【親子旅遊】迪士尼花蛋節(上)

Posted on March 23, 2016 By       2,330

kim_1

新曆新年過後等到頸都長埋嘅復活節終於到啦! 第一炮我預備的節目,
就係參加迪士尼舉行嘅花蛋節。

 

今次係我哋一家第2次嚟迪士尼樂園,我冇特別同佢哋賣關子,
早一個禮拜前已經話咗俾佢哋知今日會去迪士尼玩,佢哋超開心同埋期待咗呢一日好耐。
我哋8點15出門口,由深水埗出發到荔景再轉乘東涌線到欣澳站
轉埋上迪士尼線落埋車都只係9:15,未計步行去地鐵站,唔駛一個鐘就去到迪士尼lu!

仲有今日帶埋工人姐姐嘅好朋友嚟玩,佢未嚟過迪士尼,所以佢特別開心!

 

kim_2

記得第一次入嚟因為驚執輸好快就去咗排隊入場。
都冇好好咁欣賞吓門口呢個噴水池!所以今日輕輕鬆鬆咁圍住噴水池行咗個圈。
見到有D國內朋友跟住Daisy個動作影相(我其實好想影低但趕唔切) 真係青春即刻番晒嚟!

 

kim_3

池邊一直有音樂伴住,芊芊聽到都好開心咁跳晒舞!
我同佢一路轉圈一路亂影,影到呢張含情默默真係殺死人(我偏心,我認㗎!)

 

kim_4

好啦,我哋終於入場啦! 上年八月嚟嘅時侯個安檢係設係入閘機。
今日再嚟係先在門口處過安檢然後先到閘前排隊入場,
(今年係迪士尼10週年,估唔到仲有人唔知道唔俾帶飲/食品進場! 睇住有好多杯麵飲品被充公)

上年嚟嘅時侯唔記得喺呢個招牌位影相,今次補番數!

 

kim_5

今次花蛋節有好多唔同任務活動大人小朋友一齊參與,
其中一個當然係喺樂園裡面搵番咁多隻復活蛋啦! 「猜猜誰‧尋尋蛋」遊戲。

 

kim_6

嚟到小鎮大街第一批搵到嘅蛋。
就係Mickey Minnie佢哋啦! 特別留意係得Donald Duck係調轉咗!

 

kim_7

行前冇幾多就見到毛毛同大眼仔嘅蛋,佢就連蛋嘅Size都會跟據番人物嘅大小而定。
哥哥每次發現到花蛋都特別開心,仲好樂意叫我快D幫佢同花蛋影相。

 

kim_8

一離開咗哥哥就即刻又叫住我快D快D再去搵花蛋!
我同哥哥講「可以一邊玩一邊搵,我話迪士尼好大未必可以搵得哂咁多隻蛋架!」
距離動畫藝術教室開班時間還有少少,我哋就喺城堡前的花圃行行影影相。

 

kim_9

記得上一次夏天嚟都未見到呢個景點,真係每一次嚟有唔同嘅感覺!
今日天氣雖然麻麻地,冇藍天白雲,但最緊要冇落雨,同埋行起上嚟涼涼的都好舒服!

 

kim_10

 

kim_11

覺得自己好似去咗米奇妙妙屋咁! 因為所有人物都幾大隻,如果可以坐埋喺隔離影相就好喇!

哥哥又發現附近都擺放咗D普通花蛋喺度,妹妹行埋去即刻話粉紅色嗰粒花蛋係Anna,
我同媽咪即刻話「係喎….仲有藍色個蛋似Elsa喎!」
我諗真係小朋友先可以咁勢利,由個Pattern圖案就聯想到迪士尼嘅人物角色,
咁最遠黃色嗰粒係邊個呢?大家諗唔諗到……

 

kim_12

轉個頭諗住沿路行番去動畫藝術教室,但係啱啱見到小鎮大街古董車。
司機叔叔話就嚟開車啦!所以我哋隨影幾張相就上車,送我哋番去火車站附近啦!

 

kim_13

落咗車之後我就叫哥哥搵吓呀樂同呀愁嘅花蛋喺邊(因為我一早知道)。
哈哈! 佢搵咗好耐都搵唔到,其實就喺佢頭頂動畫藝術廊入口上面。
呀愁係瞓咗喺度,我即刻諗番動畫裡面呀愁唔想郁唔想行要呀樂拖住佢喺地上面行嗰一段。
但係點解冇阿燥、阿憎和阿驚……同埋乒乓嘅?

 

kim_14

突然見到喺動畫藝術廊有Donald & Daisy同大家影相喎!
雖然唔係好多人,但係芊芊唔肯過去…所以就變咗離遠咁影法。

好啦我哋夠鐘入去藝術教室,睇吓老師教小朋友畫乜嘢先!
估唔到行到去教室門口都俾哥哥發現多一隻花蛋,今次係醫神呀!
變咗蛋之後佢好似Wall-E D朋友,同埋有D似Gundam裡面一個角色,大家估唔估到呢?

