【助產士親解】產科公私院大比併 (上集)

Posted on October 4, 2017 By       12,163

hospital

好多媽媽一聽到我係執媽,就會問我,「到底去公立醫院生定私家醫院生好呀?」而我見網上都有d文章係媽媽生完之後再比較兩者分別,咁不如就等我呢個執媽比較下,睇下同你地心目中所想既有冇出入喇!

1) 環境

好多人都有一個感覺,環境一定係私家醫院靚過公立醫院喇!但經我親身走訪咁多間公私立醫院,發覺原來唔係架!

私家:

某d私院例如x灣xx安、x水x寶x、中xxx、九xxx會xx舊x等等,有返咁上下年紀既醫院,環境其實好一般架咋!

電梯大堂燈光昏暗、地板用舊式磚等等,但係就一定全部都係電動床。你知喇!生之前腰骨痛、生完之後會陰+恥骨痛,冇電動床都咪話唔辛苦呀!

咁當然好似 x田x安xx、xx地x和xx、某d翻新左既就梗係靚到酒店咁走喇,有reception走埋黎問你想揼中式定泰式呀 (講笑)

公立:

反而有d翻新過既公立醫院,例如xxx利x伯xx、xxx華xx、x灣東xxx呢d就真心唔錯架!

走廊寬敞、光線充足、床位同床位間一定放到櫃筒同一張櫈,咁我當然淨係講產科喇!內外科果d諗都唔都諗喇,加床加到去廁所門口已經算幸福喇!

咁未翻新果d梗係唔計喇,有d仲訓緊手動床!

迫爆起上黎訓加床架咋!想坐起身餵奶?坐起身食飯?會陰又撕裂痛,諗起都慘!

2) 護士

私家:

首先,產科護士一定係女人,冇男護士既,其次,靚唔靚好主觀既,但「天下間沒有醜女人,只有懶女人」係真嘅,經我觀察,私家嘅姑娘真係普遍靚過公立嘅姑娘,起碼望落去有化妝返工既佔一半以上,嘩!化個妝人都精神d喇!

想當年學生時代,我呢d公立小薯第一日orientation兩個鐘就開始落ward做野,而私家同學仔係有一星期orientation,其中仲有化妝班教埋添架!羨慕死一眾小薯

仲有私院姑娘個個都溫柔到極點,又笑容滿臉又nice!仲要係忙住都識笑!超nice!

公立:

而公立醫院姑娘當然都有靚女,但經我多年觀察,即使開始係幾咁明艷照人、天仙下凡,只要經過幾年輪姦式洗禮,剩低嘅只有眼袋、黑眼圈、粗大毛孔同埋虧到不能嘅身體。

明明私院姑娘都好忙好多野做,入院出院都好多,點解佢地可以咁靚咁明艷照人架呢?有冇私院靚女可以教下我?

可能因為忙、殘、累,公院姑娘面色都比較黑、講野比較大聲,同埋語氣比較倔強,但請相信我,佢地心地都好好嘅!

點解淨係比較外表?因為我地執媽個個都係拎同一個註冊護士牌,再進修同一個助產士牌,仲要係同一間助產士學校讀書,所以冇嘢可以比較,因為學嘅知識都係一樣,咁當然有人讀書叻有人比較差,但識嘅野大多數都一樣。

係公立同私家生過嘅媽媽可唔可以分享下,你地果次分娩經歷其間分別鐘意/唔鐘意d乜野?有冇d令你地好氣憤/好感激嘅事情?我都想學下野!

敬請期待下一集

image2

港式執媽
港產執媽一名,香港出生,正宗香港是我家。志在分享香港產科所見所聞,同時分享產科知識,正所謂「知得多就驚得少」。