虎乳靈芝無花果百合湯

Posted on August 10, 2016 By       7,128

bk_couplet

虎乳靈芝我都幾鐘意煲,因為味道唔錯之餘好飲又有益。見屋企仲有一份虎乳靈芝係度,所以又嚟煲個虎乳靈芝無花果百合靚湯,等小小豬增強抵抗力啦

小朋友容易感染傷風咳嗽,所以用虎乳靈芝加埋無花果、南北杏同埋百合一齊煲,有補血氣、強體質及潤肺止咳嘅功效呀!

虎乳靈芝可能唔係太多人識,就等我再同大家分享下先。其實個名就係叫靈芝,但就唔係屬於靈芝科,係真菌科嚟,對補益肺氣,增强肺都有一定療效。平日小朋友出入冷氣,很容易感染傷風感冒,所以飲多啲可以預防傷風感冒、强壯體質同埋增強抵抗力,打好個底咁就唔怕易病啦

IMG_8911

材料:虎乳靈芝(我買左一両,落左三分一份量)、無花果四粒、蜜棗三粒、南北杏一湯匙、百合半兩、蓮子半兩及瘦肉$40

IMG_8908所有材料先浸洗十分鐘;瘦肉洗淨汆水備用

IMG_8916

煲內放約3L水,水滾後放入所有材料

IMG_8918

待再次滾起時,用大火加蓋煲約半小時,最後轉慢火加蓋煲一個半小時

IMG_8947

加少少鹽調味就飲得啦

小小豬一向都鐘意飲乳靈芝湯,所以今次都唔例外,話咁快就清左兩大碗了。依個湯雖然係好飲又有益,仲非常啱小朋友飲添,不過….如果係病緊嘅時候就千其唔好飲住,要等好番先可以飲啦!

IMG_8955

溫馨提示:由於材料都涉及藥材成分,所以係好因應個人體質,大家記得煲之前了解下自己,或者問下相熟中醫/藥材店職員,呢個湯料啱唔啱自己呀!

KinseyMaMa
一切以小小豬為中心,讓小小豬擁有一個快樂的童年為目標。同隻百厭豬一齊整嘢食又周圍去玩, 記錄我們這一家嘅生活傻事,讓大家可以陪同小小豬一起成長。