【新手媽媽必看.詳文】寶血開刀生產全紀錄

Posted on October 17, 2017 By       2,612

21767950_423628618032120_5397404763694249488_n1

由2016年12月16日發現芊羽嘅存在,Wilma媽就同所有媽媽一樣,突然沈迷睇各大媽媽論壇。
關於張智醫生嘅激讚文經常出現,睇完之後再做research,知道張醫生係零負皮,就決定搵呢位醫生開刀接生。

小芊羽係喺長沙灣嘅寶血醫院出世嘅,當初揀呢間冇咩人諗起有得生BB嘅私家醫院都有四大原因:
一,張智醫生註診
二,同屋企只係5分鐘路程
三,香港人免費upgrade二人房
四,價錢超值

寶血、港安、法國呢3間醫院都係當時張醫生有掛單,經過2個星期research,就決定Book有好多優勝之處嘅寶血醫院指定張智醫生產檢同開刀喇!(等咗個半月,醫生先幫倒我做第一次產檢,期間搵咗另一位我做開婦科檢查嘅盧佩雲醫生睇住先)

咁言歸正傳,講返開刀流程。
由於Book咗7月20日朝早9點就開刀,所以醫生就要求我早一晚就入院做登記、檢查胎心等等。以下係手術前嘅程序:

19/7 8:00p.m.
-產婦先上3樓產科病房,去到護士站會有護士幫你安排入院手續(帶齊身分證、醫生俾嘅入院信、$6000按金收據),呢個時候姑娘會叫你先生落地下會計部交多2萬蚊按金。

-姑娘帶產婦去收症室,佢會問你一大堆問題例如BB出世會補邊隻奶粉(就算你打算餵人奶都要揀一隻,市面嘅大部分牌子佢都有得揀包括幾新下嘅Illuma)、BB會唔會喺寶血做埋聽力測試等額外收費檢查,簽文件,量血壓、度高磅重,然後姑娘會叫你瞓上床,有另一位護士會幫你修剪下體毛。

-做哂上面嘅嘢,先生都辦完按金手續,姑娘就會帶你去你嘅床位(Wilma媽好好彩有位去二人房,因為如果太full,醫院就安排唔倒二人房了)

-驗一驗小便check糖尿,換好自己睡衣,姑娘就會俾個夾手指你,要喺床上面check半小時胎心,同keep住會有人定時黎check血壓

-check完胎心大概係9點幾,就可以自由活動~但留意返探訪時間係朝早8點到夜晚10點,一到10點姑娘就會好準時趕人㗎喇!

*呢晚一定要沖涼,因為之後3晚你都唔會沖
*12點前好食多啲嘢,因為12點後係唔可以食嘢飲水!

20/7 7:30am
-產婦做好梳洗,換好手術袍戴好手術帽,姑娘8點幾就會要你瞓上另一張床準備被推去同層嘅手術室

-入到手術室出面有個area,會有手術室姑娘同你簽半身麻醉文件,麻醉醫生會同你打招呼~

-今次真係入手術室喇!!最緊張嘅時候開始,會有姑娘幫你過床,麻醉科醫生會叫你打側弓起背,然後喺背脊打麻醉針。因為凍一凍,我第一次不自覺地縮一縮,要再打過,所以記住做好心理準備唔好縮呀,其實唔痛㗎!

-慢慢你會feel倒下半身好麻,仲好想嘔!咁麻醉師會test下你係咪真係冇知覺,到麻醉成功,佢地會幫你插尿喉(揀麻醉後先插要加4百幾蚊),張醫生都入到手術室,就會叫你先生入黎坐你旁邊陪你。

-手術過程好快,你身邊嘅麻醉師、姑娘、醫生同你會不停傾計,你根本冇空間去緊張去到邊個step。手術開始咗10分鐘,醫生就會話:我地宜家會推一推你個肚推BB出黎喇!

-只係一秒,麻醉師一下就將BB推出黎,醫生就話:BB出咗黎喇!係囡囡!恭喜哂!

21766440_423628574698791_971243792671366627_n

-期間會有位護士不停幫你地影相,BB極速剪臍帶、抹身後,姑娘會捧俾新任父母影第一張合照

21767933_423628578032124_987771224431509899_n

-跟住護士就會請爸爸同抱BB出去,醫生就會繼續幫你聯針

手術完成,姑娘幫我地再影多張即影即有出院嘅時候俾返我地留念。媽媽就返病房休息,要到24個鐘後拆尿喉落得床先可以自己行去BB房睇BB同埋身親餵喇

成個手術過程都係20分鐘左右,完咗手術當日只可以食粥水,到第三日先可以食飯。

想餵母乳嘅媽咪可以同姑娘講,咁佢地就會提你每4小時餵一次(如果BB輕,兒科醫生會叫你每三個鐘餵一次)

22008228_423628621365453_8356701659320540509_n

醫院可以訂早午晚餐,不過因為奶奶每日送湯送飯過黎,Wilma媽淨係試過一餐午餐,都幾好食㗎!

而總括黎講,Wilma媽呢5日4夜都過得好愉快,出院當日因為8號風波,姑娘都提早準備好文件俾我地隨時出院,最後5日4夜埋單價係4萬6千,真係物超所值!!

另外仲有以下溫馨提示
寶血生產package本身包梳洗包(內有牙刷牙膏面巾沖涼液洗頭水),亦有1包產婦衛生巾、一包網褲、一個沖洗瓶同一包床墊。但媽媽們最好產婦衛生巾、網褲同床墊都各買多一包,因為未必夠用呀。

尾二嗰日醫院會送一大袋禮品包同相簿,叫老公拎走哂先,唔係到出院真係拎唔哂㗎!

每日睇BB係有時段限制,去到BB房Call咪同姑娘講你邊張床佢會推BB去玻璃窗,不過就連爸爸都冇得抱㗎!

21767950_423628618032120_5397404763694249488_n1

22046854_423628614698787_1983154123574996549_n

如果大家仲有關於住院問題,歡迎黎我嘅Page Inbox我,希望幫倒各位會考慮喺寶血生BB嘅準媽媽!

Wilma媽
從事廣告的在職媽媽,擁有一個有女兒有毛孩和豬隊友的幸福家。 產後以文字記錄兩個淘氣蛋的日常瑣事,和Wilma媽的好物分享 | 購物情報 | 新發現。