【育兒】小JM病了!「玫瑰疹」知多啲

Posted on June 7, 2017 By       83,884

20170606_RASH2

啱啱過去嘅假期,小JM媽媽我簡直好似發左一場惡夢咁,可以稱得上係自小JM出世以來最難過嘅日子(坐月自己新手湊都無咁驚),因為小JM突然發燒,不斷燒下退下咁,一燒仲要高燒到成39-40度添,真係嚇到我個心都離一離。

 

(Touchwood講句,因為小JM真係無試過發燒架,even去健康院或私家打針都好,都未試過架,所以今次媽媽真係嚇左一大跳。)

 

(Day 2照片,未算最高燒,打後試過39.8°C及40.1°C)

 

事源係咁嘅,喺早幾日放假個陣,突然四點幾左右發現小JM有少少發燒,當下只係輕微嘅發燒,所以就幫小JM散下熱,希望可以舒緩一下。到大概晚上十點左右小JM已經退咗燒,但爸爸媽媽都唔敢太過放鬆,係小JM瞓咗個陣我地都有間中為小JM度體溫,以確保小JM有無再發燒。直至天光大概六點零鐘左右,小JM體溫依然正常,但誰知到九點零鐘小JM突然又發起燒,仲要燒得唔低,去到成38.9度,所以我地決定帶小JM去睇醫生以策安全。

 

但因為係公眾假期嘅關係,原先一向旅行拎開平安藥嘅兒科醫生無開,所以就睇咗另一間都有兒科嘅醫生(但個人感覺佢啲藥唔多work,小JM食完係無退過燒),見完醫生後,證真咗小JM係感染咗一種良性嘅過濾性病毒——玫瑰疹。

 

玫瑰花你或者知係咩,但「玫瑰疹」你又知唔知係咩一回事?不如今次就等小JM媽媽我為你地講解一下我嘅親身經經啦!(不過真係好攰,夜夜無眠)

 

甚麼東東係「玫瑰疹」?

玫瑰疹,其實係屬於一種良性嘅過濾性病毒感染,好少會有併發症或者後遺症嘅(主要為人類皰疹病毒第6型及第7型最常見),玫瑰疹通常會出現係小B們六個月至兩歲期間最大機會感染到,當然醫生亦唔排除大少少嘅小朋友係未出過玫瑰疹嘅情況下而有機會感染到嘅。

 

「玫瑰疹」病徵你要知!

玫瑰疹雖然係良性疾病,但同樣地都會有病徵,爸爸媽媽們可以參考一下:

- 會令小B發燒,甚至發高燒。其間更會不停反覆發燒、退燒。情況持續約 3-4 日。

 

小JM實況:

就小JM今次而言,最高體溫試過出現 40.1度。幸好只係維持左一段小時間,但大多數時間嘅體溫約為38.8-39.8之間。
*係小B發燒嘅期間記得幫小B做好降溫嘅準備呀!*

 

- 小B 雖然發燒,但明顯地胃口及活動能力係無被影響嘅,所以唔會有好攰同無胃口嘅情況。

 

小JM實況:

小JM發燒初起甚至到尾段時期都一樣咁活躍,只係有時候會比較黏人,小JM簡直可以話係「活躍到唔講你唔知佢發緊高燒」嘅程度。

 

- 小B有機會係發燒嘅同時會有輕微嘅咳嗽及流鼻水情況,醫生話呢啲都係一般嘅上呼吸道感染症狀來嘅。

 

小JM實況:

小JM都有流鼻水嘅情況出現,但情況只屬輕微,所以唔需要刻意食藥都可以。

 

- 大約 3-4 日左右,小B嘅身體就會出現紅點,咁亦即係意味著「玫瑰疹」已經到左尾聲,小B亦唔會再有高燒嘅現象,亦即係話小B好快好返架啦!

呢啲紅點其實係一啲顏色新似玫瑰紅色嘅小紅疹,所以稱之為「玫瑰疹」;而呢啲紅疹一般都係唔無痕唔會痛嘅,通常會出較先出現係小B嘅面部,手、腳以及身體。紅疹大約持續三數天就會慢慢褪去架啦!

