【幼兒食譜】滋潤清熱 佛掌瓜粟米甘筍豬骨湯

Posted on June 14, 2017 By       10,639

20170613_SOUP

啱啱過咗一個令人心驚膽顫嘅星期,呢日又係時候要搵啲湯水來滋潤返下先得。今日行過行市見到啲佛掌瓜幾靚,所以就決定煲佛掌瓜湯!

 

佛掌瓜其實係對我地人地係好有益架,而且味道清甜,真係好適合用來煲湯架!

 

佛掌瓜嘅好處及功效:

佛掌瓜可以話係瓜類之中營養價值最豐富嘅一種,成日食嘅話仲有助於增強人體嘅抵抗力添架!佛掌瓜亦都有利尿排鈉嘅作用,而且仲有助擴張血管同降壓添。

 

而根據醫學研究報道指出,佛掌瓜含有較多嘅鋅,對提升小朋友B們智力都有幫助;而佛掌瓜對男、女因營養不足而引致不孕嘅亦有療效。

 

就中醫而言,佛掌瓜有理氣和中,疏肝止咳嘅效用,對於消化不良、胸悶氣脹、嘔吐、肝胃氣痛、咳嗽痰多亦有幫助。

 

既然佛掌瓜有咁多好處,就緊係要煲來俾小JM飲下補一補充返啦,話晒因為感染左玫瑰疹,燒左幾日呀!陰公豬!(回顧:【育兒】小JM病了!「玫瑰疹」知多啲

 

好,立刻事不宜遲,快快睇下需要咩材料先!

 

佛掌瓜粟米甘筍豬骨湯

材料:

佛掌瓜…… 兩個
粟米……… 一條
甘筍……… 兩條
豬骨……… 適量
南北杏…… 適量
果皮……… 一片
蜜棗……… 一粒

 

材料預備妥當之後就緊係要準備煲湯啦!又睇下有咩步驟先~

 

做法:

1. 先將 佛掌瓜、粟米、甘筍洗淨,去皮備用。佛掌瓜需要去核添架!

 

2. 將佛掌瓜、粟米、甘筍切件備用。

 

3. 將 南北杏、果皮、蜜棗用水浸洗,果皮浸軟身後需要刮去瓤,備用。

 

4. 先將豬骨洗淨,再以滾水煮約 15-20 分鐘。撈起沖水再備用。

 

5. 先預備一大煲水,煮滾後就將以上材料放入,待水滾後轉慢花煲一個鐘左右即成!

 

有需要可以因個人口味而加入適量嘅鹽,因為俾小JM飲,所以無預先係煲度落鹽喔。

 

除以上材料外,仲可以配搭多種不同材料而變化出不同口味嘅有益湯品喔!變化太多,只好作簡單舉例囉!

佛掌瓜無花果煲豬骨

椰子栗子佛掌瓜甘筍粟米豬骨湯

佛掌瓜粟米鮮淮山豬骨湯

*亦可以將甘筍轉換成紅蘿蔔喔!*

 

傑。斯與晴
80後情人節媽媽與元宵節寶寶。前Playgroup導師、現職Marketing Firm既新手在職媽媽,喜歡細數生活中與小JM既點滴動人時光,紀錄及分享育兒既小心得、幼兒食譜分享、親子旅行及購物分享。