【楠哥BLW二三事】BLW小知識-Gagging vs Choking

Posted on May 17, 2017 By       36,476

20170517_GAG01

有好多媽媽inbox 問我:

「我想行BLW 但怕bb噎親!」

「我BB一食就作嘔,我好驚,唔敢再試!」

「BB一食就咳,佢面都紅曬,我應該點做」

 

初行BLW 嘅時候,最大嘅關口係怕bb噎親,大家一定會好憺心,我明白的。所以以下我想分享下Gagging(作嘔的)同埋Choking (窒息的)嘅分別。

 

「Gagging」作嘔的

意思就係體驗到喉嚨有些唔舒服嘅感覺,引發作嘔嘅現象。情況就好似你扣喉,會有想吐嘅感覺。BB有套自我保護機制,引發想吐嘅感覺嘅位置比我地成年人前少少(以下稱之為「觸發點」),所以稍爲大件嘅食物經過呢個「觸發點」就會令BB 有Gagging(即作嘔) 嘅反應出現,其實果件食物根本就未到喉嚨嘅位置的。初接觸固體,Gagging係正常,係學習嘅過程,BB自己處理到的。媽媽見到BB咁樣唔洗太緊張,更加唔好大呼小叫,或者用手「了」食物出來。咁做BB會好驚,更加快吞,令件事更加差,咁你嘅BB就體驗到一個好驚慌嘅食固體體驗了。

 

遇上了Gagging,楠媽首先在會旁觀察(其實心亂如麻),靜靜看BB自己吐食物,可能會咳,可能會面紅。咁都合理,你諗下,自己作嘔會咩樣(哈)你也可以示範咳咳比佢睇,鼓勵佢吐食物出來。初試食唔到正常,會吐食物更加係叻,要讚BB。因為佢識分那些應該吞,那些不能吞,識保護自己呀。(笑)一段時間後,你幾乎看不到gagging嘅出現。但你仍然要注意給與適當嘅食物比你BB。

 

20170517_GAG03

第一次食乾身食材(日本番薯)的楠哥gagging的樣子(當時6m13d)。雖然未至於咳咳,但係都谷到面仔紅曬,見佢用力推番舊蕃薯出黎。又放入口再食過。楠媽又驚又喜,差點哭了出來。(做媽媽嘅玻璃心你懂我懂。)

 

「Choking」窒息的

意思係有物件阻塞左喉嚨,引致你不能呼吸。噎到嘅人會滿面通紅,會喘氣,無法發聲,難以呼吸,不即時急救後果會好嚴重。情況同Gagging完全唔同。大家可以學習「海姆立克急救法」,萬一出事時,係萬一(其實行全BLW嘅BB好少會出現呢個狀況),做媽媽都有方法應對。不過唔止行BLW啦,BB有好多情況都有機會噎親啦,例如:吞到細件玩具等,學多樣野沒什麼不好。

 

反正楠媽覺得,從學習得到嘅,都屬於自己的,有用沒用都沒所謂,學了就長知識啦。「海姆立克急救法」在網上有好多文章都有提到的。大家有興趣可自行search啦,對3歲以下孩子,成人,或自救都有論述的。所以楠媽形容呢個急救法係,一技旁身,世界通行。(哈~楠媽好浮誇!)

 

另外,香港有些機構會定期舉辦一些嬰兒/兒童急救班的。大家可以去上堂。徵詢一些專業人士嘅意見,咁就萬無一失啦。(楠媽不是專業人士哦,有關急救,煩請大家尋求專業人士意見。)

 

我和楠哥行BLW已經半年了。楠哥現在剛好1歲,幸好沒有用過這個方法急救。至於Gagging,初期有,每次gagging都會令佢進步,我看到的是,呢個情況只會愈來愈少,甚至沒有出現。行BLW愈耐,你只會花時間去研究各種食譜比你BB,諗下佢適合試什麼食材,諗下點樣增加佢嘅興趣。看到寶寶每次食飯時嘅快樂,滿滿嘅自信,小肌肉嘅發展,我都覺得無選錯路。Gagging呢樣野,其實沒有想像中咁可怕。在BLW路上,那份堅持更加重要哦(笑)

 

20170517_GAG02

每次進餐都自信滿滿的1歲楠哥。

 

HappyBLW
楠媽

 

相關閱讀:

【BLW新手包】6m開始自己食 培育自主探索BB

沒有半BLW!在職媽媽可育成全BLW BB

【楠哥BLW二三事】從一固到兩固,由增加長輩信心開始

【楠哥BLW二三事】BB掉食物怎辦?

 

楠媽
楠媽是一位工程師。終極夢想係成為全職媽媽。自從仔仔楠哥6個月大起以BLW方式加固之後開左第一個育兒Facebook Page - 楠哥blw日記。同fans分享BLW食譜,育兒心得。黎緊8月楠哥妹妹藍妹就出世,兩年抱兩,到時定必又有一番新景象。