一邊睇住鯨鯊一邊嘆飯。

食物方面主要以洋食屋為主,即有意粉、飯、炸物、甜點等。而最貴的炒飯大約¥565 (HKD40),另加一杯飲品以橙汁為例價錢¥204(HKD14),一個人只需大約HKD60內就可以慢慢用膳之餘,同時可以欣賞鯨鯊暢泳,真的超爽!但留意,餐廳以快餐點形式為主,而且座位有限,遊客唔好霸佔座位或坐喺度休息而唔食嘢啦。

以快餐形式,所以需要自行到收銀處落Order及取食物。


我哋一行有3個家庭3個兩歲大嘅小朋友。以下係部份嘅食物,價錢雖然平,但係食物質素都唔差嘅。

蕃茄腸仔意粉、香草意粉、炒飯、炸洋蔥圈以及炸肉丸。

  

鯊魚館

嚟到美麗海水族館嘅鯊魚館,館內營造嘅氣氛,令人有一種好神秘好想探索鯊魚嘅感覺。

入口旁邊仲有一大塊鯊魚皮。


重點近距離觀賞鯊魚,有魔鬼魚、、鎚頭鯊、大白鯊等。而且環境算光,睇得非常清楚。

超尖嘅牙齒、凶狠嘅眼神,睇見都覺得心寒呀!

呢個係一個解構鯊魚的模型,將鯊魚分成一塊塊,好似平時食三文魚扒咁打平砌,遊客可以一層一層咁睇,了解鯊魚每一個部位。

 

唔同品種鯊魚嘅牙齒骨,有大有細,不過全部都係尖尖嘅牙齒。

鯊魚(Shilky Shark)標本,第一次見到鯊魚嘅標本。仲有其他唔同嘅介紹,同埋鯊魚資料。

  

去到鯊魚館必影呀!! Like影相位!!

手信、精品館

行完水族館,鯨鯊必定會喺小朋友心目中,佔咗好大嘅地位。所以精品店入面有好多商品都係以鯨鯊做主題,好多好可愛嘅毛公仔、T恤、文具、食物類型嘅手信。

仲買到我嘅心頭好,蘇眉匙扣,超可愛呀!!!


我哋仲喺入面買咗好多手信,聽朋友講仲好好食添呀~~~

精品店門外有一部好似影即影即有證件相嘅機,其實佢係即影即有以水族館做主題嘅Postcard機嚟,¥500 (約HKD35)一次。

旁邊更有一部紀念金幣機,除咗有唔同圖案之外,仲有配件選擇,每項價錢都唔同,所以視乎你整啲咩,就入幾多錢啦~

打卡影相熱點
熱點一:往美麗海水族館方向的巨大鯨鯊石像。

熱點二:美麗海水族館正門口對出的海景。

嬰兒車

場內亦有嬰兒車借用服務,而且係免費嘅。只需要填寫上簡單資料,姓名、地址、電話就可以了。

停車場
海洋博公園設有多個停車場,重點係免費泊車!!
***戶外活動,記得幫小朋友搽密啲防曬、蚊怕水同埋飲多啲水呀。

總結
海洋博公園真係超大,除咗水族館之外好多地方都係要途經戶外,所以建議帶遮、帶帽、搽好防曬同埋搽定蚊怕水。

至於飲品,其實日本真係到到都有一部自動售賣飲品機喺左近,都真係唔驚會無嘢飲。不過如果小朋友太細嘅話,最好帶定足夠嘅水,又或者預早買定一支水到時溝。因為日本比較鍾意凍水,自動售賣飲品機嘅水一定係冰凍嘅水。

水族館裡的知識卡,當你行晒成個水族館就會收集到10張嘅知識卡。入面有重點介紹嘅海洋生物,據知去到手信/精品店仲可以加錢買一個專用嘅File入住呢10張卡,變成一本書仔。

 

當日回程嘅時候,仲見到彩虹,真係好幸運呀!

玩咗一日,攬住鯨鯊休息一陣先。

沖繩海洋博公園

 

地址:沖繩縣國頭郡本部町字石川424番地
網址:http://oki-park.jp.t.ms.hp.transer.com/kaiyohaku/inst/

Momo
一直不喜歡小孩的我,突然有一天我很想和老公擁有屬於自己的寶寶。半年內,我便有了屬於自己跟老公的小寶貝。從懷孕到寶寶誕生,這段時間改變了我很多!從不喜歡,去到很喜歡,每天都用心去愛孩子及家人。藉此分享懷孕、育兒心得。