【親子旅遊】錦田石崗軍營

Posted on July 15, 2015 By       3,974

kim_0716_1

傳說要凌晨三點去排隊先拎到飛既石崗軍營開放日,

今日可以嚟大開眼界!有軍人睇、直昇機睇、坦克車睇……仲有……

 

好多謝朋友仔既幫助, 可以拎到入場券!

今日早上已經到樹屋田莊玩完,

基本上得番半條人命,

之後再搭的士由林村去到石崗軍營。

 

個太陽又曬到離哂譜

所以真係好攰!

 

開放日3:00開始,我哋坐的士大概3:10就到門口,

我哋在門口前少少位置落車,

因為門口位置已經有好多車塞住!

我拎住入場券準備定入場。

 

kim_0716_2

 

好多解放軍人在場,入場程序好嚴緊,氣氛好嚴肅。

不過軍人們都好有禮貌,

如果多番D笑容會好D!

 

行咗一陣都仲未需要搣飛!

影吓周圍先,

呢度似係軍人營舍!

kim_0716_3

 

嘩行到呢度離入口5分鐘路程,

有個檢察站喎,

好似上機咁要SCAN過哂你帶嚟既嘢,

開埋我個書包睇添!

 

經過檢察站繼續行, 見到個軍人,

佢肯同人影相架,

於是叫Hysan同佢影番張相,

之後都見唔到其他靚仔軍人喇, 哈哈!

 

kim_0716_4

 

再行行吓見到整個開放日時間表!

我哋睇唔到升旗儀式喇,

不過仲睇到軍樂隊表演。

 

行咗好耐都未見到有表演,

跟住無端端殺出幾架軍車,

仲有d軍人行落嚟,

好似想拉人…

 

kim_0716_5

 

原來行到嚟呢度先至俾飛,

飛係用嚟換呢d一袋袋既禮品,

咁咪即係其實如果我唔要袋嘢, 就可以唔駛飛都入得?

 

kim_0716_6

 

我仲以為個禮物袋一定係紅色添!

 

沿路都有好多軍人係俾遊客合照,

因為除咗第一個之外我都見唔到再靚仔D,

所以我冇叫Hysan同佢哋影喇…哈哈哈!

 

kim_0716_7

 

相信呢個遙遠望過去的小建築物,

係俾軍人練習爬牆同打野戰的。

 

kim_0716_8

 

行到嚟呢個大草地度, 見到咁多人,

佢哋喺度做咩呢?

我諗係天氣太熱大家都頂唔住要喺度抖一抖,

仲有部份人知道一陣表演完咗呢度有活動玩,

所以排定隊。

 

kim_0716_9

 

其實偉大祖國都有D嘢值得我哋學習既,

紀律、信念、意志等…其他嘢就唔好學喇!

 

行咗咁耐終於行到嚟表演場地啦,

因為人實在太多, 而且今日太多嘢拎冇帶長鏡,

所以只能影到咁遠,

剛剛進行既軍樂表演,

佢哋步操真係好齊整!

 

到下一個表演之前我哋見到有架軍車,

人人都坐埋去, 等我都同Hysan坐上去影張相先。

 

kim_0716_10

 

下個表演又嚟啦,

嘩…刺殺操表演,

起初聽到呢個名我有D驚

唔知會唔會好似殺破狼咁對打!

驚唔啱俾小朋友睇。

好在點知原來只不過好似耍太極咁,

不過會唔會遠咗D呢…

 

kim_0716_11

 

之後到獵人戰鬥表演啦,

氣氛好似好緊張咁,

見到有D軍人木咁樣企咗喺度。

 

跟住喺我左手面突然殺出好多架軍電單車!

好型仔呀!然後從四方八面唔知邊度殺出好多軍人嚟!

 

kim_0716_12

 

成班軍人一齊抬起碌木!

最後一齊舉起就收工(下巴都跌咗落嚟)

 

kim_0716_13

 

然後玩火啦!軍人將個鐵架同鐵圈點上火,

眼前既我都聞到好大陣燶味。

 

kim_0716_14

 

軍人跳過火圈(影唔切), 跟住一路向前衝

然後有個軍人抬住個箱走,

其實都唔知咩嚟, 如果個廣播一路旁述緊係咩事會好D!

