【地鐵控必到之地】港鐵展廊

Posted on June 7, 2017 By       4,000

201706505

小小豬係一名不折不扣嘅「地鐵控」,佢真係可以背得晒各路線嘅站名,有時都真係令我有啲驚!小小豬由二月初開始,每日放學路經有關港鐵展廊嘅宣傳海報,佢終於忍唔住要求我帶佢地參觀,幾經辛苦終於book到,可以去參觀啦!

 

其實小小豬未同我講時我都一早知道有依個展覽,所以都想靜雞雞book左,之後俾小小豬一個驚喜。不過網上預約一直爆滿,每星期都好準時咁上網搶位般,好在終於我都係大半個月前預約到,book到嗰一刻真係超激動呀!

DSC00635

展廊嘅入口就係一幅由幾千張港鐵發售過嘅儲值車票而組成,「地鐵控」一見到就已經好興奮,其實唔止小小豬,我一見儲值車票都有少少童年回憶湧出嚟,因為有好多張我細細個時都有儲(大件事….又爆左自己那些年添)

 

入左展廊之後,首先就會睇到一列港鐵列車模型,每個模型旁都有詳細寫上列車嘅出產地及開始行走年份。另外,除左我地平日搭開嘅列車同迪士尼列車之外,仲有機場快線、輕鐵列車、九港通及輕鐵等。有導賞姐姐介紹,小小豬又知多啲啦

DSC00645

除左列車模型,場內仲播放港鐵發展歷史影片,「地鐵控」就梗係最鐘意,因為可以睇到各車站幾時開始運作嘛

DSC00671

之後我地就入去1:1港鐵模擬車廂,感受兩代車廂內嘅環境,模擬車廂就分為兩部分,首先就係1978-1998嘅車廂,我真係有點懷念那波波型嘅扶手呀~

DSC00761

 

除左參觀,仲可以玩VR GAME,小小豬話係摸擬搭緊南港島線,平日唔多玩VR嘅佢,就係因為港鐵關係玩左四次添~

DSC00705

有興趣嘅朋友仔可以去港鐵網站登記啦(不過….真係要計準時間去BOOK呀)

DSC00624

當我未嚟參觀時我都好擔心一小時係咪可以玩晒,始終港鐵地咁耐歷史,都應該幾多嘢睇,但以我個人嚟講,我又真係覺得好似展覽都唔算豐富,同埋地方又好似細左啲啲。如果可以展出埋歷年所推出嘅發售精品,或者可以多展出唔同列車嘅1:1模擬車廂,咁就應該仲正(我認我係有點貪心…哈哈哈)。

 

不過以「地鐵控」嚟講,依度可以完全滿足到佢地,有得玩又有得睇,小小豬係依一小時參觀都不知幾投入,走嘅時候仲叫我快啲再上網登記,再帶佢嚟睇多一次呀!

 

KinseyMaMa
一切以小小豬為中心,讓小小豬擁有一個快樂的童年為目標。同隻百厭豬一齊整嘢食又周圍去玩, 記錄我們這一家嘅生活傻事,讓大家可以陪同小小豬一起成長。