【美味有益】鮮淮山杞子粟米雞肉飯

Posted on August 11, 2017 By       2,734

Mama Cooking

夏天天氣炎熱,不其然令人胃口大減,小JM就更加無耐性食飯。

為咗令小JM可以再次乖乖進食,媽媽只好整新野俾小JM試,希望可以吸引到佢有返多啲胃口食多啲野~

而今次我準備《鮮淮山杞子粟米雞肉飯》,相信好多靚媽都知道淮山對身體有益,所以閒時會用嚟煲湯!

認識淮山
淮山,原名「薯蕷」,又稱為「蒣」,是薯蕷科薯蕷屬的一種植物,而因為「薯蕷」原產地係位於淮河附近,所以就有「淮山」之稱。

功效
1.)健脾益胃,有助消化
淮山當中含有澱粉酶、多酚氧化酶等物質,對於幫助脾胃消化同吸收都有一定嘅功能。

2.)益氣養陰、益肺止咳
淮山本身含有黏液,有潤滑、滋作用,所以能夠益肺氣、養肺陰,而且仲可以用作治療肺虛、止咳、除痰。

3.) 降低血糖
淮山內含有粘液蛋白,有降低血糖的神奇作用,還可用於治療糖尿病,是糖尿病人的最佳食品。

4.) 滋腎益精、止帶
淮山大多數分為鮮淮山同乾淮山,原來功效都會有少少唔同!
鮮淮山大多數都會以食用為主,多用喺烹調煮食,有較好嘅補陰生津功效;
乾淮山係中醫角度而言多數為藥用,有較好山嘅健脾止瀉效用,因此便秘人仕就唔適宜食太多啦~

入返正題!主角:鮮淮山杞子粟米雞肉飯

材料:
鮮淮山
杞子
粟米
雞肉

做法:
1.)洗淨鮮淮山,刨去外皮,之後將淮山切小段,並置放於水中以防發黑

2.)預熱一煲滾水,將已預先除去粟米衣及粟米鬚嘅栗米切段,待水滾後放入粟米,再置放蒸架及碟,將鮮淮山蒸熟。

3.)杞子置放於碗中浸泡備用,即可。

4.)約十數分鐘後將熟透至軟身嘅鮮淮山取出,並以匙羹將鮮淮山壓成蓉,備用。

5.)將栗米取出並拆粒,放入攪伴機內,加少少水, 輕輕打成蓉

小技巧:可以用一板筷子作幫助,先摌走其中一行,再用手慢慢逐行拆出

6.) 最後將粟米、鮮淮山、杞子及雞肉置放於小燉盅內,一併煮理繼30-40分鐘,完成!

食之前撈入飯就可以準備俾小JM試味啦~難得有新野試,小JM都話要同媽媽開心Share,要俾啲媽媽食咁話!

 

雖然鮮淮山本身無咩味道,但加入左杞子同粟米就會容易吸引到小B進食。

粟米既甜美亦都令到小JM難以抗拒呀!希望你地既小B都一樣會喜歡啦!

傑。斯與晴
在職80後情人節媽媽與元宵節寶寶。新手媽媽細數生活中點滴的動人時光,紀錄及分享育兒小心得。