新手孖媽的8大挑戰

Posted on August 22, 2017 By       2,945

Twins Mum Challenge

一次過打孖上,我一下子就成為兩個BB嘅媽媽;照顧佢哋凡事都有好多第一次,就講下我經歷當中印象最深刻嘅8個挑戰啦!

1. 分唔清樣貌

森林雖然係異卵雙生,但啱啱出世頭兩星期真係好似Copy and Paste一樣!孖媽我時常分唔清楚邊個已經食咗奶或換咗片,亦經常將佢哋放錯喺對方嘅床仔。後來公公婆婆買咗粒玉仔,佩戴喺腳上,就容易分啦~

1. 分不清的樣貌

 

2. 飲食作息時間表

對孖媽嚟講,飲食作息嘅時間好重要。尤其係決心餵母乳嘅孖媽。初生至3個月時,如果兩個同時食同時瞓,3個鐘頭食一次奶,孖媽斷斷續續加埋可以瞓到4至5個鐘,已經好好了。但現實係孖B通常食奶節奏不一,或者當中總有一個會醒瞓啲…

父母可以連續瞓到3個鐘已經係個遙遠嘅夢想~我生完森林後半年,就好似斷片一樣,完全唔知道自己做過乜野,瞓唔夠係人生最痛苦嘅事情!後來,我無再堅持兩個一齊食人奶,長老們都會幫手夜晚餵奶,情況就開始改善咗!

2. 飲食作息時間表

3. 出街困難症

好羨慕啲媽媽坐完月就可帶BB出街~老實講,我和森林爸二人盡全力,都要等到森林半歲之後,先帶到佢哋去第二個社區。

孖B每次出街都要準備好多野,奶粉、尿片、奶樽等全部乘二。如果預計出門時間超過3個鐘,即係等於兩餐食奶時間都在外,更要帶多兩倍嘅物件。森林更常喺我哋準備出門口時,輪流嘔奶、濕片;幫佢哋換好衫同片之後,又差唔多夠鐘食奶,無限循環,門口…有排都出唔到~

後來,我哋係出發前一半個鐘開始準備,寫一張清單作提醒,出門成功率就大大提高!

3. 出街困難症

4. 隔離飯香

點解孖媽通常都為孖B著一樣嘅服飾?森林愈大,我就愈明白… 雖然玩具衣服都係同款,但如果唔同顏色,就會俾佢哋感覺人哋身上嗰件係好啲~

4 隔離飯香

5. 同床瞓

就好似下圗咁,當森林3個月時,已經常常互相操練。孖媽一不留神,佢哋就好容易抓損對方。所以一直以嚟,瞓晏覺或瞓過夜,都係分床。

5. 不可同床睡

6. 超大嘅活動空間

Playmate、High chair、食具、玩具等,所有野都要有2套!你懂的~而呢啲物件只會隨住孩子成長而增加。納米樓尺價飛升,孖B需要嘅活動空間卻愈來愈大;喺香港生多一個B,唔容易呀…

6 超大的活動空間

7. 熱情擋都唔住

孖B有無心靈感應?我唔知道。但時常見到森林都係一齊喊一齊笑,佢哋情緒好容易互相感染,兩個鍾意抱埋一齊,望住佢哋嬉戲玩耍、熱情相擁,畫面當然超暖心。但前提係佢哋可以站穩同坐穩時,先咁熱情就更好了。撲嚟撲去,未識得控制力量,媽媽擔心你哋仲係弱弱嘅身子會受傷哦!

7.擋不住的熱情

8. 親子時間難分配

同補習興趣班一樣,單對單總好過一打二吧。

由森林2個月大開始,我每日都同佢哋一同睇書講故事;但8個月大之後,佢哋專注力大大降低,經常喺我講故事時被其他事物吸引而離開,最後孖媽變咗自己同自己講故事…

單對單嘅親子時間或者佢哋就會專心啲,但爸媽就要另外再抽啲時間陪孖B啦!

8. 難分配的親子時間

森林的童話
Life is a leaf of paper white, thereon each of us may write his word or two. 2016年,我同時獲得兩張白紙 (大孖: 森森; 小孖: 林林) , 為森林加上色彩,編寫她們的童話, 是我的賞心樂事。