禮賓府開放日

Posted on November 12, 2015 By       3,504

kim_1

知道今日係禮賓府嘅開放日

今朝一早起身整裝待發一行四人向住中環出發

 

我哋喺港鐵中環站K出口上到地面過對面馬路

穿過滙豐總行去到聖約瑟教堂往上行

已經見到有好多慈母拎住塊牌「往禮賓府」指引巿民去禮賓府

 

我哋沿住下亞厘畢道去上亞厘畢道

途中經過律政司中心(幾靚,唔知有冇得開放俾人參觀呢?)

 

見到兩支旗干同埋警察叔叔

佢哋指示我哋往對面馬路由禮賓府嘅後花園進入

 

kim_2

 

唔好以為要行好耐,其實都只係10-15分鐘嘅路程

呢條睇落好似山路嘅山路,其實行完呢條直路轉個彎就見到禮賓府

兩兄妹手拖手行上去好開心!

 

kim_3

 

見到呢個寫住排隊區嘅牌就即係到咗啦

門口前要經過一個簡單嘅檢查,開一開袋俾保安人員檢查

 

我哋即刻係門口嚟個快閃影相先,

(影嘅時侯俾職員姐姐趕話唔好阻到後面上嚟嘅人)

其實根本勁少人…我起初以為要排好耐隊先入到嚟。

 

入到去一路上都係睇花睇花同埋睇花,

早知叫埋嫲嫲嚟啦,佢咁鍾意花!

不過又真係幾靚嘅!有好多品種喺出邊都唔係咁容易見到。

 

kim_4

kim_5

 

其實沿途有導賞服務,不過導賞員都係主要幫助公公婆婆多,

一邊行一邊介紹花!

我反而想導賞講吓梁振英瞓邊間房。

 

穿過花園嚟到個停車場,呢度攞放咗洋紫荊章嘅私家車喺度,

仲有一個係電動車,俾Hysan知道呢架車係用電,唔會噴黑煙嘅好環保。

 

kim_6

 

我哋身後嘅就係禮賓府啦!

轉個彎之後有個急救站(佢唔係擔心有公公婆婆行完花園會見暈卦)

之後沿住樓梯行上去就係禮賓府嘅花園啦。

 

一上到嚟就係個噴水池,左手邊係庇理羅士女子中學學生喺度演奏樂器,

右手邊都係冇咩人睇嘅展板講吓禮賓府嘅歷史咁。

 

kim_7

 

喺學生演奏隔離呢個咁Colorful嘅花圃好靚,

不過都係真花靚過上鏡,

喺呢張相睇都唔夠現場睇嗰陣咁正。

 

kim_8

 

我哋喺呢度聽咗佢哋演奏,佢哋兩個聽到唔願走…

但係唔知做咩拉咗首超慢嘅歌,

企喺我側邊D師奶不停話「有冇攪錯,邊個幫佢哋揀首咁嘅歌拉都有,聽到人哋想瞓覺」

我心諗「咁你仲企喺度聽…仲唔走」

 

kim_9

 

然後我哋開始踏入禮賓府啦,

行咗幾級樓梯,轉角見到個石麒麟(我估係卦)

但係芊芊一眼見到就話佢係Fox…

芊芊你睇錯啦,係狼先啱!雖然狐狸同狼都差唔多

 

kim_10

 

在禮賓府外有呢個好歐陸風嘅小亭園,

感覺好舒服好悠閒!不過都欄住咗唔俾人行過去。

 

kim_11

 

一入門口右手邊就係飯廳,

唔知佢哋係咪真係會喺裡面食飯㗎呢?

門外放咗個展示牌可以用QRcode睇到有關呢個飯廳嘅介紹。

 

kim_12

 

左手邊就係會客廳,

平時農歷新年嗰D短片係咪就喺度拍呢!?似係似係

 

再行入嚟就係禮賓府嘅大廳,不過就只限於此,

周圍都欄住咗只有直入直出,

叫做入嚟涼吓冷氣咁,

超英式嘅建築,住喺呢度好似住咗喺博物館咁,怪怪的!

 

那邊廂有幾個警隊嘅交嚮樂隊坐喺度演奏,

但係因為要一路向前行嘅關係,所以喺度影咗張相就出番去,

(突然同芊芊玩起上嚟)

 

kim_13

 

成幅清明上河圖呀…其實我唔識,只係見到有張畫咁拉長就當係…

因為又係欄住唔俾行過去,所以咩畫我都睇唔到。

 

kim_14

 

離開咗禮賓府,

門口外都仲有兩三個展牌喺度。

 

kim_15

 

出到嚟見到好大個花圃,仲有用花砌成嘅GOVERNMENT HOUSE字!

呢度一望望哂所有金融大廈、中銀、匯豐、渣打…俾所有高樓大廈包圍住,

其實都個View都唔係真係咁靚,好有壓逼感。

 

kim_16

 

最後離開前梗係要同呢個禮賓府影番張相啦,

影完先見到有個牌寫住另一度先至係影相至靚位。

 

kim_17

 

又係喎,有D花花草草喺後面墊一墊個禮賓府係靚D喎,

跟住媽咪不停叫我搵人幫我哋影番張全家幅…

但係我周圍望都見唔到後生仔,呀叔就大把….好在都搵到個,咔嚓!

呢個係一個好好嘅回憶…跟住直接過對面個動植物公園進發Yeah!

 

Photo by CANON 5D Mark III, Len | EF 24-70mm f/2.8L USM

 

呀劍評分7

 

呀劍評語: 對於未去過的我,禮賓府都幾陌生,旅遊價值就冇乜㗎啦,不過未去過始終要去一去,鍾意花嘅朋友就會特別開心,我龍友就只希望嚟見識吓,同埋諗住可以見到梁齊昕嘛!heee….

 

香港禮賓府 簡介

香港禮賓府自1968年起首次開放以來,每次都吸引很多市民和遊客前來參觀。每逢杜鵑花盛開時舉行的開放日更是盛事,參觀者除可飽覽滿園春色,還可欣賞糅合了東西方文化精粹的建築設計。

 

開放時間

不對外開放(除開放日外)

 

地址

香港島半山上亞厘畢道

 

交通

1. 從港鐵香港站B2出口,沿民耀街步行至中環怡和大廈,搭乘12號巴士,於香港動植物公園站下車。

2. 於港鐵金鐘站C1出口的金鐘太古廣場外搭乘23或40號巴士,於紅棉道香港公園下車。下車後經過香港壁球中心及聖約翰大廈,再橫過花園道至美國領事館,香港禮賓府就在隔壁。

3. 從港鐵中環站K出口出來,穿過滙豐總行大廈後,再橫過皇后大道中至花園道,沿花園道步行前往。

 

網址

www.ceo.gov.hk

 

電話

2878 3300
(以上資料更新至文章當日)

 

kimfamilytravel
我不是甚麼旅遊達人,我寫的也不夠全面,只希望記下太太跟小朋友的點點滴滴,藉此也可跟大家分享些心得!