【好奇心】一切都要抱「從什麼時候開始」的疑問

Posted on October 9, 2017 By       1,500

20171009_Curiosity

每一次上堂,小朋友嘅問題都會讓我思考不停。每堂都玩腦筋急轉彎,作為一個老師,回答問題係我嘅責任,也是畀學費以後,package包的。

當然只係講笑,小朋友嘅問題每一個都好珍貴。呈現一份未有被泯滅的童心,以及學習的動機。好多家長都會希望培養小朋友好奇心,令佢地係學習道路上,可以得心應手啲。其實只要我地唔拒絕孩子提出疑問,依一個已經係十分必要的要訣。聽起上黎好似簡單到我呃咗大家睇我寫嘅野,但我係街上面觀察到嘅,足以證明依個要訣有實行嘅困難。

就以就黎破產嘅反斗城為例,每次入到去總有一兩個小豆丁係度問依樣個樣係咩黎架?而你一定會聽過有爸爸媽媽會一臉不耐煩地答個小朋友「你唔需要知道」或者係「講咗你都唔識」。

家長一日對足依個「問題童年」咁多個鐘,真係再多心力都會透支,作為戰友,我係深表同情。奈何,我地要一字記之曰:「忍」依啲說話真係少講為妙!小朋友可能就咁抹殺一切對學習嘅熱情。

家長必須要知道小朋友本身就係好奇心嘅載體,根本唔需要培養,要嘅係好好保存。孩子提問大人,原因係我地都係小朋友眼中嘅「權威」,佢地會覺得我地年長所以有一定閱歷,可以同佢地分享經驗。可惜我地都心力交瘁,作為已經係社會打滾多年嘅成年人,我地都存在怠惰的心態,缺乏求知慾。所以要引導小朋友學習,家長都必須每事由「從哪裡開始」去探索更多的知識。作為孩子成長的同伴,我地都要抱疑問嘅態度,無論任何孩子有興趣想知道嘅事情都向事情本質出發。

例如孩子問:「點解爸爸你杯咖啡味道咁特別?」爸爸可以由咖啡豆係點黎開始同小朋友一齊去求證,因為疑問的態度會引申出不同的探索可能,孩子會由咖啡豆的種植開始,漸漸接觸到佢週邊嘅資訊,然後我地可以再向孩子提出更多小疑問,要孩子習慣「擴散性思考」,將因果串連。

如果每個小朋友的問題我地都認真對待,並且收起我地成年人覺得一切都要概括承受、理所當然的陋習,孩子會發覺學習的趣味,並且日後遇到更多問題的時候,都可以從記憶寶庫中,將學返黎嘅所有資料活用,舉一反三。

我地不得不承認,學校的教育在於「灌輸」,但真正的教育應該在於個人主動性。因此,我地要保守好小朋友每一個發問嘅機會,因為學習從來都唔需要你講我聽,而係獨立探索、互相影響。

Canace.Y (ICHA繪畫分析師)
藝術樂園投入推廣新形式的藝術教育,希望透過不同的題材和主題介紹藝術教育的多個可能性和分享工作室內與小怪獸們的日常!