【助產士親解】產科公私院大比併 (下集)

Posted on October 10, 2017 By       10,083

Hospital V4

上篇講完環境同護士,黎緊講下醫院既靈魂!醫生同埋錢!

1) 醫生

私家:

當中不乏「月球醫生」同「星球醫生」,行外人應該唔明,係指佢地每星期或者每月就可以搵一球,即係一百萬,尤其係雙非年代!佢地唔理有冇香港身份証,一律接單,開刀嘅話閒閒地一日做十個八個,每個唔知幾多十萬,但執媽偏執地認為…… 香港淪陷嘅始作俑者除咗政府之外,都應該要計埋佢地一份囉

不過!佢地手勢係真心好同真心叻,因為絕大部分都係公立出身嘅有經驗醫生,閒閒地都十年八年以上,好多甚至做到副顧問醫生,或者顧問醫生,好多媽媽話邊個邊個大醫生開完刀完全見唔到條疤添!勁!

但係實在聽過太多太多個案,係私家book哂位,但孕期中間發生咗d唔順利嘅事,就比私家醫生連人帶b轉返公立唔受佢係私家玩lu

當時讀書miss講過,作為助產士,有責任對太太灌輸正確知識,比佢地知道「唔好無謂開刀」的重要性,但係某部份私家醫生就會冇原因地幫媽媽開刀,另外有d紅牌醫生,更加表明唔接順產case…

咁的確如果個醫生表明淨係睇傷風感冒,你冇可能迫果個醫生幫你醫肺癆架嘛,都係佢其中一種選擇黎嘅,no offence

公立:

公立醫生真係好!好!好!好!好!辛苦!!果種辛苦程度,即使我知道第時會搵好多錢,我都接受唔到自己嘅仔女去讀醫生!?行外人絕對想像唔到佢地嘅duty係幾咁違反人體極限,而家到到都唔夠醫生,走得嘅就走,剩低嘅醫生就要負擔哂所有case&女2一個月7 call 是等閒事!一個call 係代表朝早9點鐘開工(而好多時7-8點就要開始返黎巡房),巡房、入手術室、睇門診、再處理病房突發事情、收症,一直做到第二日嘅中午大約一點,仲未計工餘時間要讀書進修寫paper。無論幾有熱誠幾有併勁,累誇嘅身體真係會令人好想辭職,支撐落去只係靠果份使命同正義感,所以!請各位愛惜醫護人員!

2)價錢

私家:

分別會收醫生費、麻醉師費、兒科醫生費、手術室費、陪產費等等等,任何你諗到諗唔到嘅費用都有機會收,有讀者甚至表示有醫院會收「親子費」,即係我生個仔出黎,我去見佢,但要比錢!!!!

我真係第一次聽,通常都係一個package咁計,大約3萬至10萬不等,但係未計突發狀況、突然要緊急開刀、半夜要醫生返黎等等等,都要另外計錢嘅,而聽我個保險agent講有d好優越嘅住院保險係會包埋去私家生仔package, 但保費就會好貴,而有d私人企業嘅員工福利係會包埋去私院生仔嘅,詳情想知就要問返你嘅保險經紀喇。

公立:

合資格人士(有身分證)收費$120蚊一日,非合資格人士,冇做過產檢、冇登記過,收$90000一個package, 而大部份人士都可以透過申請援助/走數而唔比錢的(係呀!交稅就係咁樣用架喇)

3)支援

私家:

母嬰唔同房,放哂係bb房,探訪時要隔住個玻璃睇金魚咁。

淨係包生仔,但突然bb抖氣唔好、血糖低等等要見兒科醫生,麻煩另外比錢,如果有更嚴重既事情發生,就唯有轉送返去公立醫院處理喇。仲記得幾年前,有個香港靚女明星,生完bb抖氣有問題,就轉送左返港島區公立醫院留醫喇。

公立:

推薦媽b同房,可以等媽媽盡早開始餵人奶,但時間有限,可以教餵人奶既時間好有限!但相信我,我一直盡最大嘅能力去教各位媽媽,同時有好多母乳顧問團隊去教導媽媽餵奶。

邊科都有得refer, 無論媽媽產前產後突然間出現任何病徵,有需要都會轉介去相關部門,內科、外科、婦科、腫瘤科(啋)、皮膚科。

bb嘅新生嬰兒特別護理病房、新生嬰兒深切治療部、照燈、內分泌科、腦外科,心臟科、外科割包皮、腳趾重疊搵物理治療師、職業治癒師、生咗粒大痣搵皮膚科、生咗隻牙仔搵牙科,任何你諗得出嘅都有支援,但有還有,等幾耐係一個未知之數,你知喇,資源得咁多,政府仲話要cut資源,你懂的!

如果你問我呢個窮L, 我就冇錢去私家生架喇,但如果媽媽係以service行先嘅,又有鬆動錢既話,去私家都係唔錯嘅選擇黎嘅。

你地有冇試過比私家收好無厘頭嘅收費?可唔可以講出黎比我開下眼界,有冇試過去私家突然比人收多咗好多錢?或者保險claim唔到?

醫護人員真係好辛苦,唔好再小小野就報上新聞,高層是不會體諒我們的!

聽完咁多,你地會簡係公立生定私家生呢?

image1

港式執媽
港產執媽一名,香港出生,正宗香港是我家。志在分享香港產科所見所聞,同時分享產科知識,正所謂「知得多就驚得少」。