夏日防蚊用品容易過敏成份你要知!

Posted on August 3, 2017 By       6,590

03

「夏天,為大地帶來雨水」

 

咦,呢句口號好熟悉喎,原來話咁快又踏入咗夏季。雖則媽媽我好鍾意夏天,之但係我其實好討厭被蚊咬,可能因為我本身係過敏體質嘅關係啦。

 

細細個俾蚊咬到要睇醫生、打針、食藥,真係幾誇張架。就早個零星期,媽媽又一次俾蚊咬到隻腳紅腫,要去睇醫生、食藥先好返,所以我對夏天真係又愛又恨!

 

因為屋企比較近山邊,夏天嘅季節就會比較多蚊蟲,所以就算係屋企我同小JM都要「高度戒備」,始終蚊蟲都有可能係病毒嘅傳播媒介之一嘛。而出街就更加要加強裝備,蚊夾、蚊貼就真係必須要,因為一個唔留神媽媽同小JM就會變成蚊蟲嘅美點。

 

可能係別人眼中係好大陣仗,但係當小B們俾蚊蟲咬到又紅又腫嗰陣,媽媽真係會心都痛埋架。

 

所以,無論係屋企定係外出,我地都一定會預備防蚊「法寶」。

04

 

室內防蚊篇

係屋企,我地會用「滅蚊機」。其實市面上都有好多不同牌子、種類嘅室內滅蚊用具,但因為小JM,所以我地就必須要考慮得更加仔細,務求減低對小B們產生嘅過敏機會。

 

老一輩會建議使用蚊香,但對於有小B嘅屋企而言,我就唔太建議。因為蚊香燃點後會釋放出煙霧,雖然不算太濃,但對於氣管敏感人仕或會引起不適,而且有啲蚊香成份會係燃點時產生樟腦既氣味,亦有機會使人感到頭暈架。再者,舊式蚊香需要燃點,會較為危險。

 

而市面亦有滅蚊燈 / 捕蚊燈嘅產品,當時媽媽亦有留意過,但因為朋友家中已經有用過,而且效果不太理想,所以建議我不要使用。而且使用後就要定期清理置於燈內嘅「蚊屍」,呢樣先係最嚇怕媽媽,所以媽媽堅拒說「不」就係啦!

 

所以為安全起見,媽媽我就揀咗係屋企用智能液體電驅蚊器。機仔細細嘅智能液體電驅蚊器,只要插上電源就可以驅蚊。如果怕小B會觸及,建議放係高少少嘅地方或者小B唔會掂到嘅地方較佳。

 

而我地用緊嘅係雷達驅蚊器,設有三段式時間功能:8 / 12 / 24小時,同時亦有除蚊模式可以選擇,係蚊多嘅時候不妨開強少少,平時就稍稍回復一般模式就可以啦!簡易方便設計,易於使用及控制時間,而且又慳位,所以絕對係我地嘅首選。

03

 

戶外防蚊篇

係外出,我地較常會用到蚊夾、蚊貼同蚊膏。

 

其實要搵一啲合適嘅防蚊產品亦都唔易,媽媽們要小心揀選先好呀,因為一個唔留神揀咗含有樟腦或者酒精成份嘅防蚊用品就會造成過敏架啦。

 

防蚊用品/藥膏嘅過敏成份你要知!

1. 樟腦

大多數蚊膏都有可能會有樟腦嘅成份,而樟腦係唔岩G6PD缺乏症(蠶豆症)嘅患者用架,因為會令患者出現溶血反應架。所以G6PD缺乏症嘅患者要小心使用呀。

 

2. 避蚊胺(DEET)

避蚊胺嘅驅蚊原理其實係擾亂蚊蟲對我地人體嘅感覺而已。但如果避蚊胺嘅濃度過高,就會令使用者出現不適嘅現象,如:眼睛腫痛、頭痛、氣管收窄等嘅徵狀。如果平時揸完有DEET嘅蚊怕水再加防曬,皮膚好容易敏感發紅,好多新聞有報導過!

所以醫生建議使用前先要了解產品嘅成份及濃度。一般情況下,成人應該使用避蚊胺濃度35%以下嘅產品;而十四個月以下嘅嬰幼兒則盡量使用避蚊胺濃度10%以下嘅產品較佳,而且一日只可以用一次喔。 同時,醫生亦不建議六個月或以下嘅小B們使用含避蚊胺成份嘅產品,以免造成不適。

 

3. 酒精

有啲防蚊液會以酒精去提取乾艾草、香茅油當中嘅揮發油,從而製成防蚊液。如果本身對酒精過敏嘅就不宜使用架啦!就算我地大人使用都要好好留意當中嘅濃度,因為濃度太高嘅話有機會刺激到皮膚架,所以比較建議都係噴係衣服表面而唔好直接噴係皮膚上。

 

係小JM未出世之前,媽媽我通常會用蚊怕水同蚊貼多,而大部份時間都會選用珮氏嘅防蚊產品,當然其他的品牌亦都用過不少,當中OFF又點少得呢。(你見上圖都有好幾款就知啦!)

