【澳門親子之旅】偽文青之井井三一繪本書屋

Posted on February 8, 2017 By       7,571

306

依家澳門真係越嚟越多親子消閒活動,除左一啲動態活動之外,當然就唔少得文靜一面,所以就帶小小豬嚟到依間開業一年多嘅井井三一繪本書屋,扮下偽文青吸收一下文化氣質啦~

 

其實我又點會咁叻搵到依個好地方,就係一次同魚子媽講開澳門親子活動,佢就介紹左依個正地方俾我。小小豬一向都好鐘意睇圖書,知道有依個好地方就當然好想嚟睇一轉,所以就係今次嘅澳門之旅加插依一個啱晒兩位老細嘅行程啦!

三三井一兒童繪本書屋就係位於澳門聖祿杞街31號,其實我都真係唔多識路,不過好在事前問左係澳門工作嘅舅父仔,我地搭巴士去到水坑尾站,然後開手機沿住GOOGLE MAP提供路線,行左大約十分鐘左右就到啦!

一嚟到小小豬就已經急不及待要入去啦

DSC06501

整體上地方就唔算大,不過店內擺設整整齊齊,而且地下仲鋪著坐毯,整體感覺都好舒服呀

DSC06502

佢個書架高度唔會太高,方便小朋友隨手拎繪本閱讀,完全感受到店主係以小朋友為先,真係相當貼心呢

DSC06503 DSC06504 DSC06505DSC06537

進入繪本閱讀區就需要脫鞋,所以衛生為由,大家記得要著襪呀~

DSC06510

小小豬就當然唔理咁多,揀好自己鐘意嘅繪本坐定定慢慢睇啦~

DSC06511

最令我欣賞嘅就係店主將部分書籍都以開放式咁擺放出嚟(大部分都係有趣嘅提材),可以吸引小朋友嘅目光,從而鼓勵小朋友多閱讀嘛

DSC06520 DSC06527

店內除左有適合唔同年紀嘅兒童繪本之外,仲有一啲係俾家長嘅親子教育書籍,同埋啱成年人嘅書籍,完全係大人同小朋友都可以照顧呀

哈哈哈…我家教育部部長都好專心,因為佢要幫小小豬搵啲合適嘅繪本為首要任務

DSC06513

當然我都有細心睇,當然都睇左好多兒童繪本,但最令我印象深刻嘅就係依兩本書,我絕對唔係有什麼歧視,只係覺得台灣繪本點解可以咁大膽,咁快就同小朋友談及如此大膽嘅話題

DSC06529

另一系列我都好有印象,就係以第三者角式嚟面對死亡及受傷,我想小朋友睇完都可以明白更多(其實….係我自己得到反思就真)

DSC06533

估唔到一個小小嘅地方都可以逗留個幾鐘,如果唔係因為約左舅父仔食飯,我想小小豬都唔未打算走,因為佢話係度睇圖書好舒服哦

DSC06532

當然….我地就唔止嚟睇書,其實一早都打算買幾本俾小小豬(買圖書就係老公最樂意之事)。今次就買左小小豬都睇中左三本繪本,等佢返屋企慢慢睇啦

DSC06538

三本繪本就用左$280,價錢唔算特別平,不過我覺得都係正常價。不過要提一提,付款係可以俾1:1港幣,不過店員只可以找回葡幣俾你,所以大家要留意啦。其實都冇所謂,因為轉頭食晚餐可以用返葡幣俾錢嘛

IMG_7762

我覺得完全一間可以享受親子閱讀嘅書店,係我地逗留嘅時間內,完全可以話係自由活動,一啲購書嘅壓力都冇,而且店員都非常親切,感覺到她們唔係為賣書賺錢,而係想打造舒適親子閱讀空間。

DSC06643

其實井井三一繪本書屋仲會定時舉行繪本活動,當然我係香港就唔可以參加啦。不過係佢地FACEBOOK專頁(井井三一繪本書屋)留意下,因為佢地成日都會有好書推介,可以對繪本有更多認識嘛!

 

KinseyMaMa
一切以小小豬為中心,讓小小豬擁有一個快樂的童年為目標。同隻百厭豬一齊整嘢食又周圍去玩, 記錄我們這一家嘅生活傻事,讓大家可以陪同小小豬一起成長。