 

kim_0716_15

 

睇完軍演我哋坐埋一邊休息吓先,

睇吓戰利品係D咩….總共有4包!

有好多零食其中有「黑白配, 男仔女仔配」,原來都幾好食。

kim_0716_16

 

抖咗陣跟住同Hysan出去其他地方行吓,

個傻仔話一D都唔熱!

 

見到咁大架直昇機好興奮呀!

 

kim_0716_17

 

差唔多放咗3-4架喺度,

再行前少少, 有架超大超巨型既直昇機呀

Hysan一路要影好多張跳起的動作

各位可以試吓咁樣同小朋友影相架,

順便大家可以睇吓我對親子攝影的少少心得!

http://kimfamilytravel.blogspot.hk/2015/07/blog-post_7.html

 

kim_0716_18

 

跟住我哋好大膽咁誇過去頭先軍人演習既大草地,

Hysan好開心享受咁瞓咗喺個大草地,

大人就唔會咁做,因為實在太熱!這就是天真幸福。

 

kim_0716_19

 

原來頭先演習既磚牆都係木板做的,

好奇的Hysan要走進去睇吓仲有咩。

 

kim_0716_20

 

仲有少量軍人在演習場地中…

 

在演習場地影番去直昇機展區,

你睇吓幾咁多人!

kim_0716_21

 

Hysan爬唔過呢個障礙物!

好攪笑…跟住再嚟多張跳躍相!

 

kim_0716_22

 

同完直昇機影之後,就同坦克車影啦!

嘩!真係好大架同好靚呀…

可唔可以買架差唔多的上街行。

kim_0716_23

 

曬完一輪,又返番去頭先個地方休息吓飲吓水,

今次架車冇哂人, 可以影過夠本。

 

仲坐埋上去架車度添!

個軚盤喺Hysan隔離真係顯得好大。

 

kim_0716_24

 

行番出去有好多個唔同既攤位,

有好多唔同款既槍可以俾人影相!

Hysan擺返個靚POSE先。

 

kim_0716_25

 

後面個大叔好似等得唔耐煩!

咁又係, 又熱又辛苦…

 

呢度好攪笑,係派軍人平時食開既食物,

都係D饅頭麵包等等。

 

kim_0716_26

 

原來呢度有個禮堂仔,

如果唔舒服可以入嚟俾軍醫睇吓,

最重要係呢度有冷氣,

原來大家都走入嚟呢度抖暑!

 

kim_0716_27

 

行番出嚟都仲係咁多人,

番去睇吓芊芊瞓醒未先!

 

兩兄妹係草地度玩得好開心

 

kim_0716_28

 

kim_0716_29

 

最後我哋沿路行番出去,

仲記唔記得一開始我話過有個地方好多人坐咗喺度,

原來佢哋知道呢度有個射擊遊戲,

其實出番嚟先排都得, 因為都水尾冇咩人玩。

 

kim_0716_30

 

kim_0716_31

 

最後我哋就離開軍營喇,

一出去就已經有接駁巴士可以番元朗!

 

呀劍評分7

 

呀劍評語

以前Hysan細個嗰陣成日都話如果佢唔乖就帶佢去軍營軍訓, 今日帶佢嚟卻係好開心咁玩同認識軍人生活! 周圍環境舒服, 只係比較少有參與的活動, 大多數都係參觀跟睇表演! 不過計番佢一年先開放一次咁罕有,都值得嚟一次!

 

石崗軍營 簡介

是中國人民解放軍駐香港部隊其中一座軍營,於香港殖民地時代為駐港英軍陸部駐地,香港回歸後成為中国人民解放军驻香港部队的其中一個主要營地,内有石崗機場。

 

地址

石崗錦田公路260號

 

交通

51 荃灣西站 > 上村
(以上資料更新至文章當日)

kimfamilytravel
我不是甚麼旅遊達人,我寫的也不夠全面,只希望記下太太跟小朋友的點點滴滴,藉此也可跟大家分享些心得!