【親子旅遊】大埔滘自然護理區+螢火蟲生態夜遊

Posted on August 6, 2015 By       27,003

kim_0806_1

今晚我同Hysan去探險!簡直係期待而久嘅活動,

就係夜探螢火蟲,「再見螢火蟲」你就睇過,

真嘅螢火蟲你又見過未!

 

kim_0806_2

 

今日除咗我同哥哥之外,

仲約埋住我哋隔離既鄰居2大1細一齊去

我哋差唔多下晝5點先出發,

剛好 Hysan 上完畫畫班,

我同佢喺附近食少少嘢當晚餐,

然後鄰居開車嚟接埋我哋出發,

我哋差唔多用咗半個鐘頭多少少,

就去到大埔滘自然護理區。

 

kim_0806_3

 

因為綠色廣場負責人約了其他參加者於大埔墟站等,

所以我哋就先到,喺呢度等佢哋!

小朋友梗係周圍跑跑跳跳。

 

kim_0806_4

 

現場其實已經有好多其他團體,

同埋昆蟲攝影最好者喺度周圍影,

跟住有人發現到一隻螳螂!

我同埋小朋友都即刻走埋去睇,

嘩!佢個頭真係三角形架,

其實昆蟲真係好靚,

當你近距離睇,你更會發覺呢個世界好大,

好多美好事物你都可能未發見過。

 

kim_0806_5

 

轉過頭,又有一班人喺度影蝴蝶!

呢隻蝴蝶起初喺我哋附近飛,

我哋都唔理佢,當佢普通蝴蝶咁看待,

因為佢嘅顏色唔靚,

但係成班發燒友居然又趴低又瞓低咁去影佢,

話佢隻翼上面有好多隻眼,

我哋睇真D…咦E!原來係真架喎!

 

kim_0806_6

 

都差唔多7:10,天色開始變黑,

負責人同其他參加者陸續嚟到,

首先負責人同所有參加者點人數,

今次活動只係每人$60,

唔似得外面旅行社 D Local Tour,

收你幾舊水成朝帶你遊山玩水食海鮮,

夜晚先嚟睇螢火蟲,

而且佢哋好均真,全部都係現場收費,

唔會話預先入數報名。

 

kim_0806_7

 

佢哋一開始同大家有簡介,

負責人真係保育專家,

佢字裡行間不斷重覆又重覆,

呼籲大家唔好影响生態大自然,

雖然我哋帶咗電筒,但係都叫我哋盡量唔好開,

然後每人派一張紅色玻璃紙,

包住電筒出光位置。

 

因為佢話昆蟲對強光好敏感,

如果較紅燈光會冇咁影響昆蟲活動,

同場有小朋友夾住盞紅色閃閃燈係後領防止走失,

有D就縛住支額頭專用電筒,

好鬼死專業!

講解完畢我哋就出發啦。

 

kim_0806_8

 

越行就越黑,

最後黑到咩都見唔到,

只係靠個月光照路!

之後我哋繼續前進,

途中睇到好多唔同種類嘅昆蟲,

長話短說,大家睇吓相啦!

(呀劍絕非昆蟲攝影家,只係靠 Hysan 支弱雞電筒,所以盡咗力影架喇)

 

見到竹節蟲喺度交配好得意呀,

我發現騎喺上面個隻似係公,

但係點解隻乸咁大隻既?

唔通係「魯芬」竹節蟲?

 

kim_0806_9

 

我最鍾意呢隻!

因為隻顏色好靚,有少少晶瑩剔透,身上甲殼有少少似犀牛皮!

 

kim_0806_10

 

呢隻飛蛾犀利啦,

我哋個個望咗好耐都望唔到,

佢扮樹葉樹皮扮得好似!

 

kim_0806_11

 

沿路見到小蛙蛙2

佢貼住條木一路都唔郁,好得意!

一定要影到番去俾芊芊睇!

 

kim_0806_12

 

用另外一支有紅玻璃紙既電筒照佢!

大家望吓佢對眼係可以掹大D,

所以大家千祈唔好用強光照佢哋影響生態呀,

(利申:上面好光嗰D相係其他團友照架!)

 

去到荷花池,聽到好多好多蛙蛙叫聲!

俾我哋搵到一隻青蛙!

呢隻係大D既蛙蛙,

我等咗好耐先影到佢谷大個腮咋。

 

kim_0806_13

 

呢度又見到另外一隻蛙喇!

佢身上既紋都好靚…

大家有冇留意到蛙蛙身後既好似烏蠅既嘢,

可能佢正想逃走…如果俾青蛙見到實冇命!

 

呢大家繼續向上行,

領隊話要上去一個小湖度先會有多少少的螢火蟲,

行行吓領隊又照到特別的昆蟲叫我哋睇,

都唔明點解咁黑佢都可以睇到有昆蟲,勁!!!

 

佢話呢隻叫「長尾水青蛾」,

連佢都話自己好少見到,

佢見到嗰陣都好開心!

 

kim_0806_14

 

佢話有分藍藍地同粉粉地紅色兩種,

我哋之後都見到隻藍藍青青的!

 

最後我哋上到去小湖度都見到5-6隻螢火蟲!

其實沿路我哋都周不時見到螢火蟲,

不過都係一隻咁大把,

原來螢火蟲分兩大類,

一類在水邊(七八月),而另一類會在草叢間飛舞(十一月),

其實睇螢火蟲好似睇緊天上星星咁,

只不過係地上唔係喺天上,

佢哋數量唔多,

可能係剛打完風又或者生態確實俾人破壞了。

 

負責人話好多旅行社 Local Tour,

好多時就不斷用電筒照,好多人好嘈,仲有領隊要用大聲公講解,

所以真係買少見少,

所以大家真係要保育,

如果唔係到我哋抱孫嗰陣,

呀孫仔孫女真係冇機會見到架啦!

 

kim_0806_15

 

Photo by CANON 5D Mark III, Len | EF 100mm f/2.8L Macro IS USM

 

呀劍評分: 9

 

呀劍評語: 好多團購同旅行社攪嗰D生態團,一係就成朝帶你遊花園,去吓呢度嗰度,去流浮山食海鮮,去大棠荔枝山莊摘荔枝,一係就去根本你平時都可以自己去嘅敬輝農場同埋紅磚屋,最後夜晚先至係帶你去睇熒火蟲,仲要帶你睇嗰個唔知乜水,可能只係旅行社嘅一般卜!今次搵到綠色廣場主辦的活動,只需$60,仲有專業人員帶隊講解,仲超哂時唔怕OT咁帶你睇昆蟲,你話去邊度搵!

 

大埔滘自然護理區 簡介

大埔滘特別地區,在大埔滘村附近。對大自然特別有興趣的人,包括自然學者和生物學家,以及需要清靜而未受破壞環境的人,該區早已成為他們常到的地方。該區本來稱為大埔滘植林區,那是指停車場附近溪流的陡斜集水區內四百四十公頃樹木,樹林自海拔五十米伸展至海拔六百五十米的草山山頂 。

 

地址

大埔滘村附近

 

費用

免費

 

網頁

http://www.afcd.gov.hk/tc_chi/country/cou_vis/cou_vis_cou/cou_vis_tpk/cou_vis_cou_tpk.html

 

交通

於大圍鐵路站總站乘九巴72A至松仔園站,步行5分鐘即達入口
主辦團體

綠色廣場

 

網頁

http://hk-green.com/

(以上資料更新至文章當日)

kimfamilytravel
我不是甚麼旅遊達人,我寫的也不夠全面,只希望記下太太跟小朋友的點點滴滴,藉此也可跟大家分享些心得!