【助產士親解】解構產科神秘面紗—老公陪產(上)

Posted on October 11, 2017 By       2,245

1011v12

對好多港媽黎講,老公可以陪產幾乎成為入產房生仔最重要嘅事!而呢條題目都係本執媽考讀助產士入學試嘅題目。好多研究都講過,丈夫陪產為孕婦提供大量的心理支援、令到孕婦覺得待產時間較易過、增進夫妻感情、讓爸爸體會妻子生產所承受嘅痛苦、令爸爸更能感受角色轉變等等等。

事情有咁理想就好了!!!(笑)

有老公陪產的確係好,但老公入去陪產之前都要自己做好心理準備,評估下自己既能力!

點解咁講呢?生產嘅環境好多時係遠超乎爸爸想像架!

首先,你會有機會見到一個唔知係唔係你老婆嘅老婆!明明平時個老婆係乖乖女、施施文文聽聽話話,又或者係一個女強人、天不怕地不怕,但眼前果位一肚痛就尖叫、捵床捵蓆、叫到好似驅魔人嘅女人係邊個黎架呢?(笑笑)

有機會老婆仲聞笑氣聞到溫溫登登,好飲飲醉酒咁!爸爸呢個時候就成為一個好重要嘅角色喇!提供心靈支持、幫手抹汗、不斷讚老婆好勇敢好叻等等就一定唔少得喇!頭髮亂哂、眼線溶哂都繼續讚佢靚女就肯定架喇!咁樣你個老婆就會有勇氣面對肚痛架喇,當然唔係個個媽媽都一秒變驅魔人嘅,好多都可以控制自己嘅。

其次,就係爸爸有機會見到血腥場面!生仔正常都會出血,唔好彩嘅子宮收縮唔好、胎盤滯留等等仲有機會大出血添!加上如果有機會剪會陰傷口,果種血肉模糊加埋胎水氣味嘅場面,唔係每個爸爸都頂得順的!唔係血腥味咁簡單!所以爸爸係入產房前可以上網睇定生仔短片、個腦入面想像定會預見嘅畫面(可以去依度睇)!如果怕血可以淨係望住老婆個樣!唔好望下面發生緊咩事了!如果如有你聞到陣味想暈想嘔的話!慢慢坐返落去陪產果張櫈到!

千!萬!唔!好!死!頂!

千萬唔好突然間啪一聲跌落去地,姑娘都唔知救媽媽先定bb先定係爸爸先好喇!好忙呀!聽同事講試過有個爸爸想搵佢剪臍帶果刻唔見咗佢,原來佢係張櫈到暈咗塊面青哂!

港式執媽
港產執媽一名,香港出生,正宗香港是我家。志在分享香港產科所見所聞,同時分享產科知識,正所謂「知得多就驚得少」。