 

小JM實況:

小JM差不多第四日開始就出現有紅疹嘅症狀,最先係面頰,繼面係肚腩仔。但就無見到小JM有任何唔舒服會痕癢嘅情況。

*如果爸爸媽媽唔放心,可以多啲同小B清潔下皮膚,避免因為汗水而令情況有變*

 

SOS!!!溫馨提示:

雖然醫生話小B們出疹、發燒係好常見嘅事,但如果小B們出現左以下嘅徵狀就要盡快去醫院或者睇醫生啦!

 

1. 行為

.反應變慢、遲鈍
.神情變得呆滯
.嗜睡,變得無精神
.慾不振,胃口減退

 

2. 身體

.持續高燒不退
.嘔吐大作
.濕片唔夠,尿量少等

 

3. 紅疹

.身上嘅疹凸起
.全身變得通紅
.疹變成塊狀等

 

小B們發燒,爸爸媽媽一定會非常擔心,就小JM今次而言,媽媽我真係連續幾晚都唔敢點瞓,真係要下下睇住小JM嘅情況,因為一來小JM未試過會發燒/病;二來發燒對小B們而言實在係「大件事」,所以要加以照顧。

 

之但係咁,「發燒」係點定義架呢?

發燒,其實係指身體嘅溫度比正常溫度來講過高,就算係發燒。一般我地可以用體溫計去量度嘅,而量度嘅方法亦會因小B嘅歲數或月齡而有所不同。

一般可以分為:

- 口腔溫度量度
- 肛門溫度量度
- 耳仔溫度量度
- 腋下溫度量度

 

對於嬰兒期嘅小B們來講,多數會教為多採用「肛探」,係醫生認為較為準確嘅體溫量度方法之一。而對小童嘅大B們而言,就會採用「口腔探」。但因為而家時代已經進步左,所以有好多診所都已經改用左 紅外線體溫量度器 架啦!

人體正常體溫:

- 口腔溫度:36.5°C ~ 37.5°C
- 肛門溫度:37°C ~ 38°C
- 耳仔溫度:35.7°C ~ 37.5°C
- 腋下溫度:34.7°C ~ 37.1°C

 

換句話,即係超出以上溫度就已經算係「發燒」,但一般輕微嘅發燒醫生都唔鼓勵太快俾退燒藥,因為少少嘅發燒可以有助小B們增加對抗病菌嘅抵抗力。微燒嘅話,不妨幫小B們降溫以解不適。

 

有助降溫嘅小方法:

就我家小JM而言,我採用左以下方法幫小JM降溫,以舒緩高燒嘅不適感。
1. 讓小B多啲飲水

可以俾多啲水份俾小B,有助幫助出汗及補充流失左嘅水份,同時亦有助排尿。我唔會硬要小JM飲白開水,我亦有俾果汁及其他飲品。

 

2. 為小B減少多餘嘅衣服,以單薄輕衣衣料為主

單薄嘅衣料有助小B們散熱,以減低身體過熱嘅負荷及不適。

 

3. 開風扇或冷氣以恆溫,最緊要保持空氣流通

開冷氣可以令室內溫度下降,同時變得清涼。雖然開風扇都有同樣效果,但就要小心,唔好正面吹住小B, 以免小B因為咁而吹親。

 

4. 以適溫水為小B沖涼降溫

可以用溫水為小B沖涼,以助散熱。但切忌用太冷或太熱嘅水,以免加重小B身體嘅負荷;要緊記喔,水太冷反而仲會有後效果,會影響到血管收縮從而阻礙散熱。

 

5. 貼退熱貼/用毛巾降溫

用意都係有助降溫,減少身體發頭部負荷。(但可惜小JM唔太喜歡貼退熱貼,會自己撕走喔!)

 

6. 食藥

如果做齊以上幾樣都未能有效學降溫嘅話,小B就可能需要用藥降溫啦!但必須要跟從醫生或醫院的指示服用藥物,切忌過量。

 

希望以上有關「玫瑰疹」嘅資料可以幫助到有需要嘅媽媽啦!

 

睇見小JM呢幾日發高燒咁辛苦咁攰,當媽嘅都一樣係好心痛,希望快啲出完疹無事又可以去玩啦。今個星期要係屋企閉關一下喔。

 

(攝於Day 3夜半之中。。。)

 

傑。斯與晴
80後情人節媽媽與元宵節寶寶。前Playgroup導師、現職Marketing Firm既新手在職媽媽,喜歡細數生活中與小JM既點滴動人時光,紀錄及分享育兒既小心得、幼兒食譜分享、親子旅行及購物分享。