【親子好去處】初試VR!全新硬蛋香港體驗館

Posted on April 20, 2016 By       13,582

kim_1

復活節第一彈去完迪士尼花蛋節之後,雖然未到復活節正假,但我已經提早放假同小朋友去玩…

今次復活節第二彈之旅來到數碼港硬蛋香港體驗館。

 

呢個開幕不到一個星期既體驗館,今日見住天氣麻麻落住毛毛雨,就嚟個室內活動順便睇吓硬蛋係乜東東。

呢個體驗館係位於數碼港三期F座,離商場仲有一段距離,只在貝沙灣一期附近。

我哋由旺角東火車站搭一個站到紅磡,A出口行到去107P巴士站。

搭大約25分鐘在全線第19個站”貝沙灣,數碼港道”落車就會見到F座

(由紅隧口上車只係14個站)。

 

跟住指示牌向住F座行…

 

kim_2

比較少入數碼港,所以突然變咗個大鄉里,剩係搭Lift一時唔為意,搵唔到個掣去撳!

 

好在只係停頓咗一秒就諗番起要先在這按下樓層,然後等Lift到!

 

Lift裡面係唔會有樓層掣,只有開關掣。

 

kim_3

上到8/F一開Lift門就會見到硬蛋體驗館,

 

離遠已經見到有隻機械人歡迎你,門口都有硬蛋既Logo射在地上。

kim_4

因為今日唔係假期所以一個人都冇,只有3個職員在這行行企企。

 

喺未諗到應該由邊度開始行起,前面有部大屏幕已經將你個樣拍低…

跟住掃描你個樣睇吓你既顏值有幾高!哈哈…

呢個歡迎模式超攪笑,電腦計算結果話我今日魅力排名No.2喎!

帥過72%用戶,最下面仲顯示出你最似那個明星!

(但係我未知咩事囉,攪到我個樣掹大個口得個窿)

芊芊都被拍了下來,噢! 只係得第四,果然冇我既遺傳,似媽咪…哈哈!

哥哥似發哥! 係真唔係呀! 睇睇吓又有D似喎…但係最驚訝都唔係呢樣

kim_5

我工人姐姐都玩埋一份…咪住先,大佬!佢似陳妍希?嘩,咁你即係話陳妍希似印尼人。

都唔知係我工人姐姐開心定係陳妍希傷心囉…

 

放心,大家若果到時唔滿意可以再俾電腦Scan過,但係確實係一個幾Ice Breaking既科技

(當我哋將離開時有一班打工仔食飯時間嚟玩咗陣,成班朋友玩嗰陣真係堅開心)

kim_6

喺哥哥玩緊第二樣嘢既時侯,芊芊繼續留低被電腦掃描自己顏值!

唔通佢知道自己好低分…想攞No.1!

 

跟住就周圍睇吓,多數都係用App控制既家居智能科技。

kim_7

呢度放咗好多虛擬實境體驗既眼罩! 亦係呢度最好玩既地方。

kim_8

呢度有兩個蛋型既坐位,坐上去戴上眼罩就可以玩!

kim_9

職員姐姐應該揀咗個冇咁驚既場景俾哥哥,但係見佢上去玩個頭周圍擰真係笑死我哋,

之後我同工人都玩咗一次,真係好好玩! 好似玩緊真既過山車咁,好刺激!

唔知係咪職員姐姐整蠱我,揀咗個好驚好驚既俾我玩,我不停同自己講我只係坐喺度催眠自己先知冇咁驚!

 

之後哥哥仲玩咗兩次,揀咗唔同場景! 玩到個人都傻吓傻吓,玩完即刻離開張櫈,都唔知佢驚定唔驚!

第三次玩話見到D嘢但係唔話俾我聽係咩…

玩完先講話見到有個女仔好醜樣…唉!

但係真係爽,好好玩! 最緊要係唔駛錢唔駛排隊!!!! 我諗如果平時唔知邊度有開放日或商場試玩,可能排隊排半日先有得玩(呢個當然唔啱呀芊玩啦)。

 

頭先一入門口既機械人原來唔識郁既,只係企喺度接待你俾你拎番本場刊!

