自家廚房:雪梨乾甘草雪耳瘦肉湯

Posted on March 2, 2016 By       2,939

resources

新年期間為食的我可以話食唔停口,瓜子、開心果、朱古力..等,真係唔熱氣嗰啲都唔多食,所以攪到喉嚨都成日痕痕癢癢咁,所以就煲返個雪梨乾甘草雪耳瘦肉湯等自己滋一滋啦

雪梨乾同埋雪耳都係可以滋陰潤肺、乾咳痰嗽,而甘草就可以清熱解毒,祛痰止咳,所以好啱我依家喉嚨唔舒服時飲呀!

雪梨乾一兩(約有十二片)、甘草半兩(約五片)、雪耳一個、蜜棗三至四粒及瘦肉$40

resources-(1)

其實甘草原食譜係落一兩,不過當我去藥材店執藥材時,店員話如果落太多甘草的話,整煲湯就會甘味比較重,小朋友應該唔鐘意嗰一陣味。

其實我鐘意煲湯唔多唔少都係為左小小豬,佢平身因為濕疹關係,好多嘢都唔食得,所以要多啲煲湯等佢吸收唔同營養。為左令小小豬開開心心咁飲湯,我就聽店員建議啦!!

雪耳浸發洗淨切件,瘦肉切件出水,其他材料浸洗乾淨

resources-(2)

將1L清水燒熱,然後放入所有材料

resources-(3)

由於雪耳唔可以隔夜,所以我都係煲夠一餐嘅份量,用1L水可以煲出六碗湯,夠我地三口子飲啦!

待水再滾後轉低火煲一個半小時

resources-(4)

最後加少少鹽作調味之後(真係少少就夠啦),就可以飲得啦

resources-(5)

其實初時都俾店員嚇一嚇,好驚個湯唔好飲。但飲落又真係唔錯,入口第一啖就覺得清清地又甜甜地,當入到喉嚨時又感受到嗰一份甘甜味,連老公都讚有驚喜,飲完喉嚨又真係幾舒服哦!

resources-(6)

哈哈哈….就連小小豬都話好飲,飲完兩碗之後仲要追住添飲。不過湯就真係每人兩碗冇得多,小小豬唯有向食左會靚仔嘅雪耳埋手,整煲湯嘅雪耳都俾小小豬食晒呀

難得佢地兩父子都咁鐘意,真係勁有成功感,等我過多兩日再煲多次,等三口子滋潤下之餘,又等我添多啲自豪感啦….哈哈哈!

KinseyMaMa
一切以小小豬為中心,讓小小豬擁有一個快樂的童年為目標。同隻百厭豬一齊整嘢食又周圍去玩, 記錄我們這一家嘅生活傻事,讓大家可以陪同小小豬一起成長。