天然母乳Lotion.自己屋企都整到!

Posted on August 18, 2017 By       1,931

Lotion

啱啱過去嘅週末真係過得好充實,特別係星期日,有幸被揀中參加「母乳Lotion」製作班,可以話係一個好好嘅學習同交流機會!

所以就算星期日要一早起身,媽媽都覺得好幸福,留多一份自己同小JM嘅「愛的回憶」之餘,更作為母乳路上嘅里程紀念。

今次我地整「熱製母乳Lotion」,方法簡易,只要預備妥當材料就可以喺屋企都整到!

熱製母乳Lotion

「熱製」意思係指用熱水,隔水慢慢加熱而製成Lotion。呢種製作方法相對地可以擺放耐少少,約一個半月左右,而且因為不含防腐劑及成份都以天然為主,所以適合大多數既小B使用。

材料:(根據小JM媽昨日整出來嘅成品而定)

母乳 35-40ml

乳木果脂 (Shea Butter) 1g

橄欖乳化蠟 (Olive Emulsified Wax) 2.2g

甜杏仁油 (Almond Sweet Oil) 5g

橄欖油 (Olive Oil) 2.5g

用具:

刮棒 1 枝

大量杯 1 個

小量杯 1 個

電子磅 1 部

攪拌棒 1 枝

電子水溫計 1 枝

電動攪拌器 1 部

做法:

1.) 先將母乳解凍變成液體狀,倒出約 35ml 母乳於大量杯中,備用。(約常溫即可)

2.) 將小量杯放係電子磅上,準備量度份量!加入先 2.2g 橄欖乳化蠟到小量杯。

(記得每次落材料時都要將電子磅嘅數字歸零,否則就會做錯!)

3.) 將電子磅歸零,再加入約 1g 乳木果脂。

4.) 將電子磅歸零,倒出約 5g 甜杏仁油。

小知識:甜杏仁油嘅油身比較薄,但保濕程度高。

5.) 將電子磅歸零,倒出約 2.5g 橄欖油,備用

小知識:橄欖油油身會厚啲,所以具有滋潤嘅效用,而整Lotion嘅橄欖油有別於一般家中食用油;呢種橄欖油會較為新鮮天然,但保存期有限定。

6.) 將放置母乳嘅大量杯及已放有所需材料嘅小量杯放入已預先預熱好嘅熱水中,並用攪拌棒不時攪拌材料杯至全部材料溶化為止

7.) 裝有母乳嘅大量杯慢慢加熱至 50ºC

8.) 用刮棒將小量杯中已完全溶化嘅材料倒入已加熱嘅母乳中

溫馨提示:想要Lotion更幼滑就要小心溶化材料嘅步驟,檢查清楚材料是否已經完全溶化,而且並無粒顆在內。已溶嘅材料會黏貼喺杯邊,記得都要刮落嚟用!

9.) 用電動攪拌器將材料及母乳混合約十分鐘,Lotion嘅初型就會出現;有糊狀嘅感覺就可以停止攪拌,待涼後就可以入盒

10.) 成品出來啦!係屬於小JM專有嘅媽媽牌Lotion!

小提示:

母乳Lotion完成後需要置放於雪櫃之內,保持新鮮度,因為母乳Lotion本身係以母乳及其他天然成份製作而成,不會添加防腐劑,所以必須每次使用後都要冷藏好,以免母乳Lotion變壞,浪費媽媽一番心機喔!

 

小JM媽試後感:

原來母乳Lotion一啲都唔難整,真係又學多一樣野。整好咗之後自己都親身試過,的確幾滑幾保濕。如果早啲知道的話應該可以慳返買Cream或 Lotion錢!因為成份天然,唔會怕小JM食到,搽手又得搽面又得,連PatPat都一樣得~想有香香嘅味道,仲可以配搭自己鍾意嘅精油!

 

傑。斯與晴
80後情人節媽媽與元宵節寶寶。前Playgroup導師、現職Marketing Firm既新手在職媽媽,喜歡細數生活中與小JM既點滴動人時光,紀錄及分享育兒既小心得、幼兒食譜分享、親子旅行及購物分享。