【帶著小B去旅行】申請台證.執行李.帶母乳上機篇

Posted on December 14, 2016 By       9,613

20161214_travel01

轉下眼,距離帶小JM出走香港既日子仲有唔夠一星期!真係攪到媽咪都有啲緊張呀!因為真係好怕會帶漏野,今次「帶著小B去旅行」嘅目的地係台中,所以除左申請護照外,亦要為小B準備埋入台證。

 

當小JM領取護照之後,媽咪就負責為全家人申請入台證。而家申請台證已經比早N年方便好多,以前要去辦事處申請及付款,到後期可以上網申請付款及列印出入台證。時至現在,就更加方便得多,只要上網輸入申請者的資料就可以,而家亦改為以單一張台證用以出入境,省卻左因為一時「大頭蝦」而漏印回程台證嘅煩惱添!

 

入台證點申請?

入台證申請網址:

申請入臺證 -內政新移民署【網路申辦服務】

 

進入網址後,只需要根據指示輸入相關資料就可以,當完成整個輸入程序後,只要按下「確定/OK」按鍵就可以提交。

20161214_travel04

 

注意事項:

1. 有關身份證號碼的部份係「不需要」填寫括號及括號內既數字,而且最多只可輸入八個字元架咋!(護照如有括號,處理方法亦一樣)

2. 來台地址可以填寫在台灣入住的酒店地址

 

提交後會顯示你已經輸入嘅資料,以方便核對,如無問題就可以到下頁輸入Code,輸入後就已經完成整個申請程序架啦!

20161214_travel06

 

如果想查詢返申請結果或列印,亦可以係同一個網站查閱。而查閱時必須輸入以下資料組合先會成功查閱:

1. 申請者姓名+護照號碼;或

2. 申請者姓名+身份證號碼;或

3. 護照號碼+身份證號碼

*記得記得記得 要列印呀!*(因為好重要,所以要講三次)

 

完成台證呢一部份之後,我就為小B嘅行裝做咗份清單,方便到時執野用!

20161214_travel03

 

以小JM為例,星期日嗰陣我已經幫小JM執咗大部份行裝同用品。小JM一個人仔就已經裝滿成個手提行李喼,行裝同用品之多真係有啲嚇人。

 

為咗更方便及慳位,爸B係吉豬島店買咗三Pack 捲動式既壓縮袋,將原本小JM半喼滿滿嘅衫都壓縮晒。

20161214_travel07

 

尿片篇:

尿片其實唔需要帶太多,可以帶定由尿片商提供嘅試用裝,抵埗後先再買亦係一個唔錯嘅方法!

 

食物篇:

為咗小JM係機上可以乖乖地唔扭計,作為媽咪嘅都為小JM預備咗好多小食以備不時之需。除咗小食之外,仲為小JM預備果汁添!(今次為食嘅小JM真係可以放題任食啦!)

20161214_travel05

 

係我正煩惱緊出外個陣餵果蓉/粥仔點算好嘅時候,我發現左一樣「好東西」,可以好方便咁幫我完成「使命」又唔駛攪到好輪盡!不過就貴少少,HKD$85 十個一盒。

20161214_travel02

 

除咗食物之外,亦帶咗啲私家米去煮粥,要煮粥又要方便,就緊係帶定燜燒杯啦!雖然係多野帶咗啲,但係就好享受,可能係因為第一次帶小B出遊啦!

 

攜帶母乳上飛機?

因為小JM係母乳BB,所以我亦事先查詢咗有關攜帶母乳上機嘅問題。而根據機場管理局嘅講法,如果同行有36個月以下嘅小B一齊搭飛機既話,同行成人就可以帶母乳上機,而且數量不設限。而需要攜帶雪藏母乳的話,只可以帶唔超過2.5千克嘅乾冰上機。但係登機同安檢嘅時候必須知會機場人員,以免引起不必要嘅誤會。

 

預備好晒所有野之後就緊係要預備埋個輕鬆心情準備一家三口放下假啦!

 

傑。斯與晴
80後情人節媽媽與元宵節寶寶。前Playgroup導師、現職Marketing Firm既新手在職媽媽,喜歡細數生活中與小JM既點滴動人時光,紀錄及分享育兒既小心得、幼兒食譜分享、親子旅行及購物分享。