自家廚房:象印燜燒杯焗杞子紅棗陳皮茶

Posted on January 28, 2015 By       10,278

resources-(5)

今次我試整一款好啱女性係冬天飲嘅茶,就係杞子紅棗陳皮茶喇。

 

其實呢款茶係我姨媽教我煲,事緣我尋日姨媽摸到我隻手好凍,佢就話我係血氣唔夠,就叫我用杞子、紅棗同陳皮嚟焗水飲,仲叫我連飲幾日,成個人就可以夠血又夠氣,咁就唔洗怕凍。

resources-(13)

係我細問之下,原來杞子、紅棗配元肉就只係補血,所以好啱女仕係生理周期後飲。而改配陳皮的話,就變成了補血氣,加上陳皮又可以化胃氣,啱任何時候飲用。

 

既然有姨媽教路,所以今日就準備好材料焗嚟等自己暖暖身啦!

 

將一片陳皮浸透去囊,然後切絲,咁可以等啲陳皮味易出啲。

resources

 

四粒紅棗去核,然後連同十數粒杞子一齊洗淨。

resources-(1)

 

將所有材料放入象印杯中。

 resources-(2)

 

加入滾水焗20分鐘。

resources-(3)

 

話咁快就有得飲啦。

resources-(4)

我之後仲反覆沖泡左三次,係一個早上飲左三杯,飲到第三杯個味道都仍然係好有味,所以話象印杯真係唔錯,既方便又可以焗到好嘢飲呀!

 

味道方面又如果,我個人覺得杞子、紅棗配陳皮係好飲啲,雖然係少左元肉嗰一種甜味,不過對於唔多鐘意飲太甜嘅嚟講,依個入口就會覺得好清,而且飲都會有那一種陳皮嘅香味,所以真係唔錯,值得同大家推薦一下呀!

KinseyMaMa
一切以小小豬為中心,讓小小豬擁有一個快樂的童年為目標。同隻百厭豬一齊整嘢食又周圍去玩, 記錄我們這一家嘅生活傻事,讓大家可以陪同小小豬一起成長。