自家廚房:三棗茶

Posted on December 30, 2015 By       5,499

resources-(5)
天氣凍凍地嘅時候,又令我諗起要煲返啲嘢可以暖身得嚟又可以補身,當然第一時間就諗起紅棗茶啦!正當我去藥材店買材料時,店員就介紹左我煲另一款嘅茶,仲話好啱小朋友飲。

 

一聽到啱小朋友就即刻諗都唔洗諗,買齊材料煲依個三棗茶,同小小豬一齊補補佢啦

resources

紅棗茶相信好多女仕都一定成日煲嚟飲,因為可以補氣血,飲完仲唔係面色紅潤我鍾意…哈哈哈!

 

原來將紅棗、南棗同埋蜜棗一齊煲,除左對補氣血更有效用之外,因為棗類都有抗過敏作用,所以對氣管敏感而引致容易咳嗽都會有調理作用。補益得來不會太燥火,所以對好啱小朋友飲用。

材料超簡單,只需要紅棗6粒、南棗2粒及蜜棗1粒

resources-(1)

將紅棗及南棗去核之後切絲,蜜棗就切開數片

resources-(2)

將全部材料連3碗水放入煲內

resources-(3)

待煲滾後,然後改用慢火煲大約30分鐘

resources-(4)

話咁快就飲得啦

resources-(5)

 

由於棗類本身都有甜味,所以完全唔洗再加糖都夠甜了。不過….小小豬一見到杯烏卒卒嘅飲品,佢都已經十萬個不願意,最後好慘情地先飲左一杯

resources

其實又唔係難飲呀,同比平日嘅紅棗茶仲更加甜添,一晚像飲兩杯真係成晚都覺得暖笠笠,都幾好呀。可能只係小小豬嘅心理障礙影響,飲多幾次就習慣啦….哈哈哈!

 

依款茶對補血養顏都好有功效,所以除左整俾小朋友飲之外,我地大人都一樣要飲多啲。

 

有時候如果唔太方便煲嘅時候,可以將啲材料放入真空壼內沖泡飲用,咁就幾時都可以補下身體,好好愛錫自己呀!

 

KinseyMaMa
一切以小小豬為中心,讓小小豬擁有一個快樂的童年為目標。同隻百厭豬一齊整嘢食又周圍去玩, 記錄我們這一家嘅生活傻事,讓大家可以陪同小小豬一起成長。