【親子好去處】大學附近有農場

Posted on May 18, 2016 By       9,773

kim_1

今日係清明節,同埋一班識咗多年既老友嚟親親大自然。

 

因為想搵個農場去得嚟又唔想去錦田上水! 所以我今次就搵咗個新地方 – 清新地 Nature’s Harvest 有機悠閒莊園。

 

kim_2

只係喺科大門口迴旋處小巴站,沿山路樓梯直落到尾!

 

kim_3

(行去前邊就會見到有指示牌)

 

kim_4

(就係呢條樓梯向下一直落)

 

kim_5

(唔好以為行幾分鐘就到,其實好很長!)

 

kim_6

(見到隔離呢幾間小木屋,呢度就係清新地啦!)

 

等我先影吓場地環境! 好大(當然唔夠新界大)

 

左邊一排小木屋供工作坊之用,右邊係農田,大草地同遊樂設施,

 

佢每個時段都會有人數限制,盡量控制唔會逼爆,俾大家都可以好自在好舒服咁享受。

 

kim_7

 

kim_8

 

kim_9

 

仲有個景點位置,紅色大風車!

 

kim_10

 

呢個係我哋今次Join個Package,每位$160(大小同價)

包括:導賞+盆栽製作+鬆餅High Tea+自製冷麵

 

當然可以隨你喜歡選擇自己想要的活動組合。

 

呢度職員全部都好Nice好有禮貌同好願意幫助人! 記得起初係先係透過fb inbox同負責人傾,之後在whatsapp繼續傾! 因為我都頗多問題問,希望可以安排好D,等自己一班老友都玩得開心!

 

但係負責人都冇嚴我煩! 所以真係好多謝佢既耐性。

 

其實嚟清新地仲有一個途徑,大家可以喺西貢白沙灣碼頭上船,我叫佢做卜卜艇! 單程票價$30(大小同價) 不過要預先同負責人講,佢會幫你安排埋! 時間大約10-15分鐘就可到達清新地,你可以選擇搭一程或者來回都得!

 

至於時段就隨你鍾意想幾點嚟都得,我呢個package差唔多兩個鐘內就會完成,之後可以繼續留低玩,玩到佢打烊!

 

另外呢度都有羊同兔仔,可以買草餵佢哋,但係佢哋就孤單D,各得一隻! 如果你下晝先嚟,可能佢哋都食飽!

 

芊芊見到兔仔好興奮,一路要企喺個籠側邊望住佢! 自己一行近又要驚又要望。

 

kim_11

 

職員首先安排咗我哋一張枱坐低,大家抖番陣氣就開始去另一間小木屋去做鬆餅。

 

大家既行裝都可以放番喺張枱度,貴重物品跟身就可以了!

 

kim_12

 

我哋每個兩個小朋友一組,職員先俾個大膠箱我哋,分派發粉,牛油,糖,牛奶同提子乾等!

 

kim_13

 

我哋一組可以大概做到三至四個鬆餅,

媽咪專登有D做到唔同形狀。

 

初形出咗嚟啦,準備拎入去個焗爐度焗囉!

 

kim_14

 

鬆餅就係咗焗爐喇,我哋洗乾淨對手就開始去做小盆栽啦。

 

今次整既係小薄荷葉,泥土同水都準備好,小朋友只要拎起交剪去剪一小棵上嚟就OK!

 

kim_15

 

姐姐叫小朋友可以拎上手聞一聞!

 

哥哥剪係要媽咪陪住,相反芊芊剪我哋就好放心,大家知點解啦……

 

kim_16

 

每個小朋友都拎住個盆去裝泥土,然後將小薄荷葉插進泥土。

 

kim_17

 

種完個小盆栽之後我哋就番去睇我哋新鮮出爐既鬆餅lu!

 

嘩好香好靚呀,點解咁易整我仲要出街買嚟食……

 

kim_18

 

我哋拎到番去先放番自己張枱,然後職員集合我哋去農田嗰邊進行導賞啦,

 

突然之間熱起上嚟,天文台又一次失準!明明尋晚睇APP仲話今日冇太陽同埋會落雨。

 

但係我都望佢唔準既,如果落雨就仲煩!

 

kim_19

 

但係真係好曬,攪到芊芊都冇咩耐性聽落去,始終佢太細個都明白職員講解,

 

佢只想快D去玩瀡滑梯,所以我就早少少同佢行開去遊樂設施嗰邊玩一陣。

 

kim_20

 

但係意外嚟啦,我拎住相機幫芊芊影相,芊芊自己慢慢爬上去,點知係樓梯上面有條橫樑,佢未爬到上去就企起身個頭就撞落去,之後佢成個人向後倒碌咗落樓梯。

 

哎吔!!! 真係太危險! 其實我都唔係好明點解會有條橫樑喺度!

