【父母教室】教養,一切也不易

Posted on June 6, 2017 By       4,934

20170606_parenting

小JM媽媽我唔係生長係小康之家,我只係一個普普通通嘅屋村小女孩,但爸爸媽媽從小就教導我同細佬好多嘅大小道理, 為嘅就係要我地成為一個乖嘅小朋友, 父母無特別寄望我地要「成龍」, 只望我地可以學得懂「禮、義、廉」。

 

但現今社會怪獸父母不計其數, 到底佢地明唔明白教養係咩一回事?

 

「教養」二字於我自己而言,其實係指一種待人處事嘅態度,我覺得父母需要以身教去教導小B們學懂呢一種嘅「規矩」,使到小B們可以從小倍養一種正確嘅觀念,從而學懂「禮、義、廉」嘅真諦。

 

今日係返工嘅途中,我聽到一對母子嘅對話,聽完替小朋友覺得難過。不如就將故事分享出來俾大家感受一下。

 

小男孩:媽媽,我想大個之後揸巴士呀。

媽媽: 揸巴士?唔好!搵好少錢。

小男孩:(依然天真地問)咁,如果我揸98C呢?

媽媽:都一樣!你第時點養老婆?

小男孩:(自信咁回答)養呀,我仲要養兩個BB添呀!

媽媽:你揸巴士點養得起!唔好啦總之。

 

聽到呢度已經覺得有一種莫名嘅傷感。咁細個嘅小朋友(幼稚園生)同媽媽講自己嘅夢想,但就俾媽媽將佢嘅夢想同金錢掛勾,的確不禁令人慨嘆。

 

要做好「教養」呢一環實在不容易,爸爸媽媽們亦要以身作則,成為小B們嘅榜樣先會夠說服力。

 

而我同小JM爸爸就會實行以下幾點,從而希望可以教導小JM成為一個可愛乖巧嘅小B。

 

1. 以身作則,成為小B嘅榜樣

俗語話:「言教不如身教」,所以無論大小事情我同小JM爸爸都會希望做到以身作則,成為小JM嘅一面借鏡。話雖如此,但我地亦從不會強硬地去改變小B嘅思維,始終小B們需要保留著一點稚氣先會顯得可愛。

 

2. 多與小B們相處及溝通,從而互相了解及學習

現今社會大多家庭都係雙職父母,日頭工作,夜晚湊小B,但漸漸你會發現原來呢一切都係值得嘅。因為係彼此相處嘅過程當中小B亦會學懂與人相處嘅技巧,有助小B日後學習待人處事。

 

再者,爸爸媽媽多花一啲時間係小B們身上,小B們都會較為有安全感,始終小B們想要依賴、想要撒嬌嘅對象都係以爸爸媽媽為先嘅。而且係相處嘅時間當中,爸爸媽媽亦可以少少時間去同小B們溝通,會有助增加親子嘅感情添架。

 

3. 為小B們定下小規矩、小守則,從中學會紀律

可以在家中定下一啲小守則俾小B們去遵守,例如:

- 睇電視唔可以坐太近

- 不准亂掟玩具

- 不准隨便大叫

之類……

 

或者你會覺得無必要,但在家中定立小小嘅小守則其實對小B上學後的紀律亦會有幫助。當然,爸爸媽媽亦需要花時間去教導小B,安撫小B先可以,而不是令小B們盲目跟從你所定立的規矩。

 

4. 培養小B們獨立個性,學會互相彼此尊

爸爸媽媽們可以從小慢慢培養小B嘅獨自個性,讓小B獨立去處理個人嘅日常事,例如:刷牙洗臉,摺被摺衫等都有助訓練小B們嘅獨立性。另外,亦不妨於購物時讓小B一齊揀選心愛物品,可以先由爸爸媽媽揀選,再俾小B揀都得,最緊要係有份一齊參與。

 

另外,爸爸媽媽亦需要學懂尊重小B們嘅想法,如果有溝通上嘅問題,不妨同小B花多一啲時間去溝通以便了解,從而學會彼此互相尊重。

 

5. 教導小B們禮貌、禮讓,以禮去待人處事

以身教方式教導小B們待人接物要有禮貌,讓小B們明白到禮貌、禮讓嘅重要性。

 

教養嘅路實在好漫長,小B們嘅每一步都在不斷成長中,所學所想亦會隨之而改變,想要教育好一位小朋友真係要花不少心機和時間。

 

喺小B們學習嘅時候,其實爸爸同媽媽我一樣都係度學習緊點樣做一位盡責任嘅爸爸媽媽。我不寄望小JM長大會變偉人或變得十分出色,只期望小JM會有個真正快樂開心嘅童年。

 

小JM,爸爸媽媽會同你一齊好好學習喔!我地一齊加油吧!愛你喔!

 

傑。斯與晴
80後情人節媽媽與元宵節寶寶。前Playgroup導師、現職Marketing Firm既新手在職媽媽,喜歡細數生活中與小JM既點滴動人時光,紀錄及分享育兒既小心得、幼兒食譜分享、親子旅行及購物分享。