 

蚊水,以前爸爸成日都會幫我買定,就連去CAMP都會俾定兩枝我防身。無他嘅,因為我真係惹蚊到可以變成「蜜蜂窩」咁架。以前細個就會覺得好方便,因為一噴就行得。雖然看似方便,但係同蚊膏一樣,噴完都會有少少「痴立立」嘅感覺,呢一點我係好唔鍾意,所以大個咗反而用多咗蚊貼。

 

05

(圖片轉載自互聯網)

我一向用開珮氏嘅野紅茄系列,因為呢個系列係不含DEET成份架。使用前都輕輕刮一刮張蚊貼,令蚊貼既氣味釋放出來。使用都算方便,一刮一貼就可以。

 

但當然都會有唔好嘅時候啦,就係有時去完街唔記得撕返出來,有時仲可能洗完衫先發覺添(真係大頭蝦!)。仲有就係可能氣味比較濃,未必個個人都會接受到。小JM每次貼完都會撕返出來,所以似乎蚊貼都唔太啱小JM用。

 

而家小JM越來越大個嘅關係,其實要小JM乖乖地、定定地咁俾我地幫佢貼蚊貼或者夾蚊夾都好難,因為就算小JM肯乖乖地定定地俾你貼完都好,轉個頭原來就會撕咗張蚊貼出來,又或者成日手多多去抓個蚊夾。真係激C媽媽啦。

 

最近我就用「防蚊好物」-Floroma 花の滴香水醒神筆,係一枝集香水、防蚊、止痕、提神嘅好幫手。而且使用方便,走珠式塗抹好簡單又夠快手,唔駛怕小JM一枝箭咁走咗去又未搽到。

01

 

小JM媽媽係使用之前好重視成份,係不含樟腦及避蚊胺(DEET),而且係採用純天然薄荷以達到驅蚊止痕效果,所以過敏嘅機會亦相對減低。建議一歲或以上嘅小B使用,而且媽媽們最好俾小B使用之前先搽少量係手腳試下有無過敏先,測試完無皮膚過敏就可以繼續使用呀!由於係天然驅蚊,唔似一般有被蚊安嘅驅蚊劑可以長達廿四小時,通常三個鐘頭補一次,好就好在成份天然,無毒無副作用。

02

 

仲有就唔好俾小B們自己單獨使用,以免誤服呀,因為醒神筆只係可以外用架!如果小B真係一時貪玩整咗入眼、傷口等就要用水為小B沖洗,若依然有不適就最好搵醫生啦!花の滴亦有溫馨提醒媽媽們醒神筆係唔適合蠶豆症患者使用架,真係好貼心喔。

 

花の滴雖然細細枝,但有齊防蚊同止痕功效,比起我之前用蚊貼會方便左,帶少咗野。以前要帶齊防蚊止痕,而家只要一枝就攪掂晒,輕便好多。媽媽我就可以同蚊貼、蚊膏講Bye-Bye啦!原來係7-11已經可以買到,用晒想買都好方便。另外而家7-11仲會有齊晒三款味道可以試用添,真係試過、聞過,先買都仲得!得咗!

 

最後,建議靚媽們要留意防蚊用品嘅有效期及存放方法,因為存放太耐或不當都會令產品失效架。同時亦建議為小B揀選零防腐劑嘅用品,以降低敏感嘅機會,而係為小B搽抹蚊水個陣,建議靚媽先將蚊水噴係自己手上先要為小B搽上,而蚊貼就緊係貼係衣襪之上,而唔好直接貼於皮膚啦!

 

所以話,做媽媽嘅真係一分鐘都唔可以掉以輕心,每一樣俾小B用嘅、食嘅,都會由自己先試用過先再俾小B用。呢啲真係要做咗媽媽先會明白同體會到,以前做女個陣又點會咁做先得架。哈哈(最多用完唔啱就放係度)。

 

Btw,希望今個夏天唔駛再俾蚊咬到手手腳腳都係印啦。要幫小JM Keep住個靚靚樣先得!

 

傑。斯與晴
在職80後情人節媽媽與元宵節寶寶。新手媽媽細數生活中點滴的動人時光,紀錄及分享育兒小心得。