【澳門出遊】濕身暢玩水世界 @ 澳門巴黎人

Posted on October 3, 2017 By       1,503

1003_Macau

夏日炎炎,最好嘅消暑方法就係去玩水囉!澳門新落成嘅酒店一間接住一間,酒店泳池有埋一系列大型玩樂設施似乎變成咗近年嘅趨勢。

配套咁完善又豐富,包你玩到皺晒皮都唔捨得上水呀!今次我哋去咗巴黎人水世界度玩,想試好耐喇,終於一償心願!大家都嚟睇下啱唔啱你同你嘅小朋友玩啦!

Wow~Ho~~ 玩水喎!有邊個小朋友唔鍾意㗎?自從晴朗學咗游水之後,玩得仲放,更加熱愛玩水呀!

泳池周邊啲水柱會時高時低,起落不定,晴晴越玩越High喇!

原來泳池後面就係巴黎鐵搭,好近!一邊游水,一邊望住鐵塔,直情可以幻想自己去咗巴黎渡假呀!

一於嚟番張Selfie先!雖然影唔到鐵塔個頂,但好鍾意我哋兩個嘅笑容,發自內心嘅笑容係最靚㗎!

呢個名為儒勒.凡爾納飛船嘅玩樂設施,據聞十分刺激好玩,馬上過去試試囉!

晴晴已經一馬當先,撥動水炮射向人群喇!捉弄別人係咪特別好玩㗎呢?XD

沿住樓梯上船,甲板上亦有水槍可以左右撥動去射地面嘅人,晴晴玩到上咗癮呀!

每當大水桶注滿水就會翻下來,水花四濺,畀佢射中都幾過癮㗎!爽!

晴晴反而鍾意玩喱埋,不停搵有利位置避開啲水。唔畀啲水濺親都幾刺激好玩喎!XD

趁水桶未滿水,快啲四處走動玩樂一番啦!實行充當船長,啟程去第二個地方囉!

Row row row your boat, gently down the stream. Merrily, merrily, merrily, merrily, life is but a dream…

由於船上危機四伏,我哋決定跳船喇!危險速逃方法有兩個,一係跳落滑水道逃生,另一方法係瀡滑梯離船呀!

用邊種方法由你決定!不過都要留意夠高先玩得喎!

嘩!濕晒身咁瀡滑梯好Free呀!感覺實在太正喇!

晴晴一於少理,落到嚟地面繼續去射人,每次射中咗就咔咔大笑,真係咁好玩咩?

既然咁Hyper,不如過埋去兒童池玩囉!

呢度有多條滑梯任你瀡,一於瀡過痛快去~

上到去,掛住玩噴水池都唔記得咗瀡滑梯添!

晴晴最鍾意係呢一條滑梯,貪佢短同埋速度慢,可以慢慢Enjoy滑梯樂丫嘛!

Are you READY? GO~

來來回回不停要Encore,真係好好玩呀!YEAH!!!

玩到咁上下,相約好嘅朋友都嚟到喇!但由於距離關池嘅時間只剩下40分鐘,好朋友影完相就去咗行街lu~ 等我哋玩完水再會合啦!

晴晴好鍾意呢度,仲話下次一定要帶埋哥哥嚟再玩過添呀!Hoho~

呢個名為瑪麗.安托瓦內特塔嘅滑水道,就咁望上去已經有心跳加速嘅感覺喇!

梗係啦!有成12米高,而且九曲十三彎,有啲位仲較為傾斜,肯定勁刺激呀!

Dododo~ 但係留意番有高度限制㗎!就算哥哥嚟到都未夠高玩住!晴朗媽媽要照顧晴晴嘅關係,有得睇冇得玩,嗚嗚~ 拜託下次可以提供埋暫托服務嗎?XD

我哋都係去番泳池玩啦!Yo~ hoo~~

就算冇得玩,都同滑水道影番張合照啦!一樣咁開心~ hehee~~我哋玩到夠鐘關池先捨得上水呀!不過唔試過都唔知原來而家更衣室啲設備可以咁先進㗎!

Locker使用電動密碼鎖,用法係先按入自己設定嘅密碼,按「鎖」掣就上咗鎖。要攞嘢就按番先前設定好嘅密碼,輕易解鎖。相比起一般需要入硬幣嘅Locker方便好多呀!

唔識用唔緊要,牆上有大大塊指示牌教你點用。但至於游完水番嚟忘記咗密碼嘅朋友,就冇辦法喇!試下請職員幫忙啦!我哋咁啱見到一個泳客就係咁情況~

浴室4格,有齊洗頭水、護髮素同沖涼液。但大家最好預早少少沖涼、梳洗,如果等關池先嚟更衣室,就可能要排下隊喇!

更衣室有毛巾提供,乾淨衞生,可以唔駛自備。好方便!

另外,仲附設有乾衣機,可以將游泳衣物放入去進行乾衣,對於遊客嚟講超方便!呢樣係我哋前所未見嘅更衣室設備,好大鄉里添!XD

風筒、紙巾、棉花棒、梳妝枱一應俱全,想化番個靚妝再去玩都冇問題啦!

 

在巴黎鐵塔之下暢泳,是何等寫意嘅生活呢?咁先似渡假加嘛!水世界主要分開三個區域,兒童池同埋飛船好啱小朋友玩,而12米高嘅滑水道就啱晒鍾意刺激嘅大朋友喇!晴晴不停Loop滑梯,又鍾意揸住支水炮周圍射人,玩得好開心呀!巴黎人最近做梗一個入住優惠,可免費玩埋水世界同上巴黎鐵塔觀光,有關詳情可以上番巴黎人官方網站睇睇啦!不過要提提大家,唔夠1.4米高嘅小朋友一定要戴手袖或者著救生衣先可以入場玩㗎!入場位置已經有兒童救生衣提供,如果要手袖,就要自備喇!最好帶埋泳鏡去,咁就水花四濺都唔怕啦!好好玩!希望有機會可以一家人一齊再嚟玩過。下次一定要玩埋瑪麗.安托瓦內特塔12米高嘅滑水道呀!

 

巴黎人水世界

地址:澳門路氹金光大道連貫公路澳門巴黎人6樓

開放時間:每天10:00 ~ 18:00 (4月~11月)

費用:每位澳門幣$160

家庭套票 (買3送1):每日澳門幣$480

網址:https://hk.parisianmacao.com/macau-hotel/attractions/aqua-world.html

 

晴朗媽媽
晴晴、朗朗是我的一對寶貝,就讓我和晴、朗一起為大家發掘更多親子玩樂資訊,那便天天都是晴朗天啦!(≧∇≦)