自家廚房:光波蜜糖香茅雞翼

Posted on May 25, 2016 By       8,345

IMG_4927 早幾日係網上見有朋友仔分享左自家醃製嘅蜜糖香茅雞翼,睇落又真係好簡單,加上屋企仲有一份香茅係度,所以我又跟風整埋一份,估唔到真係超惹味,好味到停唔到口呀 IMG_4818 由於係自家醃製,所以就要預早一晚將啲雞翼醃左先。材料看似係好多,不過大部分都係屋企現有嘅,所以要額外買嘅都唔算多。 雞翼兩磅、香茅4-5枝、蒜頭1粒、薑1小舊、魚露2湯匙、豉油1湯匙、黃糖1湯匙(可用普通砂糖代替)、紹酒半湯匙、黑椒適量、泰式青檸1個 雞翼溶雪後洗乾淨備用 IMG_4822 香茅拍一下再切段 IMG_4820 將少許香茅、薑及蒜頭切碎,我就好貪快地用左攪拌機將三種材料整成蓉 IMG_4825 將所有材料(混蓉、香茅、魚露、豉油、黃糖、紹酒及黑椒)加到雞翼後撈均 IMG_4828 IMG_4835 最後加入埋青檸汁 IMG_4838 再撈均後,等醃過夜就可以準備拎去光波。係醃嘅過程如果可以的話,間中就拎出嚟反一反咁撈均啲雞翼,咁啲雞翼味道就會均勻啲呀 IMG_4842 醃左一晚就可以開始光波,用高架預熱光波爐240度3分鐘,然後加入雞翼光波8分鐘(入光波爐前盡量撥走啲香茅段,如果唔係就會好似燶,黑卒卒出嚟唔靚呀) IMG_4912 之後兩邊都掃上蜜糖,最後反轉再光波5分鐘 IMG_4916 熱辣辣新鮮出爐嘅蜜糖香茅雞翼就食得啦 IMG_4923 絕對唔係自己讚自己,啲雞翼真係醃得好入味,好香嘅香茅味再帶有少少青檸嘅酸酸甜甜味,睇我家兩位老細密密食,就知係好食到唔識形容啦,小小豬仲一個人都食左我4大隻呀…哈哈哈   自己醃當然係比買現成醃好嘅嚟得更有成功感,老公咬第一啖時都已經話好得,仲叫我整定多啲係屋企,咁幾時都可以食到好味雞翼啦!   其實除左光波之外,都可以用煎、焗或BBQ依啲方法嚟煮雞翼,所以唔怕食唔到咁好味嘅自家醃製雞翼呀!

KinseyMaMa
一切以小小豬為中心,讓小小豬擁有一個快樂的童年為目標。同隻百厭豬一齊整嘢食又周圍去玩, 記錄我們這一家嘅生活傻事,讓大家可以陪同小小豬一起成長。