原來硬蛋係一個國內朋友投資,專門代理一些新科技產品! 呢度就似一個Show Room!

 

kim_10

跟住哥哥見到有個琴又走去彈! 原來佢唔單止係一部普通鋼琴,而係連接住iPad App,

好似以前打機玩拍子Game一樣,開住個App揀你想要既歌,然後佢就會進入畫面有好多拍子向下跌,如果彈中就Great或Perfect,唔中就Missed…等。

其實大家都玩過應該知我講咩啦! 如果你認自己係八十後。

kim_11

仲有一D實體控制器配合App的遊戲,最右邊個把機關槍連接iPad App打喪屍最吸引,

我覺得自己嚟咗機舖似過甚麼高科技體驗館。

 

kim_12

kim_13

 

呢邊就有D for老人家既高科技產品,我冇詳細聽職員解釋,只係知佢唔同平安鐘!再勁D!

 

芊芊見到公仔又拎上手攬攬!

kim_14

 

嚟到呢隻跳舞機械人啦,喺硬蛋個專頁可以成日見到,佢係一隻識跳舞既機械人。

佢可以跟住音樂跳舞,自己編寫佢既舞步!

不過我就覺得作用少咗D,我起初以為佢識做好多嘢!因為機械人唔係D咩新鮮事。

如果只係識跳舞功用好似比較少!

kim_15

鏡頭一轉哥哥已經又玩緊另外一樣嘢啦!我唔知佢正確學名叫咩,我叫佢「體感電動車」。

哥哥起初都要少少時間去適應(包括我)。

之後佢好快掌握到就自己玩起上嚟,識得快識得慢落嚟,我就喺側邊睇到提心吊膽,

因為我最驚佢撞爛人哋D嘢!!!

kim_16

我最後覺得有D肚餓,望一望隻錶先知道原來我哋已經喺度玩咗成差唔多兩粒鐘!

kim_17

跟住職員姐姐仲喺我哋臨走前送咗兩份紀念品俾我哋! 係一幅自製卡紙VR眼鏡。

呢個免費活動真係冇得頂! 就算真係要我請一日假平日嚟都願,

真係誠意推介!唔去對唔住自己。

 

最尾我哋行番落去商場食D嘢就搭車番屋企lu!

kim_18

番到屋企之後我哋拆開硬蛋姐姐送俾我哋既紀念品,

 

睇住個教學一步一步咁砌咗幅VR眼鏡出嚟:

kim_19

kim_20

 

跟住以下步驟安裝APP,再將iPhone放係自製眼鏡內就可以體驗360度虛擬實境。

kim_21

Photo by CANON 5D Mark III,Len | EF 24-70mm f2.8L USM

 

呀劍評分: 8

 

呀劍評語: 免費、好玩、少人!

 

硬蛋香港體驗館 簡介

硬蛋係中國最大嘅智能硬件創新創業互聯網平台,以分享經濟嘅模式著力打造以「供應鏈」為核心嘅智能硬件生態圈 。有硬蛋平台,創造智能硬件就再無難度。
香港館將設十個主題區,包括機械人區、智能教育玩具區、VR虛擬實景區,還有智能家居區、3D打印區及其他創意區等,展出數以百計的創新科技潮物,適合一家大細。
除了智能產品,香港館還設有咖啡室、會議室及活動場地,開放予團體借用,並為有志創業的本地團隊提供機會,讓他們透過硬蛋平台,接觸不同合作伙伴,形成智能硬件生態圈,共享科技發展成果。

 

地址

香港數碼港道100號3座F區8樓811-813室

 

免費參觀

 

開放時間

星期一至六上午10時至下午5時(星期六不定期開放);星期日及公眾假期休息

 

電話

28660020

 

網頁

www.ingdan.com

 

(以上資料更新至文章當日)

 

kimfamilytravel
我不是甚麼旅遊達人,我寫的也不夠全面,只希望記下太太跟小朋友的點點滴滴,藉此也可跟大家分享些心得!