【育兒】BB睡眠有辦法!?

Posted on December 6, 2016 By       10,005

20161206_SLEEP

小JM已經六個月大,自從上星期開始半夜會不停醒來搵奶嘴,再安慰自己再瞓返,但如果咁啱奶嘴並唔喺手邊或手仔觸及得到嘅範圍內的話,小JM就會開始 「求救」,希望爸B同媽咪會係夜裡「出手相救」。

 

遇著半夜小JM求救,媽咪又點會真係袖手旁觀(旁睡咋掛?),點都會起身出手幫下小JM,幫佢搵返個奶嘴嘅(唔係就會嘈醒埋爸B架啦……)。

 

但最近小JM半夜醒嘅情況越來越多,到底點解呢?

 

為咗解開呢個「謎」,我呢位新手媽咪亦上網搵咗啲資料睇下,希望了解下係咩原因同時希望幫小JM改善一下睡眠質素。

 

到底BB們有無特定「睡眠模式」呢?

其實每個BB都會有唔同嘅睡眠模式,而且睡眠模式仲會隨著BB長大而有所改變。(就好似我地大人咁,越大越夜訓囉……)

 

一般而言,BB越大睡眠模式亦會跟著轉變:

1. 初生至三個月

.一日大約瞓15個鐘左右;但每次可能只會瞓2至3個鐘

.每日瞓覺次數不等,因為BB仲係適應期,嘗試適應係母體外嘅環境,所以小BB瞓覺係不分晝夜架!

 

2. 三至六個月

.每日睡眠時間會少於15個鐘,而且睡眠時間已經明顯比以前長,可以瞓到3至4個鐘

.呢個時期嘅BB已經開始慢慢適應母體外嘅環境,而且仲開始慢慢會On Schedule 咁去食同瞓添

.BB已經開始習慣左 「夜晚要瞓」呢個定律,所以夜晚嘅睡眠時間明顯比日頭長

 

3. 六個月或以上

.每日依然可以瞓上十幾個鐘,每次約3至4小時左右

.BB開始識自己調節睡眠時間(真正係:一覺瞓到大天光!爽呀!)

 

當然,BB亦會因為某啲因素而影響睡眠質素,變到好似小JM咁,半夜醒幾次……(唔知係咪吽緊牙仔呢?)

 

另外,原來BB同我地大人係有樣野特別唔同架,就係……BB會越攰越興奮!所以我地唔好係瞓覺之前同BB們玩得太過興奮,以免BB夜一夜都唔願瞓。

 

BB瞓得唔好會有咩影響?

大人瞓得唔好都會忟憎暴躁,何況係BB呢?如果你無足夠睡眠同休息的話,BB都會因此而影響到情緒,會變到好忟憎豬,成日扭計,再者就會影響到BB嘅食慾、新陳代謝同吸收,咁就會直接影響到BB成長架啦!

 

相反,BB有充足既睡眠的話,瞓醒嗰刻就當然醒神一啲開心一啲啦!

 

點先令BB易啲入睡?

由小JM初生到而家都試過好多種唔同方法,而且隨著小JM越來越大之後,有啲方法亦好快變得唔Work。

 

1. 用包被包住BB,增加安全感(札粽咁札)

2. 臨瞓前沖涼

3. 沖涼後按摩

4. 沖涼後食奶瞓

5. 聽住「白嘈音」來瞓

6. 較暗燈光(個人認為呢樣好重要,因為要令BB知道日夜)

 

以上係小JM 初生到頭兩個月嗰陣我都試過,但漸漸到小JM大咗啲之後,包被同白嘈音已經對小JM無效……可能真係越大個越瞓得少嘅關係,小JM而家食完奶反而要玩好一陣先肯瞓……

 

以上之中,沖涼來講係對小JM最有效,每次沖完涼,只要帶小JM返房由佢自己碌來碌去一陣就會好快瞓著,真係最慳水慳力。

 

唔知你地嘅小寶貝又係點入睡架呢?

 

P.S. 我同爸B都係唔主張抱住小JM直到佢入睡,因為我地唔想做咗「人肉搖籃」。

 

希望爸B媽咪們同BB一樣有充足既睡眠啦!

 

傑。斯與晴
在職80後情人節媽媽與元宵節寶寶。新手媽媽細數生活中點滴的動人時光,紀錄及分享育兒小心得。