爸爸去哪兒之哥爾爸Q夫

Posted on November 19, 2015 By       2,089

kim_1

今次呢個行程要多謝Hysan!

因為佢個同學仔媽咪有飛多送俾我哋,成全咗今次哥爾夫球之旅,

今日係第57屆「香港高爾夫球公開賽」,原來呢度有好多嘢玩喎!

 

今日如常早上進行主日崇拜,然後就同媽咪SAY BYE BYE,

(因為我呢個偉大老公想俾媽咪喺屋企休息吓)

無錯就係得我一拖二去咁遠玩,

我哋飯都無食(其實因為食咗個好飽嘅早餐)

就直接喺尖沙咀搭東鐵去上水站,

落車之後我直接搭的士唔駛跳錶就去到香港哥爾夫球會。

 

入到去裡面就先派咗張咭俾我,

拎住張咭可以入到去免費獲贈一頂帽,

佢哋兩個第一次見到哥爾夫球車好興奮,

話要同架車影番張相先。

 

kim_2

 

沿路嘅環境都好靚好舒服,

而且周圍都係外國人,

覺得自己好似變咗名人紳士。

 

kim_3

 

終於行到去入口,

首先一見到嘅係一個好大嘅哥爾夫球場,

原來一陣間呢度就會開始一個公開賽,

不過我哋唔識欣賞住,

都係快快入去睇吓有咩玩好先。

 

嘩~已經離遠見到坐滿哂人,

大家都喺度等開場!

 

kim_4

 

後面D球星真係一個都唔識,

佢哋兩個喺度扮人哋打波個姿勢真係勁攪笑。

 

kim_5

 

再轉個彎入穿過幾間餐廳,

見到有個小小嘅球場俾大家入去參觀,

裡面有俾小朋友或大人試推桿練習嘅地方,

仲有多個沙地,

小朋友當自己去咗海灘咁喺度玩沙。

 

kim_6

 

終於攞咗頂帽啦,

佢哋兩個帶咗帽之後又幾靚仔靚女喎,

不過帶落芊芊個頭度又真係幾大頂唔啱佢帶。

 

kim_7

 

呢度有個好啱Hysan玩嘅地方!

就係畫畫嘅地方一個Kid’sCorner,

佢哋兩個即刻坐咗喺度畫起畫上嚟,

姐姐俾咗佢哋各人一張紙,

可以喺上面油顏色,佢哋仲好比心機油tim…

 

kim_8

 

呢度有好幾個姐姐負責,佢哋好有禮貌都安排得好好,

見到有D本顏色斷咗仲會走過嚟幫手刨番好佢。

 

係呢個藝術區隔離(即係我頭先有講嘅GolfZone)

在入口附近就已經有一個俾小朋友試打嘅地方啦!

只係得兩個小朋友排緊隊,

俾叔叔教完之後真係打得似模似樣!

但係打多兩三次之後Hysan開始又冇耐性,

只係諗住希望快D打到個波,

所以企位姿勢已經全錯!好似喺度掃地咁。

 

kim_9

 

芊芊唔想玩所以睇埋哥哥玩之後,

兩個一支箭咁衝咗入去玩沙lu…

 

kim_10

 

哥爾夫球場嘅草地真係好靚,

直接瞓落去超好玩,

於是我同佢哋兩個玩個遊戲鬥快碌過嚟我度!

但係芊芊唔夠哥哥快同埋碌到轉咗彎唔知去邊,跟住就大喊!

 

kim_11

 

喺另一邊有好多贊助機構嘅攤位,有賣衫有賣車…

我哋都走過去玩吓!但係全部小遊戲都係同哥爾夫球有關。

 

kim_12

kim_13

 

呢度呢個咁粉紅嘅攤位,原來係礦泉水嘅攤位,

幾位靚姐姐喺度教佢哋點玩呢個遊戲,

最後芊芊同Hysan都分別贏咗一份小禮物,

至於另外一個遊戲要拎住兩條繩,

然後將個乒乓波放喺條繩上面碌落去,

要中是但一個位置先算係贏,

當然我落埋場都攪唔掂…真係太難玩。

 

kim_14

 

去到另外一個汽車攤位,遊戲係玩哥爾夫球障外賽,

Hysan因為身高關係佢拎住支棍都仲係調轉手勢,

好似去掃地咁樣!(亮點:職員姐姐全程都悶到捱住個牆企,好敷衍咁讚哥哥「好叻喎,再試過!)

