【新手爸媽】別為初生BB剃頭的3大原因

Posted on February 14, 2017 By       12,692

20170214_BABY_HAIR2

誰說滿月就一定要剃頭?老一輩的長輩們每當有小B出世,就會千叮萬囑我們要為滿月嘅小B進行剃頭儀式,長輩會話呢個儀式係「習俗」來,做咗對小B會好啲咁話喎!

 

其實信不信真係由你!而我同老公就選擇左「唔信」!

 

點解?不如一齊了解一下「剃頭」既意思啦!

 

解說。傳統習俗 -「剃頭」

依照老一輩說法,新生小B們係滿月當日係需要「剃頭」,要剃除胎髮(即係出世已經有嘅頭髮)。其實當中意義只係想為小B除去穢氣,及希望剃頭之後小B再生出來嘅頭髮會更濃密亮麗。另外,仲會為小B留起剃出嘅頭髮,以用作製作「胎毛筆」之用,以祈求小B聰明伶俐,讀書精叻之喻意。

 

題外話: 「胎毛筆」起源典故

「胎毛筆」起源於約一千五百年前嘅南朝時代,起初只是朝廷用來褒獎忠義學優嘅人,但到咗唐宋年代,「胎毛筆」就轉變為書香門第嘅象徵。相傳唐代有位窮書生以胎毛筆上京赴考仲高中狀元添,因此胎毛筆又有狀元筆之稱,據說代代相傳能帶來幸運。

 

我曾經喺小B返健康院檢查嘅時候問過姑娘,「到底小B駛唔駛剃頭呢?」當時姑娘嘅解說令我同老公更清楚知道「剃頭」其實就只不過一種「習俗」而已,對小B無真正用處,反之卻有機會誤傷小B添!所以我地堅決咁向長輩們Say NO!

 

點解唔好「剃頭」?

姑娘解釋話係由於小B們嘅頭皮比較薄,容易喺剃頭時造成對毛囊既刺激不均勻而引起剃頭之後頭髮增長速度不一嘅現象。

 

而且因為小B們主要都係長時間瞓覺,所以對頭皮壓迫時間相對長,因而引致後尾枕頭髮容易脫落及生長緩慢。但呢個情況係正常嘅,與缺鈣無太大關係,所以爸爸媽媽們唔需要太擔心。

 

另外,姑娘亦提醒諸爸爸媽媽們即使要小B們跟隨習俗「剃頭」, 亦可以剪短頭髮來代替,盡量唔好剃光,以免毛囊受損,到時就得不償失架啦!

 

「剃頭」也有害?

剃頭嘅習俗雖然說可以令小B們新長出來嘅頭髮更濃密亮麗,但呢一點一啲科學根據都無。反之剃頭不當卻會為小B帶來傷害,影響深遠,所以爸爸媽媽們要小心處理!

 

1. 影響小B散熱功能

頭髮本身具有散熱同溫度調節既功能,如果幫小B剃頭嘅話就會減低散熱作用,再者,如果小B頭部曝露係陽光底下亦會較易引致曬傷嘅可能。

 

2. 容易造成頭皮傷害,增加細菌感染的機會

因為小B們嘅皮膚比較幼嫩,剃頭既時候會容易傷害到頭皮或毛囊組織,容易令小B感染細菌或增加皮膚問題等情況。再者,因為小B頭骨同神經系統尚未發育完整,如果剃頭既話真係要好小心,以免誤傷及頭骨及神經系統。

 

3. 減低對頭部既保護

頭髮有助保護及減低小B們頭部撞擊或受傷時嘅損害。

 

如果爸爸媽媽依然想幫小B剃頭嘅話,就要小心注意工具嘅清潔,同時唔好幫小B剃得太貼,可以幫小B剪短啲頭髮都係一樣架。

 

「剃頭」其實只係一種習俗,同小B頭髮多與少、濃密與否並無實質關係,最緊要小B開心健康成長先係最重要!

 

傑。斯與晴
在職80後情人節媽媽與元宵節寶寶。新手媽媽細數生活中點滴的動人時光,紀錄及分享育兒小心得。