【親子遊】兒童機舖食玩買!九龍灣動漫樂園及主題餐廳

Posted on June 2, 2017 By       9,190

20170602_COMIC

九龍灣MegaBox除咗多店舖售賣小朋友嘅嘢之外,仲有地方畀小朋友放電,所以一向都大受家庭歡迎。咁啱同班媽媽去開九龍灣玩,好自然就想去MegaBox開餐啦!

 

我哋去咗一間有得食、有得玩又有得買嘢嘅餐廳,玩得好開心呀!去到門口已經見到人頭湧湧,好熱鬧!餐廳都幾多捧場客喎!

 

晴晴仲記得細細個騎過Rody,不過呢隻大好多呀!

 

話明係動漫餐廳,想像中應該會有好多唔同嘅動漫元素。餐廳牆上可見鐵甲萬能俠、Rody、咸旦超人……

 

仲有可愛嘅柴犬添!色彩繽紛!就好似置身響動漫世界之中咁呀!

 

睇完戲嚟tea一tea,心情特別hea。有咩嘢好食呀?聽講呢度最出名嘅係pizza,一於叫下午茶啦!凍飲就連飲品支攪攪棒都係咸蛋超人,好特別!飲都飲得開心啲呀!

 

夏威夷pizza – 新鮮出爐熱辣辣,唔只芝味濃郁,pizza底亦好香脆,果然名不虛傳喎!

 

炸雞髀配什果薯仔沙律 – 平時真係好少食呢啲高卡路里食物,但難得出嚟玩就放縱下啦!新鮮炸起外脆內軟,晴朗食到lam lam脷呀!切晒啲肉畀佢哋,剩番啲頭頭尾尾畀我食,真係有衝動想叫多碟~

 

兩款食物都整得唔錯!睇埋朋友叫果啲先~ 焗法蘭克福腸肉醬意粉

 

鮮果朱古力雪糕配梳乎厘

 

睇個樣都已經好吸引啦!要進行偷食行動先得!

 

嚟嚟嚟!我哋唔客氣喇!

 

晴朗知道食完就有得玩,不停大啖大啖咁食,仲互相幫助添!玩對於小朋友嚟講真係好重要呀!食飽之後,梗係9秒9衝過去遊戲區玩啦!嘩!咁多部遊戲機,玩邊部先好?

 

不如玩我哋最熟悉嘅推寶石機先啦!推咗好多出嚟!但其實屋企已經有好多喇!

 

青娃個口「mark」到咁大肯定好肚餓啦!你拋我又拋,考下邊個眼界準啲先~

 

射水槍,睇下邊個射得高分先~

 

呠呠~~ 讓開讓開!我哋趕住去救火呀!

 

呢部射球機好難玩,就係咁先有挑戰性丫嘛!(但係啲代幣都去得快啲)

 

做下運動啦!未夠高玩真正嘅籃球,玩下呢啲都幾好喎!

 

碰碰運氣掉下彩虹先~

 

呢度啲獎品都唔嘢少㗎!款款都係有質素嘅動漫禮品。不過可惜我哋運氣唔多夠,掉晒啲代幣都要停喇!

 

玩晒代幣唔等於冇嘢玩嘅!齊齊玩番轉rody囉!個個都彈彈下,好搞笑呀!

 

玩完一大輪,臨走不忘行下精品店~

 

店內有各種各樣動漫卡通人物嘅文具、公仔同精品~

 

有梳乎蛋、Rody、超人、迪士尼系列等等,有啲仲要係期間限定,真係手快有手慢就冇喇!

 

晴晴決定帶rody番屋企,朗朗就似乎仲未揀定喎!選擇困難症又發作,冇計,似媽媽嘛!

 

嚟到MegaBox最初只係想搵間餐廳可以畀我哋坐低食下嘢,吹下水。有媽媽提議去Comic Cafe,果然冇介紹錯喎!食物好味之餘,價錢亦相對其他卡通主題餐廳抵食。而且仲有咁多嘢玩,大人同小朋友都樂在其中,好有驚喜!呢度除咗係小朋友嘅天地,大人亦都搵番唔少童年回憶。食玩買集於一身,我哋玩到好晏都唔捨得走,真係一個親子消閒嘅好地方呀!

 

Comic Park & Cafe 動漫樂園及主題餐廳

地址:九龍灣宏照道38號MegaBox 9樓23號舖

電話:2458 6032

facebook: 按此

 

晴朗媽媽
晴晴、朗朗是我的一對寶貝,就讓我和晴、朗一起為大家發掘更多親子玩樂資訊,那便天天都是晴朗天啦!(≧∇≦)