 

kim_15

因為我哋冇一早去門口排隊,周圍去呢度睇嗰度睇,所以差唔多係最後嗰幾個家庭入去。
攪到哥哥同妹妹冇得坐埋一齊(其實我哋冇所謂),
我同哥哥是但搵到一個位就坐低,芊芊就同媽咪坐咗喺另一邊,
不過原來喺我哋之後仲有好多人遲嚟,佢哋只好坐喺房門內最後的長櫈上,
派發小朋友一個畫板,紙同一支炭筆就開始上堂了。

老師坐低開始授課了,大家望住出面的Projector,
老師一個一個步驟咁教小朋友畫Toy Story的勞蘇,
其實老師坐位附近都放咗好多復古玩具做裝飾,令成間房都好有藝術氣氛!

 

kim_16

成個過程只係大約10分鐘,可能你會話「咁快!排隊都唔止用咗十分鐘啦」…
不過其實好足夠完成圖畫,同埋小朋友冇咁好耐性,
如果唔係全程老師一對一的話,
相信之後開始會有小朋友離位或者好難控制秩序。

 

kim_17

呢度所有嘢都設計得好精緻好細心,就連書枱都係度身釘造,有三粒釘固定畫紙嘅位置,
令小朋友都坐得舒服畫得開心!

不過唯一一樣嘢係老師提提大家只係畫勞蘇個頭,所以我見到好多小朋友都畫到個頭好細,
因為佢哋打算預留番一D位置嚟畫埋個身,點知…得個頭就畫完。

 

kim_18

芊芊都開始畫,但係佢好似唔係好知做咩hahaha…見到佢個樣好緊張好得意,
所以即刻叫媽咪過嚟陪住芊芊一齊畫。

 

kim_19

不過勞蘇可能對芊芊嚟講冇咁熟悉,如果叫佢畫米奇老鼠會容易D

哥哥一路都好專心咁聽住老師講解!其實畫勞蘇個秘訣就係一定要畫到眼睛同鼻哥超大對比。

畫到佢個鼻好似成龍咁大就似㗎啦!

 

kim_20

如果個鼻唔夠大就會變咗Teddy Bear…
當然重要嘅唔係似唔似勞蘇,而係享受同咁多小朋友一齊畫畫嘅過程!
短短10分鐘可以多D小朋友參與,家長又唔會覺得太耐,可以把握時間去下一個地方玩,
無得嘆!離開藝術教室兩個即刻喺門口拎住自己幅畫影番張相做個紀錄先。
“The First Drawing @Disney”

 

kim_21

本來打算過隔離藝術廊搵醫神,但係見到米奇米妮喺度,即刻去同佢影番張相先(因為事先經叫姐姐幫手排緊隊)。

明明記得早幾日喺網上睇Mickey Minnie唔係著呢套衫㗎!?又話有本土Style嘅!?

https://www.hongkongdisneyland.com/zh-hk/events/springtime-celebration/

不過呢個十周年Look都好睇,同復活節都幾夾,又Colorful影相影出嚟仲靚D㖭!

 

kim_22

排緊隊的兩邊附近都放咗D復活花蛋,大家唔知又覺得個花紋似邊個迪士尼人物,
我就覺得中間黃黃青青有朵向日葵個隻蛋似係Frozen Fever Anna條新裙!

呢邊又有3隻蛋,但係唔好意思…陳生,你貴姓呀?我唔係好識你哋!
(番屋企之後起番你哋底)原來你哋叫Duffy Bear,Shellie May & Gelatoni

 

kim_23

上次嚟咁多人同唔到你哋影相,今次終於夢想成真啦!
好!繼續出發去完成下一個任務 (待續…)

 

kim_24

呀劍評分: 10分

呀劍評語: 尋找復活蛋呢個活動幾得意,有陣時行行吓有會俾你發現到幾個人物花蛋!令小朋友整個旅程都有份積極同竹

迪士尼花蛋節 簡介
春日來臨,朝氣蓬勃;藉着這個生機萌發的春日,首次呈獻以迪士尼花蛋為主題的春日慶祝活動。整個樂園遍佈色彩斑斕、設計獨特的花蛋,誠邀所有賓客投入這個耳目一新的花蛋世界,迎接生氣勃勃的Happily Ever After春日!你可額外選購多項全新推出的「星級體驗」,在這個「迪士尼花蛋節」,增添春日假期的樂趣。
https://www.hongkongdisneyland.com/zh-hk/events/springtime-celebration/

地址
香港迪士尼樂園,佢自己就已經係地址

樂園開放及節目演出時間表

https://www.hongkongdisneyland.com/zh-hk/calendars/day/

費用
樂園門票

https://www.hongkongdisneyland.com/zh-hk/tickets/

https://hongkongdisneylandtickets.disney.go.com/disney/zh_HK/ParkTickets/OneDay?Adult=0&Child=0&Senior=0

奇妙處處通

https://www.hongkongdisneyland.com/zh-hk/magic-access/

交通
港鐵

https://www.hongkongdisneyland.com/zh-hk/guest-services/mtr-disneyland-resort-line/

電話

https://www.hongkongdisneyland.com/zh-hk/help/phone/

(以上資料更新至文章當日)

kimfamilytravel
我不是甚麼旅遊達人,我寫的也不夠全面,只希望記下太太跟小朋友的點點滴滴,藉此也可跟大家分享些心得!