自家製作:病癒小補湯

Posted on February 11, 2015 By       6,733

resources-(11)

早一個月前都可以話未停過病,醫生都睇過三次,真係從未試過咁病。正當我病叫好少少時,姨媽就教我用准山、茨實、蓮子、生薏米、茯苓煲肉眼瘦肉湯。簡單嘅材料就可以煲出調整身體好湯,我當然即刻去煲啦!其實唔止我,依排好多人都唔舒服,就係咁我就買齊材料,返小豬爸屋企煲俾大家飲啦。

 

主要嘅藥材(准山、茨實、蓮子、生薏米、茯苓 )我係藥材店買,份量就可以因應煲用人數請店員同我執。由於我預六人飲用,所以就買左$25。

resources

 

由於大家都係病癒,唔好用太肥嘅肉,所以就用肉眼瘦肉嚟煲依個湯,我今次就買左$50啦。

resources-(1)

 

雖然依個步位嘅肉都唔太肥,不過我都會先汆一汆水,咁可以去啲肥之餘,又可以去一去啲肉血味。

resources-(2)

 

煲內放約3L水,然後將所有材料放入煲內。

resources-(3)

 

先用猛火煲半小時。

resources-(4)

 

 

之後轉用慢,再煲一小時。

resources-(5)

 

 

最後下鹽調味,可以飲得啦。

resources-(6)

 

 

由於唔洗落蜜棗,加上我又好少煲啲藥材湯,所以開頭都有少少擔心會係啲苦苦味。不過原來一啲都唔似係飲緊藥材湯,飲落又幾清甜,就連小小豬都飲咗兩大碗呀!

 

雖然依個湯話係病癒小補湯,不過啲藥材都係一啲潤而不燥,比較正氣嘅,所以唔單止病癒後可以飲,平日都可以煲嚟飲呀!

 

KinseyMaMa
一切以小小豬為中心,讓小小豬擁有一個快樂的童年為目標。同隻百厭豬一齊整嘢食又周圍去玩, 記錄我們這一家嘅生活傻事,讓大家可以陪同小小豬一起成長。