 

佢好叻,只係喊咗一陣就停咗,同佢洗個面抖一陣,就再嚟過!

 

導賞完咗之後我哋就番埋位食自己親手整既鬆餅,因為大家都有D肚餓啦!

 

kim_21

 

原來食落都唔差喎,好好食! 外面焗得少少鬆脆,裡面唔會太乾! 佢哋兩隻嘢每人都食咗兩件!

 

我哋除咗食自製既鬆餅,我哋每個家庭都帶咗D水果,菠蘿膠,零食,紙包飲品嚟一齊分享。

 

呢度都有飲品賣,話俾你知一罐汽水$10做個標準!

 

之後我哋出到外面打吓羽毛球,雖然外面真係超熱,但係小朋友有得玩就乜都唔驚!

 

kim_22

 

番到嚟最後一個付費活動,就係整冷麵啦! 當然麵團都係呢度一早就搓好,小朋友只係幫忙搓兩下,跟住攪機厭扁佢,之後搽上粉再落機相反方向攪出麵條。

 

kim_23

 

然後就交俾職員哥哥將麵放入水煮熟佢! 跟住再放佢入冰水度過冷河。

 

就可以去另一個姐姐度加餸,佢會幫你落芝蔴醬,然後會叫小朋友自己夾蟹柳,跟住佢再幫你打隻溫泉蛋落烏冬度! 你可以自行選擇要熟蛋,佢會預備咗少量既熟蛋俾有需要既小朋友,再落少少芝蔴碎就大功告成啦……哥哥去開餐先。

 

kim_24

 

上晝既自費活動終於結束啦! 整鬆餅,種盆栽,整冷麵都好開心! 唔會話好趕好趕咁。

 

自在地中午在室內享用所有自製及帶來的食物! 跟住呢班小怪獸梗係開始要出動啦!

 

呢度有好多唔同既設施俾佢哋放電!

 

kim_25

 

kim_26

 

玩吓玩吓見到遠處仲有一個地方,唔知係咩嚟…原來都係屬於清新地的範圍,

聽講係佢哋全新開放既地方,上年都未有! 呢度都係設有兩間小屋同埋一些兒童玩樂設施,更適合年紀較細既小朋友。

 

不過佢哋停留咗冇幾耐,最後都係番嚟呢邊玩! 可能嗰邊真係唔夠刺激卦。

 

但係估都估唔到最後班馬騮原來最鍾意係留喺度玩沙!

 

哥哥仲玩出咗一幅好有藝術成分既人臉沙畫! 太利害了吧~ ~

 

kim_27

 

最後我哋差不多玩到3:00點就執嘢離開啦,大家都可以早D番去休息,始終第二朝係工作天同小朋友番學! 短短四個鐘大家都覺得玩得好開心! 同埋臨走前梗係要影番張大合照啦。

 

kim_28

 

最可怕既事來了….就係要沿路行番石級上山離開! (足足行咗接近25分鐘)

 

Photo by CANON 5D Mark III,Len | EF 24-70mm f2.8L USM

 

呀劍評分9

 

呀劍評語: 巿區中既綠洲! 近近地搭小巴都去得到既農場,有咩唔方便唔夠飽,隨時上番去科大食High Tea都仲得,而且價錢唔貴! 物超所值
清新地 簡介

清新地隱匿在蜿蜒山路盡頭的白水碗,“山重水復疑無路,柳暗花明又一村”,這麼一個瑰麗寶地,是為有緣人保留的。大家只要來到清新地就可以走進大自然,認識有機耕種。參觀莊園內的有機種植區,由資深農夫分享有機種植的經驗和自然生態,籍此提升愛護環境和環保意識。 都市莊稼漢為租地自耕計劃,有導師教授有機耕種技巧,適合喜歡嘗試有機耕種的你。清新地也提供多項主題性的活動和工作坊,例如小豆芽創作坊,利用沙石和種子創作圖畫,用玩出來的創意換取最快樂的學習。我們相約在清新地,投向自然,享受這份心田甘露。


地址

清新地 -西貢白水碗D.D.227 (科技大學旁)

 

營業時間

Mon-Sun: 9:00 am – 5:00 pm

 

聯絡電話

2723 3126 / 5112 9195

 

網址

www.naturesharvest.com.hk/

https://www.facebook.com/naturesharvest

 

(以上資料更新至文章當日)

 

kimfamilytravel
我不是甚麼旅遊達人,我寫的也不夠全面,只希望記下太太跟小朋友的點點滴滴,藉此也可跟大家分享些心得!