【新手爸媽佳音】3招令BB一覺瞓天光

Posted on April 3, 2017 By       31,981

20170403_SLEEP

話咁快我家小寶貝已經5個月大了,仍然是每天忙忙碌碌>>> 沒有休息,每天上班泵奶放工親餵仲要沖涼同埋抽時間同佢玩,實在每天身心俱疲,仲有無窮無盡既育兒知識要睇,真係少d努力都捱唔住啊!

 

但每日就算幾忙都要share下生活, 同大家一齊分享下苦與樂,今次要講既係每位身手爸媽都好羨慕嘅瞓過夜系列。

 

我家大Dir現在每晚都由10點瞓到早上6點幾,令到我都可以連續瞓7-8個鐘,基本上晚上10點一食完奶佢10分鐘內就會瞓著,有時我食完奶放低佢,就已經瞓咗。不要以為這是偶然的喇,其實是媽媽用盡心機訓練出來的,以下是訓練重點 (抄筆記),都是用血淚實驗出來的啦!

 

重點一:要BB在清醒的時候就放上小床

不用舉手我也知你一定試過抱抱抱到BB熟睡後小心翼翼放BB上小床,誰知一放上去又醒過來大哭,結果又抱睡,無限loop直至咁啱佢都攰到瞓左為止,但依個時候你已經攰到不得了,何必呢?

 

要改善最主要是一個字——狠心!不要誤會我不是叫你狠心一點打暈BB (之前BB半夜成日醒嘅時侯我真係想打暈佢)。一開始一定會花時間的,但記住,短暫的痛苦會換來之後睡得安穩,值得啊!他朝收獲時你會知道一點點痛苦是值得的!

 

方法是當你發現BB有想睡的signal出現,例如捽眼、「打喊露」等等,請放BB回自己的小床上,如果BB依個時候喊係唔需要9秒9抱返起佢嘅,可以由得佢喊一陣,可以觀察下佢先 (這很重要),睇下佢係完全唔眼瞓唔想上床仔定係其實佢係扭下only。以我baby為例,佢如果眼瞓係瞇埋眼喊嘅,咁我知道佢其實係已經眼瞓只係仲未瞓得著所以扭一陣,扭完一陣 (5-10分鐘)佢就會自己瞓。但如果你係依個時間抱佢佢係就係會好快瞓著,但你一放低佢佢就會醒番,點解會咁?原來係有醫學根據架:

成人的睡眠週期:深眠→1.5小時→淺眠→深眠→1.5小時→淺眠

寶寶的睡眠週期:淺眠→20分鐘→深眠→1小時→淺眠→20分鐘→ 深眠→1小時→淺眠

 

咁大家就明白點解一有咩風吹草動佢就會醒,因為佢根本未過淺眠時間,所以唯有係佢係床仔直接瞓著先有可能令BB係淺眠嘅時間完全不受干擾,安然睡至深眠時間。

 

咁當然啦,如果你話,佢喊咗好耐或者喊到好大聲,咁你可以安撫下佢或者睇下佢係咪有其他問題,所以我剛才話一定要多觀察你嘅BB (係啊, 做父母就是很複雜的)。

 

重點二: 建立良好好睡前習慣

我幫BB建立嘅習慣係:沖涼->食奶->換片->上床瞓覺

 

由佢兩個月開始就每晚都係咁,要建立佢嘅習慣,我唔肯定係咪一定因為咁所以佢依家食夜晚嗰餐奶既時候已經半瞓著,到換埋片就直情已經瞓著咁濟。

 

重點三: 要有良好嘅心態

我聽過有媽媽話「奶睡真好用」,無錯,奶睡的而且確一開始會「好用」,因為你唔需要花額外既時間氹佢瞓,但如果BB依賴咗奶睡先可以瞓,咁佢每次想瞓都會諗起食奶奶,咁每夜佢紥醒咗瞓唔番就會諗起食奶奶,咁你就好難怪佢介唔到夜奶喇。

 

結論

每一個方法都適合不同既BB,我都睇過好多不同嘅訓練方法,本來BB出世前係想用《從0歲開始》嘅父母主導訓練佢,但原來係唔可以咁ideal嘅,因為BB有自己性格,佢唔一定鍾意亦唔一定適用,所以新手爸媽一定要多觀察,多了解自己BB嘅性格,畢竟所有野都要因材施教,唔可以一本通書睇到老架。

 

Dir媽
新手媽媽一名,兒子於2016年9月出世,自懷孕開始喜愛搜羅不同類型的育兒資訊,希望與大家一同分享育兒苦與樂。