但係因為呢度嘅禮物已早派完,所以只係玩玩冇獎品!

 

kim_15

 

放喺出面嘅呢個車好靚,

哥哥自己主動要求要同架車影相,

影完車頭影車尾!

 

kim_16

 

喺餐廳隔離仲有個直播區,

有一個大電視供大家睇現場進行緊嘅公開賽,

大家坐喺呢個貌似吹氣嘅梳化椅上面嘆住啤酒一路睇。

 

kim_17

kim_18

 

穿過Canteen仔係一個超大超大超大(xN次)嘅大草坪,

小朋友開心跑跑跳跳,瞓地碌地、執樹葉、搣樹皮是常識吧!

 

kim_19

 

幸好正遇上另一個家庭要求我幫他們一家四口合照,

所以我都叫佢還債幫番我哋3個影張相,

點知個衰仔遮住我!好在之後都影番張好嘅用嚟做Cover!

 

kim_20

 

我哋喺大草坪悠閒咗好耐!跟住最後番過去頭先個Kid’sCorner度玩人體彩繪,

其實只係畫大花面!呢個哥哥居然主動吹我快D番去畫面,

記得佢上年我哋去台灣嘅時侯,有蠟筆館佢死都唔肯俾人畫,

最後只係畫咗喺隻手度!

今次佢居然肯俾個姐姐兜口兜面咁畫落去。

 

仲有第二個估唔到係…當我哋等緊畫花面貓既時侯,因為妹妹同時又好想快D過去玩沙,

跟住我就同妹妹講要等埋哥哥畫面先得,

跟住哥哥居然話「你照同芊芊過去玩沙啦,一陣我自己畫完過嚟搵番你哋咪得囉。」

嘩…咩事!突然咁大個仔!!!我係咪可以退休啦?

 

kim_21

 

佢問我應該俾姐姐畫咩好,

本來我諗住叫姐姐幫佢畫超人,

不過我擔心佢畫得唔似,跟住諗起最近屋企多咗條波兒,

所以就叫佢自己同姐姐講話要畫金魚。

 

kim_22

 

最後製成品-金魚水裏跳出來,

最後兩個喺沙度玩玩玩到日落…

然後再上埋去草地上面試吓感受吓真正打Golf嘅感覺!

哥哥打極都打唔到入洞,佢眼睇好容易但係親手打嘅時侯係另一回事,

正正俾佢學到好多時眼見同親身感受係兩回事。

 

kim_23

kim_24

 

最後我哋差唔多5:00就離開,

行番出去乘搭總會預備的穿梭巴士去番港鐵站。

 

kim_25

 

PhotobyCANON5DMarkIII,Len|EF24-70mmf/2.8LUSM

 

呀劍評分:9

 

呀劍評語:今日真係意外收鑊,本來還覺得有點遠而且一拖二諗住放棄,點知比我想像中舒服好玩,遊人唔多,環境幽美,小朋友可以接觸到Golf!仲有周圍嘅人都好靚好型!真係上等人玩嘅遊戲,正正正!下年有機會要再嚟

 

香港高爾夫球公開賽簡介

「香港高爾夫球公開賽」是香港體壇歷史最悠久的比賽,也是亞洲頂級的職業高球賽事之一。這項比賽始於1959年,歷屆選手猛將如雲,包括九位大滿貫賽事冠軍(九人共囊括27項重要賽事的冠軍)得主。Source:http://www.discoverhongkong.com/tc/see-do/events-festivals/sports-and-recreation/hong-kong-open-championship.jsp#ixzz3pb7Sl9iq

 

地址

粉嶺香港哥爾夫球會

 

開放時間

日期:2015年10月22日至25

 

交通

港鐵上水站有免費穿梭巴士直達

 

電話

36268604
(以上資料更新至文章當日)

 

kimfamilytravel
我不是甚麼旅遊達人,我寫的也不夠全面,只希望記下太太跟小朋友的點點滴滴,藉此也可跟大家分享些心得!