【神奇止咳洋蔥水】洋蔥蘋果水

Posted on January 11, 2017 By       56,274
IMG_6810.jpg

依排天氣都真係好飄忽,上星期就好似夏天熱熱的,今日又開始翻風,星期六仲話會得十幾度,溫度好似坐過山車,所以大家都要小心身體,新年將至…千祈唔可以病呀!

 01.jpg

小小豬依排都有幾聲痰咳聲(我估都係早前為食之過,食左好多雪糕啦!),有朋友仔知道小小豬咳就俾左一個古方我,話佢個囡囡飲左兩次之後就止晒啲咳,佢叫我試下整俾小小豬飲。有佢嘅成功經驗,再加上屋企又有齊晒三樣材料,所以就試下依個洋蔥蘋果蒜頭水啦

 

其實只係三樣材料就可以止咳,聽落又真係好似好神奇,不過其實洋蔥水之前都有好多朋友介紹過話係好有效,就連嚴浩都有介紹過。今次朋友仔依個古方就加左同樣可以殺菌嘅蒜頭,同埋又有蘋果嘅甜味,咁就即係變左勁易入口嘅甜水啦!其實之前一直唔試整洋蔥水,不過就好怕個味小小豬唔鐘意,煲左唔飲就即係浪費我啲心機,依家有左蘋果味,小小豬都應該唔抗拒,所以就試下。

 

一人份量就只係需要一個洋蔥、一個蘋果同埋三粒小蒜頭

02.jpg

洋蔥去皮之後切細塊;蒜頭去皮後拍鬆

03.jpg

蘋果去皮切細細塊,平日我都鐘意用埋蘋果皮煲湯,因為蘋果皮都一樣好有益,但今次係需要燉啲蘋果汁出嚟,冇皮係會多啲汁出嚟呀

04.jpg

係燉盅內倒放一個碗,然係將所有材料鋪上去

05.jpg

然後放入電子燉盅內燉45分鐘(如果用明火隔水蒸燉的話30分鐘就可以啦)

06.jpg
07.jpg

時間夠就可以將食材取出

08.jpg

拎走個碗就可以見到製成品洋蔥蘋果蒜頭水,原來燉出嚟都唔係太多,真係滴滴皆辛苦呀…哈哈哈

09.jpg

係燉嘅過程,其實整個廚房(廳都有啲)都充滿洋蔥味,所以都有丁點擔心唔知係咩味,小小豬唔肯飲。當然我都有試返啖,原來個味道又真係唔差,甜甜地又幾易入口哦,唔怪之得小小豬飲得咁合作啦~

IMG_6807.jpg

咁止咳方面又點呢?小小豬飲左又真係好似咳少左啲啲,就算咳嘅時候痰聲都少左,我估唔多唔少都同飲左依個洋蔥蘋果蒜頭水有關,等我聽日再燉多一次俾小小豬飲,睇下可唔可以止晒啲咳先。

 

依個古方對小小豬起到小小效用(小小豬似係寒咳,因為入夜後先會咳),但亦有可能未必適合所有人,因為咳都有分寒咳同熱咳,雖然洋蔥就係屬較中性,不過大家係試之前都係要了解自己體質先呀!

 

KinseyMaMa
一切以小小豬為中心,讓小小豬擁有一個快樂的童年為目標。同隻百厭豬一齊整嘢食又周圍去玩, 記錄我們這一家嘅生活傻事,讓大家可以陪同小小豬一起成長。