【孕媽媽】瑪麗醫院生產後記之黃金初乳

Posted on November 15, 2016 By       5,701

20161115_milk01

幾經辛苦終於將臭豬B帶咗來呢個世界,生產時候嘅痛楚竟然畀臭豬B嘅降臨而掩蓋過,感覺真係好微妙,真係好開心好興奮,但同時亦好感動。因為,我終於成為臭豬B嘅媽媽啦!

 

媽咪都好多謝臭豬B能夠降臨我地嘅家,為我地帶來喜悅!臭豬B,你要記住呀,我地屋企每個人都會好愛錫你愛惜你架,你要健康快樂咁成長,咁樣爸爸媽媽就會好開心滿足架啦!

 

回顧:

當臭豬B降臨嘅一刻,整個產房都再一次熱鬧起來,大家都好開心咁去迎接呢個小生命。助產使好好人咁畀我望咗臭豬B一眼先再帶佢去簡單清潔,而我就要繼續努力「痾」埋個胎盤出來,助產使姐姐好好人,有用手幫我按肚等我可以更易完成呢個Last Step。攪掂之後就幫我檢查會陰,助產使姐姐話我做得好好,所以個會陰無撕裂,只係少少擦損,唔需要縫針,等自然癒合就好了

 

呢個moment真係要多謝臭豬B,多得佢乖乖地我先唔駛挨縫針既痛(抵錫)。當臭豬B抹乾身,而我又完晒啲檢查後,助產使姐姐就將 臭豬B交到我身上。嗰個Moment我真係有少少忍唔住想喊,因為我真係真係要做媽媽啦!個感覺比係之前臭豬B係我肚入面更強烈,實在太感動了!

 

助產使姐姐好好人咁同我地講話可以畀兩個鐘我地同BB係產房相處,但係助產使之後就話因為臭豬B之前照超聲波見到腸有光影,需要今晚去兒科留醫,要聽日先返來我身邊,嗰下聽完真係又有啲失落,所以更加珍惜呢個屬於我地一家三口嘅 “Our First Moment” ,而助產使姐姐係離開產房之前亦主動話幫我地影張全家幅。

 

我地一家嘅第一張既合照特別有紀念價值,Welcome to the World My Dear Babe!

 

因為BB係肚入面嗰陣check到啲腸有光影既關係,所以當離開產房嗰陣我就要同BB短暫分開一晚。好記得當晚嘅心情,其實真係會有種莫名既失落,身邊床位嘅媽媽都有BB陪,而我就無……嗰陣真係有種說不出既悲傷,尤其係當我摸住個肚,已經感覺唔到同BB以前嘅嗰種親近,再加上被其他嘅BB喊聲圍繞著,真係有想喊嘅衝動。我好清楚知道坐月嗰陣喊係唔好嘅,所以就唯有忍住,乖乖地係床度休息,再同老公係whatsapp傾計。

 

QM嘅姑娘好好人,佢地會教你點樣擠奶而唔日整痛自己,我發現呢個手勢都幾重要,因為當你損咗唔啜得唔泵得嗰陣就大派用場啦!(因為BB唔係身邊未有得埋身住,只可以擠出儲落針筒拎去兒科)

 

** 第一次擠出嘅母乳叫做「黃金初乳」,係最有益架**

 

姑娘一路幫我擠一路覺得驚訝,仲讚我叻,因為一次過擠到15ml,姑娘話多數人未咁快上到奶,擠到5ml已經算好好,仲話估唔到我可以擠到15ml。其實聽完姑娘咁講真係加強咗我對餵母乳既信心,知道原來自己都唔係咁渣豆,所以我更加要努力。

 

當我擠完奶無耐,又到咗探病時間,老公、奶奶同媽咪都來咗睇我,我第一時間唔係顧自己,反而係叫老公代我拎啲奶上去俾BB(因為生完對腳無咩力,要去到當晚11,12點先可以落地磨住地咁行咋)。老公上咗成大半個鐘有多先返落來,而我都食飽飽,就係呢個時候,老公就拎出佢嘅手機,畀咗好多佢啱啱係兒科度影嘅臭豬B相同影片畀我睇。一係唔睇,一睇又有啲眼濕濕,我仲同老公講我好掛住BB,老公就安慰我話:「傻嘅,BB係兒科檢查之嘛,無事就會返來架啦嘛,你應該趁呢個時間休息下就真,唔係之後點照顧BB呀。」

 

的確,老公講嘅都好啱,所以我都乖乖地咁休息,瞓咗一覺好嘅。另外,亦要多謝老公支持我餵人奶,呢個都係我嘅動力之一。

 

到咗第二日10點零左右,姑娘推返BB來畀我啦終於,一見到BB嗰陣真係有一種講唔出口嘅喜悅。當然,我都把握時間去試下親餵,增加我同BB既相處時間。

 

BB,請多多指教!大家都係新手,要高抬貴手呀!

 

Day 2嘅臭豬B,食飽飽就露出滿足嘅笑容,呢個笑容係媽咪最想見到同最鍾意嘅,多謝你呀,臭豬B!

 

今日係老公生日,咁啱就係探病時間前臭豬B返到我地身邊,唔通BB 早咗出來真係為咗同爸爸慶祝生日?我估應該都係,因為當老公幫BB換片片嗰陣BB整左個蛋糕畀爸爸呀!

 

老公/爸爸,生日快樂呀!(Btw,點解你個動作好似咁老積咁嘅?!)

20161115_milk03

 

Day 3嘅臭豬B,今次食飽唔止係瞓咁簡單,直頭係暈左。

20161115_milk02

 

好啦,臭豬B,我地今日返屋企啦,以後你都要乖乖地呀,食多啲訓多啲又Bubu多啲,咁就快高長大架啦!

 

小學堂:何謂「黃金初乳」?

「黃金初乳」其實係指BB出生後頭幾天嘅母乳,因為初乳含有天然抗體、活免疫細胞、酵素等都可以幫BB增加免疫力,有助BB抵抗同預防疾病。另外,因為母乳有輕瀉作用,可以幫BB排出胎便,減低黃疸既機會,所以真係可以話比起黃金更可貴架。初乳份量雖然少,但足夠供給俾初生的BB,因為初生BB嘅胃其實好細,就好似一粒櫻桃咁!所以準媽媽們係唔需要太擔心架!

 

傑。斯與晴
在職80後情人節媽媽與元宵節寶寶。新手媽媽細數生活中點滴的動人時光,紀錄及分享育兒小心得。